មន្ត្រីជាន់ខ្ពស់នៃក្រសួងផែនការថ្លែងនៅថ្ងៃព្រហស្បតិ៍នេះថា ពលរដ្ឋក្រីក្រដែលបានទទួលការឧបត្ថម្ភសាច់ប្រាក់ពីរដ្ឋាភិបាលបានកើនឡើងដល់ជិត៦៩ម៉ឺនគ្រួសារបើគិតត្រឹមថ្ងៃទី២៤ ខែវិច្ឆិកាហើយចំនួនពលរដ្ឋក្រីក្រដែលត្រូវការជំនួយលុយកាក់ពីរដ្ឋាភិបាលអាចកើនឡើងទៀត តាមស្ថានភាពនៃជំងឺកូវីដ១៩។
កាលពីខែមិថុនារដ្ឋាភិបាលកម្ពុជាបានប្រកាសផ្តល់ជំនួយជាសាច់ប្រាក់ដល់គ្រួសារក្រីក្រនិងងាយរងគ្រោះចំនួនជាង៥៦ម៉ឺនគ្រួសារឬស្មើនឹងជាង២,៣លាននាក់ក្នុងគ្រាមានវិបត្តិជំងឺកូវីដ១៩នេះ ហើយថាចំនួនអ្នកក្រីក្រនេះអាចនឹងកើនឡើងថែមទៀតដោយរដ្ឋត្រូវចំណាយថវិកា២៥លានដុល្លារក្នុងមួយខែសម្រាប់ពួកគេ។
លោក ថេង បញ្ញាធន ប្រតិភូរដ្ឋាភិបាលកម្ពុជាទទួលបន្ទុកអគ្គនាយកផែនការនៃក្រសួងផែនការប្រាប់វីអូអេនៅថ្ងៃព្រហស្បតិ៍នេះថារដ្ឋាភិបាលនៅបន្តផ្តល់សាច់ប្រាក់ជូនគ្រួសារក្រីក្រដូចការប្រកាសរបស់លោកនាយករដ្ឋមន្ត្រី ហ៊ុន សែន កាលពីពេលកន្លងមកថានឹងផ្តល់ជូនរហូតដល់ដំណាច់ឆ្នាំ២០២០នេះហើយការធ្វើដូចនេះនឹងនៅបន្តទៀតបើស្ថានភាពកូវីដមិនថមថយ។
លោកបន្ថែមថា គិតមកត្រឹមថ្ងៃទី២៤ ខែវិច្ឆិការដ្ឋាភិបាលបានចំណាយប្រាក់ប្រមាណ១៣៥លានដុល្លារលើពលរដ្ឋក្រីក្រជិត៦៩ម៉ឺនគ្រួសារឬស្មើនឹងជាង២,៨លាននាក់ ហើយការចំណាយនេះនឹងនៅបន្តដល់ឆ្នាំ២០២១ប្រសិនបើពលរដ្ឋប្រឈមមុខនឹងការខ្វះខាតខាងថវិកា។
លោកមានប្រសាសន៍ថា៖ «ប្រសាសន៍ខ្ពង់ខ្ពស់របស់សម្តេចតេជោថាទីមួយ គឺរដ្ឋាភិបាលកម្ពុជាមិនបណ្តែតបណ្តោយឬក៏ទុកឲ្យប្រជាជនយើងដាច់បាយទេ។ បាទនេះចំណុចទីមួយ។ ឯចំណុចទីពីរ គឺធនធានថវិកា គឺយើងដឹងហើយថារាជរដ្ឋាភិបាលកម្ពុជា គឺត្រៀមបម្រុងថវិកាជាងមួយពាន់លានដុល្លារសហរដ្ឋអាមេរិកសម្រាប់ជួយសម្រួលនូវផលប៉ះពាល់ដោយសារកូវីដនេះ។ បាទមិនមែនថា...ជាងមួយពាន់លានហ្នឹងគឺសម្រាប់តែឧបត្ថម្ភសាច់ប្រាក់ជូនដល់ប្រជាជនក្រីក្រទេសម្រាប់ជួយទៅដល់SMEs (Small and medium-sized enterprises) [សហគ្រាសធុនតូចនិងមធ្យម] រឿងផ្សេងៗទៀតដែលវារងផលប៉ះពាល់»។
សម្រាប់ឆ្នាំ២០២១លោកបញ្ជាក់ជាថ្មីទៀតថារដ្ឋាភិបាលនឹងបន្តជួយប្រជាពលរដ្ឋ បើផលប៉ះពាល់កូវីដបន្តវាយប្រហារការរស់នៅរបស់ពលរដ្ឋ។
លោកបន្ថែមថា៖ «អ៊ីចឹងបើសិនជាដាច់ឆ្នាំ២០២០ ហើយស្ថានភាពហ្នឹងវានៅមិនប្រសើរប្រហែលជារាជរដ្ឋាភិបាលនឹងពិចារណាតទៅទៀតហើយសម្រាប់ការពន្យារពេលក្នុងការបើកសាច់ប្រាក់យ៉ាងម៉េចអីទៅទៀត»។
កាលពីថ្ងៃទី២៤ខែមិថុនា លោកនាយករដ្ឋមន្ត្រីហ៊ុន សែនបានប្រកាសថាកម្មវិធីឧបត្ថម្ភសាច់ប្រាក់ជូនប្រជាពលរដ្ឋដែលមានជីវភាពក្រីក្រនិងងាយរងគ្រោះក្នុងអំឡុងពេលជំងឺកូវីដ១៩មិនមែនជាការផ្តល់ប្រាក់អចិន្ត្រៃយ៍នោះទេហើយថារដ្ឋាភិបាលនឹងបន្តតាមដាននិងវាយតម្លៃផលប៉ះពាល់ជាក់ស្តែងរៀងរាល់ពីរខែម្តង។
ការឧបត្ថម្ភសាច់ប្រាក់ចុងក្រោយនេះគឺធ្វើឡើង៣ខែម្តងពោលគឺគិតចាប់តាំងពីខែតុលាដល់ដំណាច់ខែធ្នូឆ្នាំ២០២០។ សម្រាប់ខែធ្នូនេះ គឺជាខែទី៦ដែលពលរដ្ឋក្រីក្របានទទួលសាច់ប្រាក់ពីរដ្ឋាភិបាល។
លោកហ៊ុន សែនធ្លាប់បានព្រមានចាត់វិធានការក្តៅលើអាជ្ញាធរមូលដ្ឋានគ្រប់លំដាប់ថ្នាក់ប្រសិនបើហ៊ានឃុំឃិតគ្នាដាក់បញ្ចូលសាច់ញាតិខ្លួនឯងដែលមិនមែនជាគ្រួសារក្រីក្រនិងងាយរងគ្រោះពិតប្រាកដដើម្បីទទួលបានប្រាក់ឧបត្ថម្ភ។
យ៉ាងណាក៏ដោយមានការរិះគន់ថាកម្មវិធីឧបត្ថម្ភសាច់ប្រាក់នេះមិនបានទៅដល់គ្រប់ប្រជាពលរដ្ឋដែលរងផលប៉ះពាល់ពីការឆ្លងរាតត្បាតជំងឺកូវីដ១៩នោះទេ ពោលគឺអ្នកដែលធ្វើការក្នុងវិស័យកម្សាន្តឬអ្នកផ្តល់សេវាម៉ាស្សាជាដើមនោះមិនត្រូវបានកំណត់ជាក្រុមអាទិភាពសម្រាប់ការជួយសង្គ្រោះនោះទេ។
អ្នកស្រី ឈឹម ស៊ីថរ ប្រធានសហជីពទ្រទ្រង់សិទ្ធិការងារបុគ្គលិកកម្មករខ្មែរនៃក្រុមហ៊ុនណាហ្គាវើលមានប្រសាសន៍ថាអ្នកស្រីបានដាក់សំណើទៅរដ្ឋាភិបាលតាមក្រសួងការងារចំនួនពីរដងរួចមកហើយគិតចាប់ពីខែមិថុនាមកដើម្បីសុំការឧបត្ថម្ភ៤០ដុល្លារអាមេរិកសម្រាប់កម្មករដែលត្រូវព្យួរពីការងារ។ ក៏ប៉ុន្តែអ្នកស្រីថារដ្ឋាភិបាលមិនអើពើហើយរហូតមកដល់ពេលនេះ កម្មករក្នុងកាស៊ីណូភាគច្រើនកំពុងប្រឈមវិបត្តិហិរញ្ញវត្ថុនៅពេលពួកគេបានត្រឡប់ចូលធ្វើការតែការងារនោះមិនពេញម៉ោងហើយនៅជំពាក់បំណុលធនាគារនិងអ្នកចងការប្រាក់។
អ្នកស្រីមានប្រសាសន៍ថា៖ «បងប្អូនកម្មករនៅខាងសេវាកម្សាន្តដែលកាលពីខែ៦ហ្នឹងបានដាក់ញត្តិដំណាលគ្នាជាមួយនឹងពួកខ្ញុំពីខាងកាសីណូទៅស្នើសុំប្រាក់ឧបត្ថម្ភ៤០ដុល្លារហ្នឹងគឺគាត់ថាដោយសារក្រុមពួកខ្ញុំហ្នឹងគឺមិនមែនជាក្រុមនៅក្នុងវិស័យអាទិភាពដែលត្រូវតែរងគ្រោះដែលត្រូវជួយ។ អ៊ីចឹងជាក់ស្តែងទៅយើងក៏មិនយល់អំពីបច្ចេកទេសដែលពួកគាត់គិតដែរម៉េចបានជាបច្ចេកទេសរបស់គាត់គិតហ្នឹង អ្នកដែលរងផលប៉ះពាល់ខ្លះបានខ្លះមិនបានហ្នឹង»។
អ្នកស្រីបន្ថែមថា៖ «យើងវាមានការខកចិត្តណាស់ការដែលឆ្លើយតបរបស់រដ្ឋាភិបាលនៅក្នុងអំឡុងវិបត្តិកូវីដ១៩នេះ។ អ៊ីចឹង ខ្ញុំមិនដឹងថាសំណូមពរអីម៉េចទៀតពីព្រោះធ្វើដល់ទៅញ្ញត្តិមានបុគ្គលិករាប់ពាន់នាក់ស្នើទៅរដ្ឋាភិបាលតាមរយៈក្រសួងហ្នឹងហើយមិនមានការឆ្លើយតបផងខ្ញុំអត់ដឹងថាវាត្រូវមានពាក្យអីត្រូវទៅសំណូមពរទៀត»។
លោក ថេង បញ្ញាធនអគ្គនាយកផែនការនៃក្រសួងផែនការអះអាងថាអ្នករិះគន់ពីកម្មវិធីឧបត្ថម្ភសាច់ប្រាក់នេះមិនបានយល់ស៊ីជម្រៅនៃកិច្ចការបច្ចេកទេសរបស់អ្នកជំនាញក្នុងការកំណត់ស្ថានភាពជីវភាពពលរដ្ឋ និងស្ថានភាពគ្រួសារដែលសមនឹងទទួលបានការជួយពីរដ្ឋាភិបាល។
លោកមានប្រសាសន៍ថា៖ «យើងកំណត់គ្រួសារក្រីក្រហ្នឹងគឺមូលដ្ឋានផ្អែកទៅលើប័ណ្ណគ្រួសារដែលគាត់កំពុងតែកាន់។អាហ្នឹងគឺកន្លែងហ្នឹងគឺយើងឯកភាពគ្នាពីដំបូងប៉ុន្តែការយល់ឃើញ ឬក៏ការរិះគន់របស់អ្នករិះគន់មួយចំនួនដោយសារគាត់មិនមែនអ្នកបច្ចេកទេស។ អ៊ីចឹងគាត់អត់យល់ទេ...ដល់ពេលអត់យល់ទៅចេះតែមានការទិតៀនអ៊ីចឹង»។
បើតាមរបាយការណ៍បច្ចុប្បន្នភាពនៃសេដ្ឋកិច្ចកម្ពុជារបស់ធនាគារពិភពលោកដែលបានចេញផ្សាយកាលពីខែកញ្ញាឆ្នាំ ២០២០នេះ«សេដ្ឋកិច្ចកម្ពុជានៅឆ្នាំ២០២០នេះត្រូវបានព្យាករទុកថានឹងមានកំណើនអវិជ្ជមានគឺដក២ភាគរយដែលជាការធ្លាក់ចុះយ៉ាងគំហុកបំផុតមិនធ្លាប់មានក្នុងប្រវត្តិសាស្ត្រថ្មីៗនេះរបស់កម្ពុជាជាហេតុប៉ះពាល់ធ្ងន់ធ្ងរទៅលើសុខុមាលភាពគ្រួសារនិងអាចធ្វើឲ្យភាពក្រីក្រកើនឡើងទៀតផង»។
កាលពីចុងខែឧសភារបាយការណ៍ដាច់ដោយឡែកមួយទៀតរបស់ធនាគារពិភពលោកបានបង្ហាញថាដោយសារជំងឺកូវីដ១៩ភាពក្រីក្រក្នុងឆ្នាំ២០២០ អាចនឹងកើនឡើងពី៣ទៅ១១ភាគរយប្រសិនបើអ្នកដែលស្ថិតក្នុងវិស័យរងផលប៉ះពាល់បន្តបាត់បង់ចំណូលអស់៥០ភាគរយក្នុងរយៈពេល៦ខែជាប់គ្នា។
មន្រ្តីរដ្ឋាភិបាលកម្ពុជាឲ្យដឹងថាអត្រាភាពក្រីក្ររបស់កម្ពុជាមានជាង១០ភាគរយ មុនពេលមានវិបត្តិជំងឺកូវីដ១៩។ បើតាមធនាគារពិភពលោកដដែលជំងឺកូវីដនេះធ្វើឲ្យការងាររបស់ប្រជាពលរដុ្ឋកម្ពុជាយ៉ាងតិច១,៧៦លាននាក់ស្ថិតក្នុងហានិភ័យ៕