ក្រោយមានមន្ទិលពាក់ព័ន្ធនឹងការធ្វើអត្តឃាតដោយចងករភ្ជាប់នឹងចម្រឹងបង្អួចរបស់នារីរូបស្អាតម្នាក់កាលពីចុងខែមករា ឆ្នាំ២០១៨កន្លងទៅ នៅសប្តាហ៍នេះ តុលាការបានចេញដីកាឲ្យនាំខ្លួនអតីតអភិបាលខេត្តតាកែវ និងជនសង្ស័យផ្សេងទៀត បន្ទាប់ពីសមត្ថកិច្ចរកឃើញភស្តុតាងថ្មីថា នារីនោះបានស្លាប់ដោយថាអំពើឃាតកម្ម។
ព្រះរាជអាជ្ញារងអមសាលាដំបូងរាជធានីភ្នំពេញនាល្ងាចថ្ងៃចន្ទនេះ កំពុងបន្តសួរចម្លើយលោក ឡាយ វណ្ណៈ អតីតអភិបាលខេត្តតាកែវ ពាក់ព័ន្ធនឹងដំណើររឿងឃាតកម្មលើស្រ្តីកំណាន់ម្នាក់ ក្រោមរូបភាពអត្តឃាតក្នុងផ្ទះមួយនាខេត្តតាកែវ។ នេះបើតាមការបញ្ជាក់របស់អ្នកនាំពាក្យសាលាដំបូងរាជធានីភ្នំពេញ។
លោក លី សុផាណា អ្នកនាំពាក្យតុលាការភ្នំពេញ ប្រាប់អ្នកសារព័ត៌មានតាមរយៈសារអេឡិចត្រូនិចតេលេក្រាម នាល្ងាចថ្ងៃចន្ទនេះថា តុលាការកំពុងបន្តការសាកសួរលោក ឡាយ វណ្ណៈ អតីតអភិបាលខេត្តតាកែវ ពាក់ព័ន្ធនឹងដំណើររឿងឃាតកម្ម។
លោកបញ្ជាក់ក្នុងន័យដើមថា៖ «អយ្យការកំពុងសួរចម្លើយលើឈ្មោះ ឡាយ វណ្ណៈ និងពិនិត្យឯកសារភស្តុតាងនៅក្នុងសំណុំរឿង»។
លោក ឡាយ វណ្ណៈ អតីតអភិបាលខេត្តតាកែវ ត្រូវបានឃាត់ខ្លួនកាលពីថ្ងៃអាទិត្យ តាមរយៈដីការបស់សាលាដំបូងរាជធានីភ្នំពេញ ដោយសង្ស័យថា បានសម្លាប់ស្រ្តីកំណាន់ម្នាក់ ឈ្មោះ ចេវ សុវឌ្ឍនា និងបានរៀបចំគម្រោងថាស្រ្តីនោះធ្វើអត្តឃាតដោយចងកសម្លាប់ខ្លួន។ ការឃាត់ខ្លួនលោក ឡាយ វណ្ណៈ ធ្វើឡើងក្រោយព្រះមហាក្សត្រចេញព្រះរាជក្រឹត្យបញ្ចប់តំណែងលោកជាអភិបាលខេត្តតាកែវ កាលពីថ្ងៃច័ន្ទ សប្តាហ៍មុន។
ដីកាបញ្ជាឲ្យចូលខ្លួនរបស់តំណាងអយ្យការ សាលាដំបូងរាជធានីភ្នំពេញ ដែលចុះហត្ថលេខាដោយលោក សៀង សុខ ព្រះរាជអាជ្ញារង កាលពីថ្ងៃអាទិត្យបានបញ្ជាឲ្យនាំខ្លួនលោក ឡាយ វណ្ណៈ ដើម្បីសាកសួរ។
ដីកានោះត្រូវបានសរសេរក្នុងន័យដើមថា៖
«បញ្ជាឲ្យកម្លាំងមានសមត្ថកិច្ចនាំខ្លួនបុគ្គលនាម ឡាយ វណ្ណៈ អាយុ៤៥ឆ្នាំ មុខរបរមន្ត្រីក្រសួងមហាផ្ទៃ (អតីតអភិបាលខេត្តតាកែវ..)មកបង្ហាញខ្លួននៅនាយកដ្ឋាននគរបាលព្រហ្មទណ្ឌនៃអគ្គស្នងការនគរបាលជាតិឲ្យបានមុនថ្ងៃទី២០ ខែមេសា ឆ្នាំ ២០១៨ ដើម្បីសាកសួរពីដំណើររឿងឃាតកម្មកាលពីថ្ងៃទី២៦ ខែមករា ឆ្នាំ២០១៨ នៅចំណុចផ្ទះជួលក្នុងភូមិផ្សារតាកោ សង្កាត់រកាក្នុង ក្រុងដូនកែវ ខេត្តតាកែវ»។
នាយឧត្តមសេនីយ៍ ខៀវ សុភ័គ អ្នកនាំពាក្យក្រសួងមហាផ្ទៃប្រាប់ VOA នារសៀលថ្ងៃចន្ទនេះថា ការឈានដល់មានការឃាត់ខ្លួនលោក ឡាយ វណ្ណៈ ធ្វើឡើងបន្ទាប់ពីសមត្ថកិច្ចរកឃើញចំណុចសង្ស័យជាច្រើនថា ការស្លាប់របស់ស្រ្តីឈ្មោះ ចេវ សុវឌ្ឍនា គឺជាអំពើឃាតកម្ម មិនមែនជាអំពើអត្តឃាតនោះទេ។
លោកមានប្រសាសន៍ថា៖
«តាមការពិនិត្យមើលរបស់រូបភាពទៅ យើងឃើញថាវាដូចជាមិនមែន ការធ្វើអត្តឃាតទេ ទី១។ ហើយស្លាកស្នាមរបស់នារីរងគ្រោះហ្នឹងគាត់មានស្លាកស្នាម ហើយបើអត្តឃាតក៏វាមានលក្ខណៈពិសេសៗរបស់ការធ្វើអត្តឃាតហ្នឹង ដូចជានារីចងករវាត្រូវមានឈាមធ្លាក់មកចុងដៃ វាអត់មានអាហ្នឹង។ អញ្ចឹងយើងក៏ដាក់ជាចំណុចសង្ស័យដែរ»។
អ្នកនាំពាក្យរូបនេះបន្ថែមថា ក្នុងសំណុំរឿងនេះសមត្ថកិច្ចបានឃាត់ខ្លួនជនសង្ស័យចំនួន៥រូបផ្សេងទៀត ដែលក្នុងនោះមានទាំងបងប្រុសរបស់លោក ឡាយ វណ្ណៈ ដែលជាស្នងការរងខេត្តតាកែវ គឺលោក ឡាយ ណារិទ្ធ ផងដែរ។
នៅមុនពេលចាប់ខ្លួន លោក ឡាយ វណ្ណៈ បានបង្ហោះសារភ្ជាប់នឹងរូបថតស្និទ្ធស្នាលជាច្រើនសន្លឹកជាមួយអ្នកស្រី ចេវ សុវឌ្ឍនា លើគណនី Facebook របស់លោក ដោយទទួលស្គាល់ថា លោកពិតជាមានទំនាក់ទំនងស្នេហាជាមួយនឹងស្ត្រីឈ្មោះ ចេវ សុវឌ្ឍនា ពិតមែន។ ទោះយ៉ាងណា លោកបានបដិសេធថាលោក និងបងប្រុសរបស់លោកមិនបានប្រព្រឹត្តអំពើមនុស្សឃាតនោះទេ ដោយថា ការស្លាប់របស់អ្នកស្រី ចេវ សុវឌ្ឍនា គឺមកពីការធ្វើអត្តឃាត ក្រោយលោកសុំផ្តាច់ទំនាក់ទំនងគ្នា។
លោក ឡាយ វណ្ណៈ សរសេរក្នុងន័យដើមថា៖
«ខ្ញុំសូមបញ្ជាក់អះអាងថា រូបខ្ញុំ និងប្អូនស្រី ចេវ សុវឌ្ឍនា មានទំនាក់ទំនងស្នេហាស្រឡាញ់គ្នាជាមួយគាត់ពិតប្រាកដមែនក្នុងរយៈពេលជាង ១ឆ្នាំកន្លងមកនេះ! ក្រោយមកខ្ញុំបានសុំកាត់ផ្តាច់ទំនាក់ទំនងជាមួយគាត់ដែលធ្វើឲ្យគាត់ខឹងសម្បានឹងខ្ញុំ រហូតដល់គាត់គិតខ្លីធ្វើអត្តឃាតខ្លួនឯង»។
លោកបានសរសេរបន្តទៀតថា៖
«ប៉ុន្តែខ្ញុំសូមបដិសេធទាំងស្រុងនូវរាល់ការចោទប្រកាន់ដែលថា រូបខ្ញុំ និងបងប្រុសខ្ញុំបានសម្លាប់ប្អូនស្រី ចេវ សុវឌ្ឍនា! ខ្ញុំ និងបងប្រុសខ្ញុំ ពុំមានចិត្តបាបសាហាវព្រៃផ្សៃសម្លាប់គាត់ទេ»។
លោក សន ជ័យ នាយកប្រតិបត្តិនៃសម្ព័ន្ធគណនេយ្យភាពសង្គមកម្ពុជា ប្រាប់ VOA ថា សំណុំរឿងដែលឈានដល់មានការរៀបចំពីអំពើឃាតកម្ម ទៅជាអំពើអត្តឃាតនេះ បានបង្ហាញពីទំនាស់ផលប្រយោជន៍ក្នុងការដឹកនាំរដ្ឋបាល។ លោកបន្ថែមថា ការណ៍នេះនឹងធ្វើឲ្យមានផលប៉ះពាល់យ៉ាងខ្លាំងដល់សង្គមកម្ពុជា ប្រសិនបើរដ្ឋាភិបាលមិនមានឆន្ទៈក្នុងការដោះស្រាយប្រព័ន្ធនៃការដឹកនាំឲ្យបានត្រឹមត្រូវ។
លោកមានប្រសាសន៍ថា៖
«ទំនាស់ផលប្រយោជន៍វាប៉ះពាល់ទៅដល់ការអនុវត្តច្បាប់ ហើយវាក៏ជាឬសគល់មួយដែលនាំឲ្យមាននិទណ្ឌភាពដែរ។ អញ្ចឹងការដោះស្រាយបញ្ហានិទណ្ឌភាព វាទាល់តែមានការដោះស្រាយនូវបញ្ហាទំនាស់ផលប្រយោជន៍ដែរ នៅក្នុងអំណាចក្នុងការគ្រប់គ្រងរដ្ឋហ្នឹង។ ដូច្នេះការរៀបចំប្រព័ន្ធដឹកនាំរដ្ឋ ទាំងថ្នាក់ជាតិ រហូតដល់រដ្ឋបាលថ្នាក់ក្រោមជាតិហ្នឹង ត្រូវតែគិតគូរអំពីរឿងទំនាស់ផលប្រយោជន៍នេះជាចម្បង»។
លោក សន ជ័យ បន្ថែមថា ទំនាស់ផលប្រយោជន៍ដែលបង្កឲ្យមានការបិទបាំង ឬក្លែងភស្តុតាងពីឃាតកម្ម ទៅជាអំពើអត្តឃាតនៅកម្ពុជានេះ ក៏ធ្លាប់កើតមានកន្លងមកដែរ ដោយលោកថា ក្នុងនោះមានករណីឃាតកម្មលើគ្រួសាររបស់ជនជាតិបារាំងមួយគ្រួសារ ដែលត្រូវបានគេសម្លាប់ដាក់រថយន្ត និងរុញរថយន្តចូលស្រះទឹក ដើម្បីបម្លែងជារូបភាពអត្តឃាតជាដើម៕