មេដឹកនាំយោធាពីប្លុកប្រទេស១៥ក្នុងបណ្តារដ្ឋនៅអាហ្វ្រិកខាងលិច ហៅកាត់ថា ECOWAS គ្រោងនឹងពិភាក្សាគ្នានៅថ្ងៃពុធនេះ ក្នុងរដ្ឋធានី អាប៊ូហ្សា ប្រទេសនីហ្សេរីយ៉ា អំពីរដ្ឋប្រហារក្នុងប្រទេសនីហ្សេកាលពីសប្តាហ៍មុន ខណៈប្រទេសជាច្រើននៅអឺរ៉ុប ខ្នះខ្នែងជម្លៀសពលរដ្ឋរបស់ពួកគេចេញពីប្រទេសនីហ្សេ។
សហគមន៍ ECOWAS បាននិយាយក្នុងសេចក្តីថ្លែងការណ៍ខ្លីមួយថាគណៈកម្មការប្រមុខការពារជាតិនឹងពិភាក្សា«ស្ថានការណ៍នយោបាយនៅសាធារណរដ្ឋនីហ្សេ» ក្នុងកិច្ចប្រជុំរបស់ពួកគេរហូតដល់ថ្ងៃសុក្រ។
ប្រតិភូរបស់ ECOWAS គ្រោងនឹងទៅដល់រដ្ឋធានីរបស់នីហ្សេនៅថ្ងៃពុធនេះដើម្បីពិភាក្សាជាមួយនឹងមេដឹកនាំរដ្ឋប្រហារ។
ប្រទេសបារាំង គ្រោងនឹងបន្តដំណើរការជើងយន្តហោះជម្លៀសនៅថ្ងៃពុធនេះ ក្រោយពីជើងយន្តហោះដំបូងបានចុះចតក្នុងទីក្រុងប៉ារីសនៅព្រឹកថ្ងៃពុធ។
ក្រសួងការបរទេសបារាំង បាននិយាយថាមនុស្សជាង៣៥០នាក់ ស្ថិតនៅក្នុងជើងហោះហើរដំបូងហើយ ភាគច្រើនជាពលរដ្ឋបារាំង។ ក្រសួងការបរទេសបារាំង បានប្រាប់ក្រុមអ្នកយកព័ត៌មានថាអ្នកដំណើរទាំងនោះរួមមានពលរដ្ឋនីហ្សេ ព័រទុយហ្គាល់ បែលហ្សិក អេត្យូពី លីបង់ អាល្លឺម៉ង់ កាណាដា ឥណ្ឌា អូស្ត្រាលីនិងសហរដ្ឋអាមេរិក។
រដ្ឋមន្ត្រីការបរទេសអ៊ីតាលី លោក Antonio Tajani បានចែកចាយរូបថតយន្តហោះកងទ័ពអាកាសអ៊ីតាលីមួយដែលលោកនិយាយថាបានចុះចតនៅព្រឹកថ្ងៃពុធនេះ ដោយមានពលរដ្ឋអ៊ីតាលីដែលបានចាកចេញពីនីហ្សេ។
ក្រសួងការបរទេសសហរដ្ឋអាមេរិក បាននិយាយថារដ្ឋមន្ត្រីការបរទេសអាមេរិកលោក Antony Blinken បាននិយាយតាមទូរស័ព្ទកាលពីថ្ងៃអង្គារជាមួយប្រធានាធិបតីនីហ្សេ លោក Mohamed Bazoum ដែលត្រូវបណ្តេញចេញពីតំណែងដោយក្រុមយោធា។
លោក Blinken បានសម្តែង«ការគាំទ្រឥតងាករេ»ចំពោះលោក Bazoum និងលទ្ធិប្រជាធិបតេយ្យនៅនីហ្សេ។ នេះបើយោងតាមក្រសួងការបរទេសសហរដ្ឋអាមេរិក។
ព័ត៌មានខ្លះក្នុងសេចក្តីរាយការណ៍នេះ មានប្រភពពីទីភ្នាក់ងារសារព័ត៌មាន The Associated Press, Agence France-Presse និង Reuters។
