លោកនាយករដ្ឋមន្ត្រី ហ៊ុន សែន នៅថ្ងៃពុធនេះ បានអំពាវនាវសារជាថ្មីឱ្យសមាជិកក្រុមតំណាងរាស្ត្រ ក្រុមប្រឹក្សាឃុំសង្កាត់ក្រុង និងខេត្តរបស់គណបក្សជំទាស់សង្គ្រោះជាតិ ចូលរួមរស់ជាមួយគណបក្សប្រជាជនកម្ពុជា ដើម្បីរក្សាតំណែងរបស់ខ្លួន ពេលបក្សនេះត្រូវរំលាយចោល។
នេះគឺជាការអំពាវនាវលើកទីពីររបស់លោក ហ៊ុន សែន ក្នុងសប្ដាហ៍នេះ ស្របពេលដែល គម្រោងរំលាយគណបក្សជំទាស់សង្គ្រោះជាតិដ៏ចម្រូងចម្រាសនៅតែបន្តទៅមុខ បើទោះជាមានការរិះគន់ និងជំទាស់ពីសហគមន៍អន្តរជាតិយ៉ាងណាក៏ដោយ។
ថ្លែងក្នុងពិធីជួបជុំជាមួយកម្មករកម្មការិនីកាត់ដេរនាព្រឹកថ្ងៃពុធ នៅទីក្រុងភ្នំពេញ លោកនាយករដ្ឋមន្ត្រី ហ៊ុន សែន ដ៏មានឥទ្ធិពលថ្លែងយ៉ាងដូច្នេះថា៖
«យើងស្វាគមន៍ចំពោះអ្នកតំណាងរាស្ត្រ ដែលផ្ដាច់ខ្លួន ចេញពីគណបក្សមកចូលរួមជីវភាពនយោបាយជាមួយគណបក្សប្រជាជនកម្ពុជា។ យើងស្វាគមន៍មេដឹកនាំគណបក្សដែលគ្នាមិនបាន ដឹងអី ហើយទើបនឹងដឹងពីឧបាយកលរបស់មេរបស់ខ្លួនមកចូលរួមជីវភាពជាមួយគណបក្សប្រជាជន។ យើងស្វាគមន៍ជាមួយក្រុមប្រឹក្សាខេត្ត ក្រុមប្រឹក្សាស្រុក ក្រុមប្រឹក្សាឃុំសង្កាត់ ដែលចង់បន្តការងាររបស់ខ្លួនតទៅទៀត ចូលរួមជាមួយគណបក្សប្រជាជនកម្ពុជា»។
រូបឯកសារ៖ ស្លាកសញ្ញាគណបក្សសង្រ្គោះជាតិនៅក្នុងក្រុងសៀមរាប ដែលមានរូបអតីតប្រធានគណបក្ស លោក សម រង្ស៊ី និងប្រធានគណបក្សបច្ចុប្បន្ន លោក កឹម សុខា។ (ស៊ុន ណារិន/VOA)
លោក ហ៊ុន សែន ក៏បានបញ្ជាក់ផងដែរថា គម្រោងរំលាយបក្សជំទាស់ និងការកាត់ទោសមេដឹកបក្សនេះ គឺដើម្បីផ្ដាច់ផ្ដិលអង្គការចាត់តាំងដែលមានចេតនាផ្ដួលរំលំរដ្ឋាភិបាលរបស់លោក ហើយថា សមាជិកនានាដែលនឹងចុះចូលបក្សរបស់លោក នៅអាចរក្សាតំណែងរស់ខ្លួនដដែល។
«យើងរៀបចំបញ្ជីសារជាថ្មី បន្ទាប់ពីការបែងចែកអាសនៈសារជាថ្មីហើយ យើងរៀបបញ្ជីសារជាថ្មីដាក់ចៅសង្កាត់នៅក្នុងតំណែង ដែលចេញពីគណបក្សសង្គ្រោះជាតិ ឱ្យមកចូលគណបក្សប្រជាជន ឱ្យបន្តធ្វើមេឃុំតទៅទៀតទៅ។ រឿងនេះ គឺជាការអនុវត្ត យើងចង់ផ្ដន្ទាទោស សម្រាប់តែអង្គការចាត់តាំងនយោបាយ ដែលធ្វើសកម្មភាពក្បត់ ហើយយើងចង់ផ្ដន្ទាទោស តែមេដឹកនាំតែប៉ុណ្ណោះ មិនចង់ឱ្យប៉ះពាល់ជាមួយនឹងអ្នកខាងក្រោមនោះទេ»។
ការប៉ុនប៉ងរំលាយគណបក្សជំទាស់ដ៏ធំក្នុងប្រទេសកម្ពុជា បានធ្វើឡើងបន្ទាប់ពីការចាប់ឃុំខ្លួនមេបក្សនេះគឺលោក កឹម សុខា ក្រោមបទចោទ ឃុបឃិតជាមួយបរទេស ដើម្បីផ្នូលរំលំរដ្ឋាភិបាល ដែលមានទោសស្មើនឹង «ក្បត់ជាតិ»។ លោក កឹម សុខា ត្រូវបានកងកម្លាំងប្រដាប់អាវុធសម្រុកចូលចាប់ខ្លួនក្នុងគេហដ្ឋានរបស់លោកទាំងកណ្ដាលអាធ្រាត្រកាលពីដើម ខែកញ្ញាកន្លងទៅ។
កាលពីដើមខែតុលា សេចក្ដីស្នើវិសោធនកម្មច្បាប់ចំនួន៤ ដែលត្រៀមបែកចែកអាសនៈសភា និងក្រុមប្រឹក្សាឃុំសង្កាត់ ក្រុងនិងខេត្ត របស់បក្សដែលត្រូវរំលាយ ត្រូវបានរៀបចំដោយតំណាងរាស្ត្របក្សកាន់អំណាច ហើយក្រោយមកត្រូវបានអនុម័ត ដោយសភាដែលមានតែតំណាងរាស្ត្របក្សប្រជាជនកម្ពុជា ស្របពេលដែលបណ្ដឹងរំលាយគណបក្សសង្គ្រោះ បានដាក់ទៅតុលាការកំពូល។
ប្រសិនបើត្រូវរំលាយកៅអីសភារបស់បក្សជំទាស់ចំនួន៥៥ ដែលបានមកពីការបោះឆ្នោតដោយរាស្ត្រក្នុងឆ្នាំ២០១៣ នឹងត្រូវបែងចែកឱ្យបក្សផ្សេងៗដែលមិនបានអាសនៈ ហើយអាសនៈក្រុមប្រឹក្សា និងតំណែងឃុំសង្កាត់ ជាង៥០០០ អាសនៈរបស់បក្សសង្គ្រោះជាតិ ដែលបានមកពីការបោះឆ្នោតនៅខែមិថុនាឆ្នាំនេះ នឹងត្រូវធ្លាក់លើបក្សកាន់អំណាចស្ទើរទាំងស្រុង។ នេះបើតាមច្បាប់ និងការឱ្យដឹងពីមន្ត្រីរដ្ឋាភិបាល។
ឆ្លើយតបទៅនឹងសេចក្ដីអំពាវនាវរបស់ លោក ហ៊ុន សែន គេឃើញថា យ៉ាងហោចណាស់មានតំណាងរាស្ត្រមកពីគណបក្សជំទាស់មួយរូប និងក្រុមប្រឹក្សាមួយចំនួនបានសរសេរលិខិតស្នើសុំចុះចូលបក្សកាន់អំណាចរបស់លោក ហ៊ុន សែន ដើម្បីរក្សាតំណែងរបស់ខ្លួន ខណៈដែលមន្ត្រីនិងតំណាងរាស្ត្រសំខាន់ៗមួយចំនួនរបស់បក្សសង្គ្រោះជាតិ ភៀសខ្លួនចេញពីប្រទេសកម្ពុជា។
កញ្ញា ស៊ីន ចាន់ពៅរ៉ូហ្សេត ចៅសង្កាត់អូរចារ ក្នុងខេត្តបាត់ដំបង របស់បក្សសង្គ្រោះជាតិ បានថ្លែងប្រាប់ VOA នៅថ្ងៃពុធនេះថា នាង «មិនយកចិត្តទុកដាក់» ទៅនឹងការអំពាវនាវរបស់លោកនាយករដ្ឋមន្ត្រី ហ៊ុន សែន នោះទេ ហើយថា នឹងនៅតស៊ូជាមួយគណបក្សរបស់ខ្លួន ហើយធ្វើការឱ្យប្រជាពលរដ្ឋនៅក្នុងសង្កាត់ ជាធម្មតា។
រូបឯកសារ៖ នាងស៊ីន ចាន់ពៅរ៉ូហ្ស៊េត ចៅសង្កាត់រងទីពីរនៃសង្កាត់អូចារនៃគណបក្សសង្រ្គោះជាតិ ខេត្តបាត់ដំបង ចែករំលែកបទពិសោធន៍ក្នុងកំឡុងពេលចូលរួមរួមសិក្ខាសាលាចលនាស្រ្តីនៅទីស្នាក់ការបក្សសង្រ្គោះជាតិ នារាជធានីភ្នំពេញ នៅថ្ងៃពុធ ទី១០ ខែសីហា ឆ្នាំ២០១៦។
ចៅសង្កាត់វ័យក្មេងរបស់ បក្សសង្គ្រោះជាតិដែលទើបចូលកាន់តំណែងចៅសង្កាត់ មិនដល់៣ខែផងនោះ អះអាងប្រាប់ VOA យ៉ាងដូច្នេះថា៖
«កាលណាខ្ញុំទៅចុះចូល ជាមួយគណបក្សផ្សេងដែលខុសពីឆន្ទៈរបស់ប្រជាពលរដ្ឋដែលបានបោះឆ្នោតឲ្យគណបក្សសង្គ្រោះជាតិ គឺខ្ញុំនឹងប្រឈមមុខនឹងការថ្កោលទោស នឹងការវិនិច្ឆ័យរបស់ប្រជាពលរដ្ឋ។ ទី១គឺក្បត់នឹងប្រជាពលរដ្ឋក្នុងសង្កាត់អូរចារខ្លួនឯង ទីពីរគឺក្បត់នឹងឧត្ដមគតិដើមរបស់ខ្ញុំ ដែលមុននឹងខ្ញុំសម្រេចចូលរួមជាមួយគណបក្សសង្គ្រោះជាតិ»។
ការប៉ុនប៉ងរំលាយបក្សជំទាស់សង្គ្រោះជាតិត្រូវបានអ្នកឃ្លាំមើលការវិវត្តនយោបាយក្នុងប្រទេសកម្ពុជា និងអង្គការនានា ថាជាការបំបាត់សំឡេងប្រឆាំង មុនពេលការបោះឆ្នោតជាតិ ២០១៨ ឈានចូលមកដល់ហើយថា ជាការដើរថយក្រោយនៃលទ្ធិប្រជាធិបតេយ្យកម្ពុជា។
ក្នុងនោះដែរ កម្ពុជាក៏រងការរិះគន់យ៉ាងខ្លាំងពីសហគមន៍អន្តរជាតិ រួមមានសហរដ្ឋអាមេរិក សហភាពអឺរ៉ុប អង្គការសហប្រជាជាតិ អូស្ត្រាលី កាណាដា អង់គ្លេស និងអង្គការអន្តរជាតិធំៗជាច្រើន ចំពោះការចាប់ខ្លួនលោក កឹម សុខា ប្រធានគណបក្សសង្គ្រោះជាតិ និងការប៉ុនប៉ងរំលាយគណបក្សជំទាស់ដ៏ធំនៅកម្ពុជា។
ទោះយ៉ាងណាក៏ដោយ លោក ហ៊ុន សែន ដែលស្ថិតក្នុងអំណាចជាង ៣ទសវត្សរ៍ បានថ្លែងប្រាប់ក្រុមកម្មករ និងកម្មការិនី កាលពីថ្ងៃពុធថា ការបង្ក្រាបទៅលើបក្សសង្គ្រោះជាតិ ដែលលោកហៅថា ជា«បណ្ដាញអង្គការចាត់តាំងក្បត់ជាតិ» គឺដើម្បីរក្សាសុខសន្តិភាពជូនពលរដ្ឋកម្ពុជាទៅវិញ។
លោក ហ៊ុន សែន នៅថ្ងៃពុធនេះ ក៏បន្ថែមថា លោកមិនឱ្យជនណាម្នាក់ បំផ្លាញសមិទ្ធផលសន្តិភាព ដែលលោកបានកសាងជាង៣០ឆ្នាំកន្លងមកនេះ ហើយលោកក៏បានប្រកាសផងដែរថា លោកនឹងនៅកាន់អំណាចយ៉ាងហោចណាស់១០ឆ្នាំទៅមុខទៀត៕