លោក ហ៊ុន ម៉ាណែត កូនប្រុសច្បងរបស់លោកនាយករដ្ឋមន្ត្រី ហ៊ុន សែន បានឈរឈ្មោះជាលើកដំបូង ក្នុងនាមជាបេក្ខជនតំណាងរាស្ត្រមណ្ឌលរាជធានីភ្នំពេញ ខណៈឪពុករបស់លោកនៅបន្តឈរឈ្មោះជាបេក្ខជនតំណាងរាស្ត្រមណ្ឌលខេត្តកណ្តាល។ នេះបើតាមបញ្ជីបេក្ខជនឈរឈ្មោះបោះឆ្នោតរបស់គណបក្សប្រជាជនកម្ពុជា ដែលចេញផ្សាយដោយស្ថាប័នរៀបចំការបោះឆ្នោតជាតិ។
លោក ហ៊ុន ម៉ាណែត គឺជាកូនប្រុសទី ២ របស់លោក ហ៊ុន សែន ដែលបានឈរឈ្មោះជាតំណាងរាស្ត្រ បន្ទាប់ពីលោក ហ៊ុន ម៉ានី ដែលបានឈរឈ្មោះនិងជាប់ជាតំណាងរាស្ត្រនៅមណ្ឌលខេត្តកំពង់ស្ពឺ។
បើតាមសេចក្តីសម្រេចរបស់លោក ប្រាជ្ញ ចន្ទ ប្រធានគណៈកម្មាធិការជាតិរៀបចំការបោះឆ្នោត (គ.ជ.ប) ចុះថ្ងៃទី ១ ខែឧសភា ស្តីពីការប្រកាសទទួលស្គាល់ជាផ្លូវការគណបក្ស និងបញ្ជីឈ្មោះបេក្ខជនគណបក្សចូលរួមការបោះឆ្នោតជាតិឆ្នាំ ២០២៣ លោក ហ៊ុន ម៉ាណែត ស្ថិតនៅលេខរៀងទី ១ ក្នុងចំណោមបេក្ខជន ១២ រូប ដែលក្នុងនោះមានអតីតអភិបាលរាជធានីភ្នំពេញពីររូបគឺលោក ប៉ា សុជាតិវង្ស និងលោក កែប ជុតិមា។
មន្ត្រីសម្របសម្រួលជាន់ខ្ពស់នៃអង្គការខុមហ្វ្រែល លោក កន សាវាង្ស ប្រាប់វីអូអេនៅថ្ងៃពុធនេះថា ការឈរឈ្មោះជាតំណាងរាស្ត្ររបស់លោក ហ៊ុន ម៉ាណែត គឺជាការសម្រេចតាមបែបប្រជាធិបតេយ្យក្នុងបក្សប្រជាជនកម្ពុជា ដែលមិនបានស្តែងឱ្យឃើញភាពមិនប្រក្រតីណាមួយនោះឡើយ។ លោកថា បើពិនិត្យមើលច្បាប់ពាក់ព័ន្ធទាក់ទិនការបោះឆ្នោតនោះ គ្មានចំណុចណាដែលហាមឃាត់មិនឱ្យលោក ហ៊ុន ម៉ាណែត ឈរឈ្មោះជាតំណាងរាស្ត្រនោះឡើយ ទោះបីលោកមានតួនាទីជាមន្ត្រីយោធាជាន់ខ្ពស់របស់កម្ពុជាក្តី។
លោក ហ៊ុន ម៉ាណែត មានតួនាទីសំខាន់ៗក្នុងគណបក្សប្រជាជនកម្ពុជា និងមានតំណែងកំពូលៗក្នុងជួរកងទ័ព។
កាលពីខែមេសា ឆ្នាំ ២០២០ លោក ហ៊ុន ម៉ាណែត ដែលជាមេបញ្ជាការកងទ័ពជើងគោក ត្រូវបានដំឡើងឋានន្តរស័ក្តិជាផ្លូវការជាឧត្តមសេនីយ៍ផ្កាយបួន ដែលជាសញ្ញាមួយផ្សេងទៀតនៃផែនការសម្រាប់លោកស្នងតំណែងពីឪពុករបស់លោក។ នេះបើតាមទីភ្នាក់ងារសារព័ត៌មាន AFP។
មុនពេលដំឡើងឋានន្តរស័ក្តិនោះ លោកនាយករដ្ឋមន្ត្រី ហ៊ុន សែន បានប្រកាសគាំទ្រជាសាធារណៈ ឱ្យលោក ហ៊ុន ម៉ាណែត ដឹកនាំប្រទេសកម្ពុជាទៅថ្ងៃអនាគត។
បើយោងតាមសន្ទស្សន៍របស់វិទ្យាស្ថាន Lowy ស្តីពីអំណាចនៅអាស៊ី លោកម៉ាណែត មានអាយុ ៤៥ ឆ្នាំនេះ បានបំពេញកិច្ចការការទូតកាន់តែច្រើនជាងកាលពីមុនជាមួយឥស្សរជននយោបាយជាន់ខ្ពស់នៃបណ្តាប្រទេសនានា។ វិទ្យាស្ថាននេះបានឱ្យថា នៅឆ្នាំ ២០២២ លោក ហ៊ុន ម៉ាណែត បានជួបជាមួយមេដឹកនាំពិភពលោក ១០ រូប រួមមានប្រធានាធិបតី អនុប្រធានាធិបតី នាយករដ្ឋមន្ត្រី ឧបនាយករដ្ឋមន្ត្រី និងរដ្ឋមន្ត្រីការបរទេស រីឯឆ្នាំ ២០១៩ លោកបានជួបមេដឹកនាំក្នុងពិភពលោកតែពីរនាក់ប៉ុណ្ណោះ៕
លោក ហ៊ុន ម៉ាណែត កូនប្រុសច្បងនាយករដ្ឋមន្ត្រី ឈរឈ្មោះជាបេក្ខជនតំណាងរាស្ត្រជាផ្លូវការនៅមណ្ឌលភ្នំពេញ
រូបឯកសារ៖ លោកឧត្តមសេនីយ៍ឯក ហ៊ុន ម៉ាណែត មេបញ្ជាការកងទ័ពជើងគោកកម្ពុជា និងជាកូនប្រុសច្បងរបស់លោកនាយករដ្ឋមន្ត្រី ហ៊ុន សែន ឈរថតរូបនៅមុនជំនួបរបស់លោកជាមួយនឹងសមភាគីជប៉ុននៅទីក្រុងតូក្យូ ប្រទេសជប៉ុន ថ្ងៃទី ១៦ ខែកុម្ភៈ ឆ្នាំ២០២២។
ភ្នំពេញ —