គណៈកម្មាធិការស៊ើបការណ៍សម្ងាត់នៃរដ្ឋសភាសហរដ្ឋអាមេរិកគ្រោងនឹងផ្សព្វផ្សាយជាសាធារណៈនៅថ្ងៃអង្គារនេះនូវរបាយការណ៍មួយអំពីការរកឃើញ និងអនុសាសន៍របស់ខ្លួនទាក់ទិននឹងការស៊ើបអង្កេតដើម្បីចោទប្រកាន់ទម្លាក់លោកប្រធានាធិបតី Donald Trump ពីតំណែង។
លោក Adam Schiff ដែលជាប្រធានគណៈកម្មាធិការនេះ បានប្រាប់ទូរទស្សន៍ MSNBC កាលពីយប់ថ្ងៃចន្ទម្សិលមិញថា គណៈកម្មាធិការនេះកំពុងតែ «បង្ហើយ» របាយការណ៍នេះ។ លោកក៏បាននិយាយផងដែរថា គណៈកម្មាធិការស៊ើបការណ៍សម្ងាត់នឹងធ្វើការបោះឆ្នោតនៅយប់ថ្ងៃអង្គារនេះ ដើម្បីដាក់បញ្ជូនរបាយការណ៍នេះជាផ្លូវការទៅកាន់គណៈកម្មាធិការយុត្តិធម៌នៃរដ្ឋសភា ដែលសមាជិកគណៈកម្មាធិការនេះនឹងសម្រេចថាតើត្រូវរៀបចំបទចោទដើម្បីចោទប្រកាន់លោក Trump ឬក៏យ៉ាងណានោះ។
គណៈកម្មាធិការតុលាការគ្រោងនឹងចាប់ផ្ដើមសវនាការរបស់ខ្លួនទាក់ទិននឹងរឿងនេះនៅថ្ងៃពុធស្អែក ហើយនឹងធ្វើដូច្នេះដោយគ្មានវត្តមានមេធាវីរបស់លោក Trump។
លោក Trump បាននិយាយថា លោកនឹងមិនបញ្ជូនមេធាវីរបស់លោកទៅចូលរួមនៅក្នុងសវនាការនេះទេ «ដោយសារតែរឿងរ៉ាវទាំងមូលគឺជារឿងបោកប្រាស់»។
លោក Trump ក៏បានរិះគន់សមាជិកគណបក្សប្រជាធិបតេយ្យផងដែរថាបានរៀបចំសវនាការនេះឡើងនៅចំពេលដែលលោកនឹងចូលរួមនៅក្នុងកិច្ចប្រជុំកំពូលរបស់ក្រុមមេដឹកនាំនៃអង្គការអូតង់នៅក្នុងទីក្រុងឡុងដ៍ ចក្រភពអង់គ្លេស។
សវនាការនៅថ្ងៃពុធស្អែកនឹងផ្ដោតលើហេតុផលធម្មនុញ្ញពាក់ព័ន្ធនឹងការចោទប្រកាន់ដើម្បីទម្លាក់លោកប្រធានាធិបតី Trump ពីតំណែង ដោយអ្នកសិក្សាស្រាវជ្រាវផ្នែកច្បាប់ចំនួន ៤ នាក់ នឹងបង្ហាញខ្លួនធ្វើជាសាក្សី។ គណៈកម្មាធិការយុត្តិធម៌បានប្រកាសកាលពីថ្ងៃចន្ទម្សិលមិញថា សាក្សីទាំង ៤ នាក់នេះគឺលោក Noah Feldman សាស្ត្រាចារ្យច្បាប់នៃសាកលវិទ្យាល័យ Harvard អ្នកស្រី Pamela Karlin សាស្ត្រាចារ្យច្បាប់នៃសាកលវិទ្យាល័យ Stanford លោក Michael Gerhardt សាស្ត្រាចារ្យច្បាប់នៃសាកលវិទ្យាល័យ North Carolina និងលោក Jonathan Turley សាស្ត្រាចារ្យច្បាប់នៃសាកលវិទ្យាល័យ George Washington៕