រដ្ឋអាជ្ញាបាននិយាយកាលពីថ្ងៃព្រហស្បតិ៍ម្សិលមិញថា ប៉ូលិសអាល្លឺម៉ង់បានចាប់ខ្លួនបុរសជនជាតិស៊ីរីម្នាក់ពីបទឧក្រិដ្ឋកម្មប្រឆាំងមនុស្សជាតិ និងឧក្រិដ្ឋកម្មសង្គ្រាម រួមទាំងការបង្ខាំងមនុស្ស ចំពោះការចោទប្រកាន់ថា បុរសនេះបានចូលរួមក្នុងការបង្រ្កាបដ៏ឃោរឃៅលើក្រុមប្រឆាំងរដ្ឋាភិបាល។ នេះបើយោងតាមទីភ្នាក់ងារសារព័ត៌មានបារាំង AFP។
ការិយាល័យរដ្ឋអាជ្ញាសហព័ន្ធបាននិយាយក្នុងសេចក្តីថ្លែងការណ៍មួយថា ជនសង្ស័យរូបនេះដែលត្រូវបានបង្ហាញឈ្មោះត្រឹមថា Ahmad H ស្របតាមបទដ្ឋានច្បាប់អាល្លឺម៉ង់ ត្រូវបានឃាត់ខ្លួននៅថ្ងៃទី ២៦ ខែកក្កដា នៅទីក្រុង Bremen ភាគខាងជើង។ បុរសនេះត្រូវបានបញ្ជូនទៅឃុំខ្លួននៅថ្ងៃព្រហស្បតិ៍ម្សិលមិញ។
បុរសនេះត្រូវបានចោទថាបានធ្វើជាមេដឹកនាំក្រុមជីវពល shabiha គាំទ្ររដ្ឋាភិបាលក្នុងអំឡុងសង្គ្រាមស៊ីវិលនៅស៊ីរីពីឆ្នាំ ២០១២ ដល់ ២០១៥។ ក្រុមនេះស្ថិតនៅក្រុងដាម៉ាស ដោយមានភារកិច្ចជួយកម្ទេចពួកប្រឆាំង។
ក្រុមជីវពលនេះ បានដាក់ប៉ុស្តិ៍ត្រួតពិនិត្យ «ដោយចាប់មនុស្សតាមទំនើងចិត្តដើម្បីជំរិតទារប្រាក់ពីពួកគេឬសមាជិកគ្រួសារពួកគេ និងប្រព្រឹត្តអំពើបង្ខំឲ្យធ្វើការ ឬធ្វើទារុណកម្ម»។ នេះបើតាមរដ្ឋអាជ្ញា។
ក្រុមរដ្ឋអាជ្ញាបន្ថែមថា ពួកអ្នកប្រយុទ្ធនេះក៏បានប្លន់ផ្ទះរបស់អ្នកប្រឆាំងរដ្ឋាភិបាល លក់របស់របរដែលប្លន់បាននោះ ហើយទុកលុយខ្លួនឯង។
បុរសឈ្មោះ Ahmad H ដែលប្រភពសន្តិសុខនិយាយថា មានអាយុ ៤៦ ឆ្នាំ ត្រូវបានចោទប្រកាន់ថាបានចូលរួម «ដោយផ្ទាល់ក្នុងការរំលោភបំពានជនស៊ីវិល»។ ប្រភពនិយាយថា ក្នុងហេតុការណ៍មួយនៅឆ្នាំ ២០១៣ បុរសរូបនេះបានបញ្ជាឲ្យមនុស្សរបស់ខ្លួន «ធ្វើបាបបុរសម្នាក់ដែលត្រូវឃាត់ខ្លួនរាប់ម៉ោងដោយប្រើបំពង់ជ័រ»។
ចន្លោះខែធ្នូ ឆ្នាំ ២០១២ និងដើមឆ្នាំ ២០១៥ បុរសនេះត្រូវបានចោទប្រកាន់ថាបានចាប់ខ្លួនក្រុមមនុស្សពី ២៥ ទៅ ៣០ នាក់ចំនួនពីរដង ហើយបង្ខំពួកគេឲ្យលីបាវខ្សាច់ទៅកន្លែងប្រយុទ្ធគ្នាដែលនៅក្បែរនោះ ដោយមនុស្សទាំងនោះប្រឈមនឹងការបាញ់គ្នាទៅវិញទៅមក ហើយត្រូវគេបង្អត់អាហារនិងទឹក ខណៈទទួលរងការវាយដំផងដែរ។
គេមិនទាន់ច្បាស់ទេថា តើបុរសឈ្មោះ Ahmad H នេះ ចូលក្នុងប្រទេសអាល្លឺម៉ង់ពេលណា ឬថាតើសាក្សីណាបានរាយការណ៍អំពីបុរសនេះប្រាប់ទៅអាជ្ញាធរ និងមានភស្តុតាងអ្វីប្រឆាំងបុរសរូបនេះ។ អ្នកនាំពាក្យការិយាល័យរដ្ឋអាជ្ញាសហព័ន្ធបដិសេធមិនផ្តល់សេចក្តីលម្អិតបន្ថែមទៀតទេ៕