មនុស្សយ៉ាងហោចណាស់ក៏៤២នាក់ដែរ ភាគច្រើនជាអ្នកចូលនិវត្តន៍ ត្រូវបានគេជឿជាក់ថា បានស្លាប់នៅក្នុងគ្រោះថ្នាក់តាមផ្លូវមួយនៅជិតទីក្រុង Bordeaux នៃប្រទេសបារាំង នៅក្នុងអ្វីដែលត្រូវបានគេហៅថា ជាគ្រោះថ្នាក់ចរាចរណ៍ដ៏អាក្រក់មួយក្នុងរយៈពេល៣ទសវត្សរ៍របស់បារាំង។
ក្រុមមន្រ្តីនិយាយថា រថយន្តដឹកទំនិញបានបុករថយន្តក្រុងដែលដឹកអ្នកដំណើរយ៉ាងច្រើននៅលើផ្លូវកោងយ៉ាងខ្លាំងនៅជិតភូមិ Puisseguin ហើយបណ្តាលឲ្យរថយន្តទាំង២គ្រឿងនោះឆេះ។
មនុស្ស៨នាក់ត្រូវបានរាយការណ៍ថា បានគេចផុតពីអណ្តាតភ្លើងនេះ ហើយក្រុមមន្រ្តីជួយសង្គ្រោះបន្ទាន់រាប់សិបនាក់ទៀតបានប្រមូលផ្តុំគ្នានៅកន្លែងនោះ។
លោកប្រធានាធិបតីបារាំង Francois Hollande បានធ្វើអត្ថាធិប្បាយពីគ្រោះថ្នាក់នេះខណៈដែលលោកធ្វើដំណើរក្នុងប្រទេសក្រិក ដោយនិយាយថា រដ្ឋាភិបាលត្រូវដោះស្រាយអ្វីដែលលោកប្រធានាធិបតីហៅថា សោកនាដកម្មដ៏គួរឲ្យរន្ធត់។ លោកប្រធានាធិបតីបារាំងមិនបានច្រានចោលពីការកាត់បន្ថយរយៈពេលនៃដំណើរបំពេញទស្សនកិច្ចដើម្បីវិលត្រឡប់ទៅកាន់ប្រទេសបារាំងវិញនោះទេ។ ក្នុងខណៈនោះដែរ លោកនាយករដ្ឋមន្រ្តី Manuel Valls លោករដ្ឋមន្រ្តីក្រសួងមហាផ្ទៃ Bernard Cazaneuve និងលោករដ្ឋមន្រ្តីក្រសួងដឹកជញ្ជូន Alain Vidal បានធ្វើដំណើរទៅកន្លែងកើតហេតុដែលស្ថិតនៅចម្ងាយប្រហែល៥០គីឡូម៉ែត្រខាងកើតទីក្រុង Bordeaux។
ការបុកគ្នានេះត្រូវបានគេជឿជាក់ថា ជាគ្រោះថ្នាក់ដ៏អាក្រក់បំផុតចាប់តាំងពីឆ្នាំ១៩៨២នៅពេលមានមនុស្ស៥៣នាក់ រួមទាំងកូនក្មេង៤៤នាក់ផង បានស្លាប់នៅក្នុងការបុករថយន្តក្រុងនៅភាគខាងកើតនៃប្រទេសបារាំង៕