ទីក្រុង Kharkiv ដែលជាទីក្រុងធំទី ២ របស់ប្រទេសអ៊ុយក្រែន បានរងការវាយប្រហារយ៉ាងដំណំ ដោយសារការបាញ់គ្រាប់ផ្លោងយ៉ាងខ្លាំងក្លាពីកងកម្លាំងរុស្ស៊ីកាលពីថ្ងៃអង្គារម្សិលមិញ ខណៈកងទ័ពរុស្ស៊ីកាន់តែច្រើនកំពុងឈរជើងនៅតាមបណ្តោយផ្លូវភាគខាងជើងរដ្ឋធានីកៀវនៃប្រទេសអ៊ុយក្រែននៅថ្ងៃទី ៦ នៃការឈ្លានពានរបស់រុស្ស៊ីលើអ៊ុយក្រែនដែលជាប្រទេសជិតខាងរបស់ខ្លួន។
ក្រសួងការបរទេសអ៊ុយក្រែន បានចែករំលែកវីដេអូនៃការវាយប្រហារមួយទៅលើអាគាររដ្ឋបាលតំបន់ Kharkivនៅកណ្តាលទីក្រុងនោះដែលមានភ្លើងឆាបឆេះសន្ធោរសន្ធៅនិងផ្សែងខ្មួរខ្មាញ់នៅពេលដែលរថយន្តជាច្រើនបានឆ្លងកាត់តំបន់នោះ។
ប្រធានាធិបតីអ៊ុយក្រែនលោក Volodymyr Zelensky បានពណ៌នាការបាញ់កាំជ្រួចមីស៊ីលរបស់រុស្ស៊ីទៅលើទីលានដ៏សំខាន់របស់ទីក្រុង Kharkiv កាលពីថ្ងៃអង្គារថាជា «អំពើភេរវកម្ម» និងឧក្រិដ្ឋកម្មសង្គ្រាម។ លោកថ្លែងថា «គ្មាននរណានឹងត្រូវលើកលែងទោសឲ្យជាដាច់ខាត។ គ្មាននរណានឹងបំភ្លេចហេតុការណ៍នេះជាដាច់ខាត។ នេះជាអំពើភេរវកម្មរបស់សហព័ន្ធរុស្ស៊ី»។
មន្ត្រីសង្គ្រោះបន្ទាន់ម្នាក់ បាននិយាយថា ការវាយប្រហារនោះបានសម្លាប់មនុស្សយ៉ាងតិចណាស់ក៏ ៦ នាក់និងធ្វើឲ្យរបួស ២០ នាក់ដែរ។
បន្ថែមពីនេះ នៅពេលដែលការឈ្លានពានរបស់រុស្ស៊ីលើអ៊ុយក្រែន បានចូលដល់ថ្ងៃទី ៦ រដ្ឋមន្ត្រីការបរទេសរុស្ស៊ីលោក Sergey Lavrov បានស្តីបន្ទោសសហរដ្ឋអាមេរិកនិងសម្ព័ន្ធមិត្តរបស់អាមេរិកចំពោះការស៊ុំគ្រលំជាមួយអ្វីដែលលោកបានចាត់ទុកថាជារបបណាហ្ស៊ីនៅក្នុងទីក្រុងកៀវ។ អ៊ុយក្រែននិងប្រទេសលោកខាងលិច និយាយថា រុស្ស៊ី កំពុងចាប់ផ្តើមការវាយប្រហារដែលមិនបង្កមូលហេតុទៅលើទីក្រុងនានារបស់អ៊ុយក្រែន។
នៅពេលដែលរដ្ឋមន្ត្រីការបរទេសរុស្ស៊ីលោក Sergey Lavrov បានចាប់ផ្តើមថ្លែងសុន្ទរកថា អ្នកចូលរួមស្ទើរតែទាំងអស់នៅក្នុងកិច្ចប្រជុំរបស់ក្រុមប្រឹក្សាសិទ្ធិមនុស្សអង្គការសហប្រជាជាតិ បានងើបឡើងហើយដើរចេញពីសាលប្រជុំ។ លោក Lavrov មិនបានដឹងអំពីបញ្ហានេះទេពីព្រោះលោកត្រូវបានបង្ខំឲ្យធ្វើសុន្ទរកថាទៅកាន់ក្រុមប្រឹក្សាសិទ្ធិមនុស្សតាមប្រព័ន្ធវីឌីអូជំនួសឲ្យការថ្លែងដោយផ្ទាល់ដូចដែលលោកចង់ធ្វើ។
លោក Lavrov បានចោទប្រកាន់ដោយកំហឹងលើសហភាពអឺរ៉ុបពាក់ព័ន្ធនឹងសិទ្ធិសេរីភាពនៃការធ្វើដំណើររបស់លោកដែលបានរារាំងមិនឲ្យលោកជិះយន្តហោះ ឆ្លងកាត់ដែនអាកាសរបស់ពួកគេទៅកាន់ទីក្រុងហ្សឺណែវ។ បន្ទាប់មកលោក បានចំណាយពេល ២០ នាទី រិះគន់គោលនយោបាយរបស់ «ប្រទេសលោកខាងលិច» ដែលដឹកនាំដោយរដ្ឋាភិបាលអាមេរិកដែលលោកបានអះអាងថា បានដឹកនាំរបបរដ្ឋាភិបាលក្រុងកៀវធ្វើសង្គ្រាមជាមួយប្រជាពលរដ្ឋខ្លួនឯងចាប់តាំងពីឆ្នាំ ២០១៤ មក។
រដ្ឋមន្ត្រីការបរទេសរុស្ស៊ីរូបនេះ បានចោទប្រកាន់របបអ៊ុយក្រែនពីការប្រព្រឹត្តអំពើឧក្រិដ្ឋកម្ម និងការធ្វើសង្គ្រាមរយៈពេល ៨ ឆ្នាំប្រឆាំងនឹងពលរដ្ឋរុស្ស៊ីនិងពលរដ្ឋដែលនិយាយភាសារុស្ស៊ីនៅក្នុងតំបន់ផ្តាច់ខ្លួន ២ គឺ Donetsk និង Luhansk។ កំណត់សម្គាល់ទាំងនេះ ផ្ទុយគ្នាស្រឡះទៅនឹងទស្សនៈរបស់សហគមន៍អន្តរជាតិភាគច្រើន។
ទិដ្ឋភាពកណ្តាលក្រុង Kharkiv ក្រោយរងការបាញ់គ្រាប់មីស៊ីលរបស់ទាហានរុស្ស៊ី ថ្ងៃទី ១ ខែមីនា ឆ្នាំ ២០២២។
ប្រធានគោលនយោបាយការបរទេសសហភាពអឺរ៉ុបលោក Joseph Borell បាននិយាយកាលពីថ្ងៃអង្គារម្សិលមិញថា ការបាញ់ផ្លោងរបស់រុស្ស៊ីលើហេដ្ឋារចនាសម្ព័ន្ធស៊ីវិលដែលបានកើតមានឡើងកាលពីថ្ងៃចន្ទនៅក្នុងទីក្រុង Kharkiv ជា «ការរំលោភច្បាប់សង្គ្រាម»។
អ្នកនាំពាក្យរដ្ឋាភិបាលវិមានក្រឹមឡាំងលោក Dmitry Peskov បានច្រានចោលការចោទប្រកាន់ពីឧក្រិដ្ឋកម្មសង្គ្រាមហើយបានប្រាប់ក្រុមអ្នកយកព័ត៌មានថា «កងទ័ពរុស្ស៊ី មិនបានធ្វើការវាយប្រហារលើហេដ្ឋារចនាសម្ព័ន្ធស៊ីវិលនិងតំបន់នានាដែលមានអ្នកស្រុករស់នៅទេ»។
ថ្វីបើមានភស្តុតាងនៃការវាយប្រហាររបស់រដ្ឋាភិបាលវិមានក្រឹមឡាំងលើផ្ទះសម្បែង សាលារៀននិងមន្ទីរពេទ្យ ដែលក្រុមអ្នកយកព័ត៌មានរបស់សារព័ត៌មាន Associated Press បានប្រមូលចងក្រងក៏ដោយ។
អ៊ុយក្រែន ក៏បានរាយការណ៍កាលពីថ្ងៃអង្គារដែរថា កងទ័ពមកពីប្រទេសបេឡារុសដែលជាសម្ព័ន្ធមិត្តរបស់រុស្ស៊ី បានចូលក្នុងតំបន់ Chernihiv របស់អ៊ុយក្រែន។
នៅក្នុងប្រទេសប៉ូឡូញវិញ អគ្គលេខាធិការអង្គការអូតង់លោក Jens Stoltenberg បាននិយាយថា អង្គការអូតង់ នឹងឲ្យទាំងប្រទេសរុស្ស៊ីនិងបេឡារុសទទួលខុសត្រូវចំពោះអ្វីដែលកំពុងកើតមានឡើងនៅក្នុងប្រទេសអ៊ុយក្រែន។
លោកបាននិយាយទៀតថា៖ «លោកប្រធានាធិបតី Putin បានធ្វើឲ្យប្រេះឆាសន្តិភាពនៅក្នុងទ្វីបអឹរ៉ុប។ សម្ព័ន្ធមិត្តបានថ្កោលទោសការឈ្លានពានដ៏អយុត្តិធម៌និងព្រៃផ្សៃទៅលើអ៊ុយក្រែន»។
លោកមានប្រសាសន៍ទៀតថា៖ «ការវាយប្រហាររបស់រុស្ស៊ីជាការមិនអាចទទួលយកបានសោះឡើយ ហើយវារឹតតែមិនអាចទទួលយកបានទៀតពីប្រទេសបេឡារុសនោះ»៕
ប្រែសម្រួលដោយជឹង ប៉ូជីន
លោក Jeff Seldin អ្នកឆ្លើយឆ្លងព័ត៌មានរបស់ VOA ផ្នែកសន្តិសុខជាតិ អ្នកស្រី Heather Murdock អ្នកឆ្លើយឆ្លងព័ត៌មានរបស់ VOA ផ្នែកជនភៀសខ្លួននៅក្នុងរដ្ឋធានីកៀវ លោក Jamie Dettmer នៅក្នុងទីក្រុង Lviv អ្នកស្រី Carla Babb អ្នកឆ្លើយឆ្លងព័ត៌មានរបស់ VOA ប្រចាំក្រសួងការពារជាតិអាមេរិក អ្នកស្រី Cindy Saine អ្នកឆ្លើយឆ្លងព័ត៌មានជាន់ខ្ពស់ផ្នែកការទូត និងអ្នកស្រី Wayne Lee នៃ VOA រួមចំណែកនៅក្នុងសេចក្ដីរាយការណ៍នេះ។