ខណៈមានការរិះគន់ជាបន្តបន្ទាប់ លោកនាយករដ្ឋមន្រ្តី ហ៊ុន ម៉ាណែត កាលពីថ្ងៃពុធ បានបញ្ជាឱ្យផ្អាកការផ្តល់សេវារដ្ឋបាលមួយចំនួនរបស់រដ្ឋបាលក្រុង ស្រុក ខណ្ឌ ដែលលែងតម្រូវឱ្យអាជីវកម្មខ្នាតតូចមួយចំនួនចុះបញ្ជីតាមច្រកចេញចូលតែមួយ តាមការកំណត់របស់រដ្ឋាភិបាល កាលពីកន្លងទៅ។ នេះបើតាមសេចក្តីសម្រេចមួយចុះហត្ថលេខាដោយលោក ហ៊ុន ម៉ាណែត កាលពីថ្ងៃទី១៣ ខែកញ្ញា។
កាលពីពេលថ្មីៗ មានការប្រកាសតាមឧគ្ឃោសនស័ព្ទ និងជាលិខិតនៅតាមបណ្តាស្រុកខណ្ឌសង្កាត់ឃុំមួយចំនួន ដែលតម្រូវឱ្យម្ចាស់អាជីវកម្មខា្នតតូចទៅចុះបញ្ជី ក្នុងនោះក៏មានម្ចាស់តូបកាហ្វេ ហាងកាត់សក់ ហាងកាត់ដេរ និងម្ចាស់ហាងគុយទាវជាដើម។ ប្រជាពលរដ្ឋមួយចំនួនបានលើកឡើងអំពីការព្រួយបារម្ភរបស់ពួកគេ ទាក់ទងនឹងការតម្រូវឱ្យស្នើសុំច្បាប់អនុញ្ញាតក្នុងការប្រកបអាជីវកម្ម ខណៈពួកគេកំពុងមានការធ្លាក់ចុះប្រាក់ចំណូល។
នាយករដ្ឋមន្ត្រីប្រទេសកម្ពុជាលោក ហ៊ុន ម៉ាណែតជួបជាមួយបុគ្គលិករោងចក្រនៅភូមិព្រៃស្ពឺជាយរាជធានីភ្នំពេញប្រទេសកម្ពុជាកាលពីថ្ងៃទី២៩ សីហា ឆ្នាំ២០២៣។
បើតាមសារនៅលើហ្វេសប៊ុកផ្លូវការរបស់នាយករដ្ឋមន្រ្តី លោក ហ៊ុន ម៉ាណែត លើកឡើងថាបន្ទាប់ពីមានការផ្សព្វផ្សាយព័ត៌មានមួយចំនួនពាក់ព័ន្ធនឹងការតម្រូវឱ្យស្នើសុំច្បាប់អនុញ្ញាតប្រកបអាជីវកម្ម និងបន្តសុពលភាពអាជីវកម្មនៅការិយាល័យច្រកចេញ-ចូលតែមួយនៃរដ្ឋបាលក្រុង ស្រុក ខណ្ឌ ប្រជាពលរដ្ឋដែលកំពុងប្រកបអាជីវកម្ម មុខរបរ និងការងារតូចតាចនៅក្នុងសេដ្ឋកិច្ចក្រៅប្រព័ន្ធ មានការព្រួយបារម្ភ។
លោក ហ៊ុន ម៉ាណែត បានបញ្ជាក់ថា«រាជរដ្ឋាភិបាលនឹងផ្តល់អាទិភាពខ្ពស់បំផុតចំពោះប្រជាពលរដ្ឋដែលស្ថិតនៅក្នុងសេដ្ឋកិច្ចក្រៅប្រព័ន្ធ។ ក្នុងគោលដៅនេះ រាជរដ្ឋាភិបាលបាននិងកំពុងរៀបចំយុទ្ធសាស្ត្រជាតិស្តីពីការអភិវឌ្ឍសេដ្ឋកិច្ចក្រៅប្រព័ន្ធឆ្នាំ២០២៣-២០២៨ ដែលនឹងត្រូវឱ្យអនុវត្តក្នុងពេលឆាប់ៗខាងមុខ ដើម្បីបង្កលក្ខណៈងាយស្រួល ព្រមទាំងផ្តល់ប្រយោជន៍ថែបំប៉ន និងលើកកម្ពស់ការយល់ដឹងដល់អ្នកប្រកបអាជីវកម្ម មុខរបរ និងការងារ ដែលស្ថិតនៅក្នុងសេដ្ឋកិច្ចក្រៅប្រព័ន្ធ»។
បើតាមសេចក្តីសម្រេចរបស់រដ្ឋាភិបាល អាជីវកម្មខ្នាតតូចដែលត្រូវលើកលែង មានដូចជាជាងគំនូរ កាត់សក់ អ៊ុតសក់ លម្អក្រចក អាជីវកម្មលក់សម្ភារកីឡា ភោជនីយដ្ឋាន និងអាហារដ្ឋានក្នុងស្រុក តូបលក់អាហារ ហាងលក់គុយទាវ កាហ្វេ ម៉ូតូឌុបទេសចរណ៍ ម៉ូតូជួលទេសចរណ៍ សិប្បកម្មផលិតជើងតាង ពាង លូ ឥដ្ឋការ៉ូ ធ្វើទៀន ធូប សេវាកម្ម
ជួសជុលគ្រឿងអគ្គិសនីអេឡិចត្រូនិក លាងរថយន្ត និងម៉ូតូជាដើម។
ប្រធានសមាគមឯករាជ្យនៃសេដ្ឋកិច្ចក្រៅប្រព័ន្ធ លោក វន់ ពៅ ថ្លែងថាសេចក្តីសម្រេចរបស់រដ្ឋាភិបាលគឺជាការអន្តរាគមន៍ត្រឹមត្រូវ និងត្រូវពេលវេលាខណៈប្រាក់ចំណូលរបស់ប្រជាពលរដ្ឋកំពុងតែធ្លាក់ចុះ។ លោកបន្តថាបើសិនរដ្ឋគ្រាន់តែចង់ឱ្យអ្នកធ្វើអាជីវកម្មសេដ្ឋកិច្ចក្រៅប្រព័ន្ធគ្រាន់តែចុះបញ្ជី ដើម្បីងាយស្រួលក្នុងការគ្រប់គ្រង ដោយមិនតម្រូវឱ្យបង់ប្រាក់នោះ វាគឺជារឿងល្អមួយ។
លោកប្រាប់វីអូអេនាថ្ងៃព្រហស្បតិ៍នេះថា៖ «ខ្ញុំគិតថាគ្រាន់តែចុះបញ្ជីហើយមិនបាច់បង់ពន្ធ ហើយមិនអស់លុយកាក់ ឬរដ្ឋចុះបញ្ជីហ្រ្វីជូនពលរដ្ឋ គឺល្អវិញ! តែបើចុះសុំច្បាប់បង់ពន្ធបង់អីទៀតវា រឿងកាន់តែធ្ងន់ធ្ងរ ដែលជាចំណុចមួយ យើងលើកឡើងពីការព្រួយបារម្ភផងដែរ»។
បើតាមលោក វន់ ពៅ អ្នកប្រកបអាជីវកម្មសេដ្ឋកិច្ចក្រៅប្រព័ន្ធ សព្វថ្ងៃនេះ ប្រឈមបញ្ហាច្រើន ដូចជាបំណុលធនាគារ ចំណូលធ្លាក់ចុះ ទំនិញហូបចុកនៅលើទីផ្សារឡើងថ្លៃ និងអ្នកខ្លះទៀតបានបង្ខំចិត្តប្តូរមុខរបរ។
លោកបន្ថែមថា៖ «អ្នកខ្លះគាត់ប្រកបមុខរបរសេដ្ឋកិច្ចក្រៅប្រព័ន្ធ ប្តូរមុខរបរ អ្នកខ្លះទៅធ្វើសំណង់ អ្នកខ្លះទៅរើសអេតចាយ អ្នកខ្លះទៅចំណាកស្រុកទាំងប្រថុយទៅប្រទេសគេជិតខាងអាហ្នឹងគឺជារឿងមួយដែលពិតប្រាកដអ៊ីចឹងមែន។ អ្នកខ្លះជួលផ្ទះគេស្នាក់នៅ បង្ខំប្រពន្ធឱ្យទៅនៅស្រុកកំណើតដេកលើរម៉កអីទាំងយប់ទាំងថ្ងៃអ៊ីចឹង វាគឺជាស្ថានភាពមួយដែលរដ្ឋគួរតែប្រមើមើលចំណុចនេះឱ្យបានសព្វជ្រុងជ្រោយផងដែរ»។
លោក វន់ ពៅ បន្ថែមថាការធ្លាក់ចុះចំណូលរបស់ប្រជាពលរដ្ឋ គឺចាប់តាំងពីការរាតត្បាតជំងឺកូវីដ១៩មកម្ល៉េះ។
គួរបញ្ជាក់ថាកាលពីឆ្នាំ២០១៦ ក្រសួងមហាផ្ទៃនិងក្រសួងសេដ្ឋកិច្ចបានចេញប្រកាសអន្តរក្រសួងរួមមួយ ដោយអនុញ្ញាតឱ្យរដ្ឋបាលថ្នាក់ក្រោមជាតិអនុវត្តការប្រមូលចំណូលពីកម្រៃសេវារដ្ឋបាលរបស់ខ្លួន ដើម្បីជាគុណប្រយោជន៍ដល់ថវិការបស់រដ្ឋបាលថ្នាក់ក្រោមជាតិ៕