ដោយប្រឈមជាមួយនឹងសមាជិកសភាខាងគណបក្សប្រជាធិបតេយ្យដែលបានអង្គុយអស់រយៈពេលជិត១៦ម៉ោងស្នើឲ្យមានការបោះឆ្នោតលើច្បាប់គ្រប់គ្រងការប្រើប្រាស់កាំភ្លើង សមាជិកគណបក្សសាធារណរដ្ឋដែលគ្រប់គ្រងរដ្ឋសភាបានបោះឆ្នោតនៅថ្ងៃព្រហស្បតិ៍នេះ ផ្អាកការងាររបស់ពួកគេរហូតដល់ថ្ងៃទី៥ខែកក្កដា។
ដំណើរវិវឌ្ឍន៍នេះបានធ្វើឲ្យមានឆាកល្ខោនកើតឡើងនៅវិមាន Capitol Hill ដែលសមាជិកសាធារណរដ្ឋត្រឡប់ទៅកាន់រដ្ឋសភាជាទៀងទាត់ដើម្បីបោះឆ្នោត ខណៈដែលសមាជិកគណបក្សប្រជាធិបតេយ្យបានប្រមូលផ្តុំគ្នានឹងស្រែកថា «បើគ្មានច្បាប់ទេ គ្មានការសម្រាកទេ» និងបានស្រែកសម្តែងការមិនពេញចិត្តដាក់លោកប្រធានសភា Paul Ryan ទៀតផង។
ក្នុងចំណោមការបោះឆ្នោតទាំងអស់ សមាជិកគណបក្សសាធារណរដ្ឋបានបោះឆ្នោតឲ្យរដ្ឋសភាផ្អាកដំណើរការមួយរយៈ ដែលនេះជាដំណើរវិវឌ្ឍន៍មួយដែលមានន័យថា រាល់ម៉ាស៊ីនថត និងមេក្រូទាំងអស់នៅក្នុងរដ្ឋសភាត្រូវបិទ។ សមាជិកគណបក្សប្រជាធិបតេយ្យ ងាកទៅធ្វើការតវ៉ាដោយប្រើប្រាស់ទូរស័ព្ទដៃរបស់ពួកគេ តាមរយៈបណ្តាញសង្គមហ្វេសប៊ុក និង Periscope ជំនួសវិញ។ Periscope គឺជាបណ្តាញខ្សែកាប C-SPAN អាមេរិកដែលមិនស្វែងរកប្រាក់កម្រៃ ដែលបានចាប់ផ្តើមផ្សព្វផ្សាយព័ត៌មាននានា ជំនួសឲ្យការប្រើប្រាស់ម៉ាស៊ីនថតរបស់រដ្ឋសភាដូចដែលធ្លាប់ប្រើកន្លងមក។
និមិត្តរូបសិទ្ធិមនុស្ស លោក John Lewis អ្នកតំណាងរដ្ឋ Georgia ជាអ្នកផ្តើមឲ្យមានការស្នើចាត់វិធានការផ្លូវច្បាប់ ដើម្បីជាការឆ្លើយតបទៅនឹងការបាញ់សម្លាប់រង្គាលនៅក្នុងទីក្រុង Orlando រដ្ឋ Florida ដែលជំរុញឲ្យសមាជិកគណបក្សសាធារណរដ្ឋចូលរួមអនុម័តលើដំណោះស្រាយសមស្របនានាកាលពីថ្ងៃពុធ៕