គណបក្សប្រជាជនកម្ពុជាបានសម្រេចដាក់លោក ហ៊ុន ម៉ាណែត ធ្វើជាបេក្ខជនឈរឈ្មោះបោះឆ្នោតជ្រើសរើសតំណាងរាស្ត្រ នីតិកាលទី៧ លេខរៀងទី១ សម្រាប់មណ្ឌលរាជធានីភ្នំពេញ ដែលនេះជាដំណើរការថ្មីមួយទៀត ត្រូវគេគិតថាសម្រាប់លោកធ្វើជាបេក្ខជននាយករដ្ឋមន្ត្រី នាពេលណាមួយ នៅពេលដែលគណបក្សប្រជាជនកម្ពុជាឈ្នះការបោះឆ្នោតនាខែកក្កដាខាងមុខ។
នៅក្នុងសេចក្តីសម្រេចមួយស្តីពីការតែងតាំងបេក្ខភាពឈរឈ្មោះបោះឆ្នោតជ្រើសរើសតំណាងរាស្ត្រនីតិកាលទី៧ ឆ្នាំ២០២៣ មណ្ឌលរាជធានីភ្នំពេញ ដែលវីអូអេទទួលបាន និងត្រូវបានបញ្ជាក់ដោយអ្នកនាំពាក្យគណបក្សកាន់អំណាច ឈ្មោះរបស់លោក ហ៊ុន ម៉ាណែត ស្ថិតនៅខាងលើគេបង្អស់ គឺជាបេក្ខភាពលេខរៀងទី១មណ្ឌលរាជធានីភ្នំពេញ។ ការចាត់ចែងបេក្ខភាពឈរឈ្មោះបោះឆ្នោត គឺយោងតាមស្មារតីប្រជុំគណៈអចិន្ត្រៃយ៍នៃគណៈកម្មាធិការកណ្តាល នាថ្ងៃទី២៩ ខែមីនា ឆ្នាំ២០២៣។ នេះបើតាមលិខិតចុះថ្ងៃទី៣០ ខែមីនា ដែលជាសេចក្តីសម្រេចរបស់គណបក្សប្រជាជនកម្ពុជា ចុះហត្ថលេខាដោយលោក ហ៊ុន សែន។
លោក សុខ ឥសាន អ្នកនាំពាក្យគណបក្សប្រជាជនកម្ពុជា ប្រាប់វីអូអេនៅថ្ងៃចន្ទនេះថាការសម្រេចដាក់ ហ៊ុន ម៉ាណែត ជាបេក្ខភាពឈរឈ្មោះបោះឆ្នោតជាប់ទាក់ទងទៅនឹងតួនាទី នាយករដ្ឋមន្ត្រីផងដែរ ដោយហេតុថាលោកត្រូវតែជាប់ជាតំណាងរាស្ត្រសិន មុននឹងព្រះមហាក្សត្រសព្វព្រះរាជហឫទ័យ តែងតាំង ឬមិនតែងតាំងឱ្យធ្វើជានាយករដ្ឋមន្ត្រី។
លោក សុខ ឥសាន ថ្លែងថា៖ «យើងយល់ថាឯកឧត្តម ហ៊ុន ម៉ាណែត ជាបេក្ខភាពនាយករដ្ឋមន្ត្រីសម្រាប់អនាគត អ៊ីចឹងឱ្យខ្ញុំថាប្រាកដ អត់បានទេ ព្រោះនៅក្នុងក្របខណ្ឌចង់ឱ្យធ្វើភ្លាមក៏បាននៅពេលណាដែលគណបក្សប្រជាជនឈ្នះឆ្នោត។ ហើយឯកឧត្តម ហ៊ុន ម៉ាណែត គាត់ជាប់ឈ្មោះជាតំណាងរាស្ត្រ ពីព្រោះគាត់នៅលេខរៀងទី១ វាច្បាស់ជាជាប់ហើយ អ៊ីចឹងទេ អាស្រ័យលើព្រះមហាក្សត្រចេញព្រះរាជក្រឹត្យត្រាស់បង្គាប់ទទួលស្គាល់ជាបេក្ខភាពនាយករដ្ឋមន្ត្រី ហើយឱ្យរៀបសមាសភាពគណៈរដ្ឋមន្ត្រី យកទៅឆ្លងសេចក្តីទុកចិត្តពីរដ្ឋសភា»។
អ្នកនាំពាក្យរូបនោះបន្ថែមថា ពេលណាដែលមានការតែងតាំងសមាសភាពគណៈរដ្ឋមន្ត្រីថ្មី នោះបេក្ខភាពនាយករដ្ឋមន្ត្រី ត្រូវតែដឹកនាំសមាភាពគណៈរដ្ឋមន្ត្រី ទៅសុំសេចក្តីទុកចិត្តពីរដ្ឋសភា។
លោកមិនអាចបញ្ជាក់នៅឡើយទេថាតើនៅពេលគណបក្សប្រជាជនកម្ពុជាឈ្នះការបោះឆ្នោត តើលោក ហ៊ុន សែន ឬលោក ហ៊ុន ម៉ាណែត នឹងជាឥស្សរជននាយករដ្ឋមន្រ្តី ដើម្បីដឹកនាំរដ្ឋាភិបាល។
លោកបញ្ជាក់ថា៖ «អ៊ីចឹងឱ្យខ្ញុំថាបច្ចុប្បន្ននេះ ខ្ញុំថាម៉េចត្រូវ ពីព្រោះអាហ្នឹងជាមតិសមូហភាពរួចហើយ។ យើងចាំមើលដល់បោះឆ្នោតហើយ បើគណបក្សប្រជាជនកម្ពុជាជាប់ឆ្នោត អាហ្នឹងគឺថាតើព្រះករុណាលោកទ្រង់ចេញព្រះរាជក្រឹត្យទទួលស្គាល់ឯកឧត្តម ហ៊ុន ម៉ាណែត ជានាយករដ្ឋមន្ត្រី រៀបចំសមាសភាពគណៈរដ្ឋមន្ត្រី ឬមួយទទួលស្គាល់សម្តេចតេជោហ៊ុន សែន ជានាយករដ្ឋមន្ត្រី»។
នៅពេលសួរថាតើអាចនឹងមានការផ្លាស់ប្តូរនាយករដ្ឋមន្រ្តីក្នុងពេលណាមួយនៃអាណត្តិទី៧ខាងមុខ លោក សុខ ឥសាន ឆ្លើយតបថាមិនអាចមានការជំនួសបែបនោះទេ។
លោកបញ្ជាក់ថា៖ «ពេលដែលបោះឆ្នោតហើយ បើសិនសម្តេចហ៊ុន សែន លោកធ្វើជានាយករដ្ឋមន្ត្រី លោកធ្វើរហូតក្នុងរដ្ឋធម្មនុញ្ញអត់មានចែងឱ្យជំនួសអ្នកនេះ អ្នកនោះ មកជំនួសទេ។ តែបើសិនណា ព្រះករុណា លោកសព្វព្រះរាជហឫទ័យ ចេញព្រះរាជក្រឹត្យ ឱ្យឯកឧត្តម ហ៊ុន ម៉ាណែត រៀបចំសមាសភាពគណៈរដ្ឋមន្ត្រី អាហ្នឹងឯកឧត្តម ហ៊ុន ម៉ាណែត គាត់កាន់ជានាយករដ្ឋមន្ត្រីរហូត»។
នៅក្នុងពិធីសម្ពោធដាក់ឱ្យប្រើប្រាស់ជាផ្លូវការមន្ទីរពេទ្យបង្អែកស្រុកក្រូចឆ្មារ ខេត្តត្បូងឃ្មុំ នាព្រឹកថ្ងៃចន្ទនេះលោកនាយករដ្ឋមន្ត្រី ហ៊ុន សែន ក៏មិនទាន់បញ្ជាក់ចំៗថាពេលណាលោក ហ៊ុន ម៉ាណែត នឹងក្លាយជានាយករដ្ឋមន្ត្រី បន្ទាប់ពីរូបលោកនោះទេ។
លោកបន្តថាអ្នកបន្តវេនដែលសំដៅដល់លោក ហ៊ុន ម៉ាណែត គឺត្រូវតែធ្វើតាមលក្ខខណ្ឌបន្តបន្ទាប់ ហើយអ្វីដែលសំខាន់ គឺលោក ហ៊ុន ម៉ាណែត ត្រូវជាប់ជាតំណាងរាស្ត្រជាមុនសិន ទើបអាចក្លាយជានាយករដ្ឋមន្ត្រីបាន។
លោកថ្លែងថា៖ «ហើយបើបងប្អូន បើបោះឆ្នោតឱ្យ[គណបក្សប្រជាជនកម្ពុជា] ទៀត វាបន្តទៅទៀតហើយ។ ហើយក៏មានអ្នកបន្តវេនដែរ ហើយកុំមកចោទៗ គេត្រូវការការបោះឆ្នោតដោយប្រជាជន បន្ទាប់ទៅ គឺគណបក្សត្រូវជ្រើសរើស ប៉ុន្តែគណបក្សជ្រើសរើសរួចហើយ ប៉ុន្តែអ្នកឯងត្រូវឆ្លងកាត់ឱ្យក្លាយជាតំណាងរាស្ត្រសិន បន្ទាប់ទៅព្រះមហាក្សត្រតែងតាំង ប៉ុន្តែអ្វីដែលធំ គឺឆ្លងកាត់សភាបានឬអត់? អ៊ីចឹងដំណើរការប្រជាធិបតេយ្យធម្មតា។ ខ្ញុំមិនមែនហ្វឹកហាត់កូនខ្ញុំឱ្យធ្វើមេចោរទេៗ»។
អ្នកវិភាគនយោបាយ លោក មាស នី ប្រាប់វីអូអេនៅថ្ងៃចន្ទនេះថាលោកមិនទាន់ឃើញគោលនយោបាយផ្ទាល់របស់លោក ហ៊ុន ម៉ាណែត ក្នុងការដឹកនាំប្រទេសនៅឡើយទេ គឺអ្វីៗអាស្រ័យលើលោកនាយករដ្ឋមន្រ្តី ហ៊ុន សែន។
លោកថ្លែងថា៖ «មកដល់ពេលនេះ យើងមានការពិបាកនៅក្នុងការសន្និដ្ឋាន ព្រោះអីមកដល់ពេលនេះ យើងឃើញថាឯកឧត្តម ហ៊ុន ម៉ាណែត ក៏គាត់មិនទាន់បានបង្ហាញនូវអ្វីដែលជាគោលនយោបាយផ្ទាល់ខ្លួនរបស់គាត់ ថាតើគាត់នឹងដឹកនាំប្រទេសទៅតាមផ្លូវណា ទៅចេញច្រកណាទេ ព្រោះឥឡូវនេះ នៅតែអនុវត្តទៅតាមអ្វីដែលជាការណែនាំរបស់ពុករបស់គាត់»។
លោក មាស នី យល់ថាការផ្លាស់ប្តូរអ្នកដឹកនាំប្រទេសពេលណា គឺអាស្រ័យលើលទ្ធផលបោះឆ្នោតនាខែកក្កដាខាងមុខ ហើយក៏អាស្រ័យលើការសម្រេចចិត្តរបស់លោកនាយករដ្ឋមន្ត្រីផងដែរ ពោលគឺអាស្រ័យលើសុខភាព និងភាពហត់នឿយរបស់លោកនាយករដ្ឋមន្រ្តី៕
លោក ហ៊ុន ម៉ាណែត ឈរឈ្មោះជាបេក្ខជនតំណាងរាស្ត្រលំដាប់កំពូល ដើម្បីអាចធានាបេក្ខភាពនាយករដ្ឋមន្រ្តី
ភ្នំពេញ —
