តុលាការកូរ៉េខាងត្បូងបានកាត់ទោសលោកស្រី Park Geun-hye អតីតប្រធានាធិបតី ឱ្យជាប់ពន្ធនាគារ២៤ឆ្នាំ បន្ទាប់ពីបានរកឃើញថា លោកស្រីមានពិរុទ្ធពីបទរំលោភអំណាចនិងអំពើពុករលួយ។
នៅក្នុងសាលក្រមដែលបានផ្សាយតាមទូរទស្សន៍ជាតិ តុលាការទីក្រុងសេអ៊ូលបានផ្តន្ទាទោសលោកស្រី Park Geun-hye ពីបទស៊ីសំណូកការជំរិត ការរំលោភបំពានអំណាច និងការចោទប្រកាន់ដទៃទៀត។ ចៅក្រមតុលាការបាននិយាយថា វាមិនអាចជៀសរួចទេដែលថា អតីតប្រធានាធិបតី«ត្រូវទទួលខុសត្រូវយ៉ាងតឹងរ៉ឹងចំពោះឧក្រិដ្ឋកម្មរបស់លោកស្រី ប្រសិនបើគ្រាន់តែដើម្បីការពារព្រឹត្តិការណ៍អកុសលរបស់ប្រធានាធិបតីដែលបំពានអំណាចដែលផ្តល់ដោយប្រជាជននិងបង្កភាពចលាចលក្នុងកិច្ចការរដ្ឋ»។
រួមជាមួយការកាត់ទោសជាប់គុកនេះ លោកស្រី Park Geun-hye ត្រូវបានពិន័យជាប្រាក់ជាង១៦លានដុល្លារ។ អតីតមេដឹកនាំកូរ៉េខាងត្បូងមានពេលមួយសប្តាហ៍ដើម្បីប្តឹងឧទ្ធរណ៍សាលក្រម។ លោកស្រី Park Geun-hye និយាយការពារជានិច្ចថា លោកស្រីគ្មានកំហុសទេដោយអះអាងថា លោកស្រីគឺជាជនរងគ្រោះនៃការសងសឹកខាងនយោបាយ។ ព្រះរាជអាជ្ញាបានទាមទារឱ្យកាត់ទោសលោកស្រីជាប់គុករយៈពេល៣០ឆ្នាំ។
លោកស្រី Park Geun-hye ត្រូវបានគេចោទប្រកាន់ពីបទឃុបឃិតជាមួយអ្នកស្រី Choi Soon-sil មនុស្សជិតស្និទ្ធយូរអង្វែងរបស់លោកស្រី ក្នុងការបង្ខំឱ្យអាជីវកម្មជាច្រើនបរិច្ចាគថវិកាសរុបចំនួន៧២លានដុល្លារសម្រាប់ការចាប់ផ្តើមមូលនិធិពីរដែលគ្រប់គ្រងដោយអ្នកស្រីChoi Soon-sil ។
ស្ត្រីពីរនាក់នេះក៏ត្រូវបានកាត់ទោសពីបទទទួលសំណូកពីក្រុមហ៊ុនមួយចំនួន។ លោកស្រី Park Geun-hye ត្រូវបានដកចេញពីតំណែងកាលពីដើមឆ្នាំមុន បន្ទាប់ពីការប្រមូលផ្តុំគ្នាដ៏ធំសម្បើមដែលមានមនុស្សរាប់លាននាក់ដើរតវ៉ាតាមដងផ្លូវនៅក្នុងប្រទេសដើម្បីអំពាវនាវឱ្យលោកស្រីចេញពីតំណែង។ លោកស្រីគឺជាកូនស្រីរបស់មេដឹកនាំផ្ដាច់ការ Park Chung-hee ដែលបានគ្រប់គ្រងប្រទេសកូរ៉េខាងត្បូងពីឆ្នាំ ១៩៦១ដល់១៩៧៩៕