ជំនួបលើកទីពីររវាងប្រធានាធិបតីអាមេរិកលោក Donald Trump និងមេដឹកនាំកូរ៉េខាងជើងលោក Kim Jong Un ដែលនឹងធ្វើឡើងនៅសប្ដាហ៍ក្រោយនេះ ត្រូវបានមនុស្សមួយចំនួនយល់ឃើញថាជាមូលដ្ឋាននៃភាពសុទិដ្ឋិនិយម ប៉ុន្តែក៏ជាឱកាសនៃការបង្ហាញការពិតផងដែរ។
លោក Park In Hook ប្រធានវិទ្យាស្ថាន Chey ដើម្បីការសិក្សាជាន់ខ្ពស់ (Chey Institute for Advanced Studies) បាននិយាយថា នៅក្នុងអំឡុងពេលសន្និសីទត្រីភាគីលើកដំបូងរបស់វិទ្យាស្ថានរបស់លោកស្ដីពីបញ្ហាប្រទេសចិន សហរដ្ឋអាមេរិក និងកូរ៉េខាងត្បូង គេឃើញមានការផ្ដោតភាគច្រើនលើជំនួបរវាងលោក Trump និងលោក Kim Jong Un ដែលនឹងធ្វើឡើងពីថ្ងៃទី ២៧ ដល់ថ្ងៃទី ២៨ ខែកុម្ភៈ ខាងមុខនេះនៅក្នុងទីក្រុងហាណូយ ប្រទេសវៀតណាម «ដោយសារតែមានការភ័យខ្លាចថា ជំនួបលើកនេះអាចជាឱកាសចុងក្រោយ»។
លទ្ធផលពិតប្រាកដនៃជំនួបនេះអាចកើតឡើងនៅទីក្រុងហាណូយ
អតីតអ្នកតំណាងពិសេសសហរដ្ឋអាមេរិកទទួលបន្ទុកកិច្ចការកូរ៉េខាងជើងលោក Joseph Yun បាននិយាយថា សហគមន៍អន្តរជាតិមានសិទ្ធិរំពឹងថា កិច្ចប្រជុំនៅក្នុងទីក្រុងហាណូយនេះនឹងផ្ដល់លទ្ធផលពិតប្រាកដ។
លោក Joseph Yun និយាយថា៖ «ជំនួបលើកទីមួយនៅប្រទេសសិង្ហបុរីបានជោគជ័យនៅក្នុងការបំបែករបាំងនៃការចរចា ហើយជំនួបលើកទីពីរនេះត្រូវតែបង្ហាញជាលទ្ធផល។ មានបញ្ហាសំខាន់ពីរ។ ទីមួយគឺការលុបបំបាត់អាវុធនុយក្លេអ៊ែរ និងទីពីរគឺការកសាងដំណើរការសន្តិភាព»។
លោកបានបន្ថែមថា មានការភ័យខ្លាចនៅក្នុងសហរដ្ឋអាមេរិកដែលថា ការជ្រើសយកផ្លូវសន្តិភាពអាចបណ្ដាលឲ្យមានការយល់ព្រមឲ្យមានអាវុធនុយក្លេអ៊ែរនៅក្នុងប្រទេសកូរ៉េខាងជើង។
លោក Joseph Yun និយាយថា៖ «មនុស្សភាគច្រើននៅក្នុងរដ្ឋធានីវ៉ាស៊ីនតោនមានការព្រួយបារម្ភអំពីគំនិតដែលចង់លុបបំបាត់នុយក្លេអ៊ែរតាមរយៈសន្តិភាព ដោយសារតែសម្រាប់ពលរដ្ឋអាមេរិកាំងភាគច្រើន គំនិតបែបនេះគឺជាដំណើរថយក្រោយ។ ការលុបបំបាត់អាវុធនុយក្លេអ៊ែរគួរតែធ្វើឡើងមុនពេលចាប់ផ្ដើមដំណើរការសន្តិភាព»។
កាលពីពេលថ្មីៗនេះ លោក Stephen Biegun អ្នកតំណាងពិសេសសហរដ្ឋអាមេរិកទទួលបន្ទុកកិច្ចការកូរ៉េខាងជើង បានចំណាយពេលជិត ៣ ថ្ងៃ ពិភាក្សាជាមួយនឹងសមភាគីកូរ៉េខាងជើងរបស់លោក គឺលោក Kim Hyok Chol នៅក្នុងទីក្រុងព្យុងយ៉ាង ប្រទេសកូរ៉េខាងជើង។ ទោះបីជាលោក Biegun បានហៅការពិភាក្សានោះថាមាន «លទ្ធផលជាផ្លែផ្កា» ក៏ដោយ ក៏លោកបានកត់សម្គាល់ថា នៅមានកិច្ចការជាច្រើនទៀតដែលត្រូវធ្វើ។
លោក Biegun បញ្ជាក់ដូច្នេះថា៖ «លោកប្រធានាធិបតី Trump បានបញ្ជាក់យ៉ាងច្បាស់ចំពោះរដ្ឋាភិបាលកូរ៉េខាងជើង ក៏ដូចជាចំពោះក្រុមរបស់យើងថា លោករំពឹងថានឹងមានដំណើរវិវឌ្ឍដ៏សំខាន់ និងអាចផ្ទៀងផ្ទាត់បានលើរឿងលុបបំបាត់នុយក្លេអ៊ែរ ដែលជាសកម្មភាពមោះមុត និងពិតប្រាកដ ដែលនឹងលេចឡើងពីកិច្ចប្រជុំបន្ទាប់នេះ»។
លោក Robert Einhorn អ្នកសិក្សាស្រាវជ្រាវជាន់ខ្ពស់នៃវិទ្យាស្ថាន Brookings បាននិយាយថា រដ្ឋបាលរបស់លោក Trump «មានគំនិតប្រាកដនិយមកាន់តែច្រើន» អំពីអ្វីដែលត្រូវការសម្រាប់ការចរចាម៉ឺងម៉ាត់នៅក្នុងទីក្រុងហាណូយ ប្រទេសវៀតណាម។
លោក Einhorn និយាយដូច្នេះថា៖ «យើងទំនងជាមិនដឹងថាតើលោក Kim Jong Un ពិតជាមានឆន្ទៈចង់លះបង់អាវុធនុយក្លេអ៊ែររបស់លោកឬក៏យ៉ាងណានោះទេ»។ លោកបានបន្ថែមថា លោក «មានមន្ទិលសង្ស័យយ៉ាងខ្លាំង» ថា តើរដ្ឋបាលរបស់លោក Trump អាចធ្វើឲ្យកូរ៉េខាងជើងលុបបំបាត់នុយក្លេអ៊ែរទាំងស្រុងបានដែរឬទេ។
ប៉ុន្តែលោកបានបន្ថែមថា មាននីតិវិធីផ្សេងមួយទៀតក្រៅពីការងាកទៅប្រើ «យុទ្ធសាស្ត្រដាក់ទណ្ឌកម្មសេដ្ឋកិច្ចកូរ៉េខាងជើង ការរារាំងឥរិយាបថគឃ្លើនរបស់កូរ៉េខាងជើង ដោយសារការធ្វើបែបនេះ នៅទីបំផុតអាចធ្វើឲ្យកូរ៉េខាងជើងផ្លាស់ប្ដូរជាដុំកំភួន ឬក៏អាចធ្វើឲ្យប្រទេសនេះដួលរលំ»។
លោកបានបញ្ជាក់ពីជម្រើសផ្សេងនោះយ៉ាងដូច្នេះថា៖ «ចរចាកិច្ចព្រមព្រៀងបណ្ដោះអាសន្នមួយដែលអាចរារាំង និងប្រហែលជាអាចកាត់បន្ថយសមត្ថភាពនុយក្លេអ៊ែរ និងមីស៊ីលរបស់កូរ៉េខាងជើងបាន»។
កិច្ចព្រមព្រៀងបណ្ដោះអាសន្ននេះជាអ្វីមួយដែលលោក Einhorn ជឿថា នឹងអនុញ្ញាតឲ្យប្រទេសកូរ៉េខាងជើង និងសហរដ្ឋអាមេរិកបន្តការចរចាឆ្ពោះទៅរកគោលបំណងលុបបំបាត់នុយក្លេអ៊ែរទាំងស្រុង ប៉ុន្តែគ្មានកាលបរិច្ឆេទកំណត់ច្បាស់លាស់។
លោកបានបន្តថា កិច្ចព្រមព្រៀងដូចនេះអាចមានគុណវិបត្តិមួយចំនួន ប៉ុន្តែវាក៏អាចដាក់កំហិតដល់ដំណើរវិវឌ្ឍនៃការផលិតនុយក្លេអ៊ែររបស់រដ្ឋាភិបាលក្រុងព្យុងយ៉ាងផងដែរ និងបើកផ្លូវទាក់ទង ដែលអាចប្រើដើម្បីបន្តវិធានការកសាងជំនឿទុកចិត្តដើម្បីកាត់បន្ថយភាពតានតឹង និងជៀសវាងមិនឲ្យមានការវាយតម្លៃខុសប្រកបដោយគ្រោះថ្នាក់ណាមួយកើតឡើងបាន។
តើដំណើរការនេះអាចវិវត្តទៅមុខបានដែរឬទេ?
ទោះបីជាមានគំនិតបែបសុទិដ្ឋិនិយមជាទូទៅពាក់ព័ន្ធនឹងកិច្ចប្រជុំនៅទីក្រុងហាណូយខាងមុខនេះក៏ដោយ ក៏ «ភាពជាប់គាំង» អាចនឹងនៅតែបន្ត ឬក៏ស្ថានការណ៍បច្ចុប្បន្នអាចនឹងនៅដដែល។ នេះបើតាមការបញ្ជាក់របស់លោក Zhang Fangming ប្រធានគណៈកម្មាធិការសិក្សានៃមជ្ឈមណ្ឌលសិក្សាគោលនយោបាយការបរទេសនៃអង្គការមូលនិធិចិនដើម្បីការសិក្សាយុទ្ធសាស្ត្រអន្តរជាតិ (China Foundation for International Strategic Studies)។
លោកនិយាយថា ករណីនេះអាចកើតឡើង ប្រសិនបើ «ក្នុងស្ថានការណ៍បច្ចុប្បន្ន ប្រទេសកូរ៉េខាងជើងបដិសេធមិនប្រកាសរឿងនុយក្លេអ៊ែរទោះក្នុងទម្រង់ណាក៏ដោយ ឬក៏មិនព្រមឲ្យមានការផ្ទៀងផ្ទាត់នូវការប្រកាសរបស់ខ្លួនអំពីនុយក្លេអ៊ែរ»។
សេនារីយ៉ូមួយទៀតដែលអាចបន្តស្ថានការណ៍បច្ចុប្បន្ននេះគឺពាក់ព័ន្ធនឹងការឆ្លើយតបរបស់សភាសហរដ្ឋអាមេរិកចំពោះកិច្ចប្រជុំនេះ និងថាតើសភាអាមេរិកបដិសេធមិនព្រមដកទណ្ឌកម្មជាបណ្ដើរៗពីរដ្ឋាភិបាលកូរ៉េខាងជើង ដោយមិនចាំបាច់ឲ្យកូរ៉េខាងជើងលះបង់ទាំងស្រុងនូវកម្មវិធីនុយក្លេអ៊ែររបស់ខ្លួន ឬក៏ធ្វើការប្រកាសដាច់ណាត់ណាមួយអំពីនុយក្លេអ៊ែរដែរឬក៏យ៉ាងណានោះ។
លោក Kim Joonhyung សាស្ត្រាចារ្យនៃសាកលវិទ្យាល័យ Handong Global University បាននិយាយថា ទាំងលោក Kim Jong Un និងទាំងលោក Trump សុទ្ធតែដឹងអំពីការរិះគន់ទាំងនេះ។
លោកបាននិយាយថា ការប្រជុំនៅទីក្រុងហាណូយនេះនឹងបង្ហាញឲ្យឃើញសខ្មៅ។
លោក Kim Joonhyung បានបញ្ជាក់ថា ប្រសិនបើការប្រជុំនេះបរាជ័យ លោកគិតថានឹងមិនមានការប្រជុំណាមួយទៀតនៅពេលអនាគតនោះទេរវាងមេដឹកនាំទាំងពីរ។
លោកបានបន្ថែមថា សំណួរចម្បងបំផុតសម្រាប់កិច្ចប្រជុំនេះគឺថា «តើទណ្ឌកម្មច្រើនប៉ុណ្ណា ដែលលោក Trump មានឆន្ទៈដកចេញពីកូរ៉េខាងជើង ជាថ្នូរនឹងការលុបបំបាត់នុយក្លេអ៊ែរមួយផ្នែករបស់ប្រទេសនេះ?៕
ប្រែសម្រួលដោយ ភី សុភាដា