ឆ្មាំការពារនិងទាហានការពារព្រំដែនហ្វាំងឡង់បានចាប់ផ្តើមស្ថាបនារបាំងការពាររួម ទាំងរបាំងធ្វើពីបេតុងដោយមានដាក់លួសបន្លានៅពីលើនៅឯចំណុចឆ្លងកាត់ខ្លះនៅតាមបណ្តោយព្រំដែនដ៏វែងរបស់ប្រទេសនេះ ជាមួយរុស្ស៊ីដើម្បីធ្វើឱ្យប្រសើឡើងនូវការត្រួតត្រាជនចំណាកស្រុកដ៏ច្រើន។ នេះបើតាមពួកមន្ត្រីដែលបាននិយាយកាលពីថ្ងៃពុធម្សិលមិញ។ ហ្វាំងឡង់បាននិយាយថាខ្លួននឹងបិទចំណុចឆ្លងកាត់ ៣បន្ថែមទៀត ដោយទុកតែចំណុចឆ្លងកាត់តែមួយនៅសមុទ្រទឹកកកអាក់ទិកសម្រាប់ជនចំណាកស្រុកដែលស្វះស្វែងសុំសិទ្ធិជ្រកកោន។ នេះបើតាមសេចក្តីរាយការណ៍របស់ទីភ្នាក់ងារសារព័ត៌មាន AP។
ជនចំណាកស្រុកចំនួន៦០០នាក់ដែលមិនមានទិដ្ឋាការនិងឯកសារត្រឹមត្រូវ ភាគច្រើនមកពីតំបន់មជ្ឈិមបូព៌ានិងទ្វីបអាហ្វ្រិកបានមកដល់ប្រទេសហ្វាំងឡង់នៅខែវិច្ឆិកា បើប្រៀបធៀបទៅនឹងចំនួនតិចតួចក្នុងខែកញ្ញានិងតុលា។ ពួកអ្នកមកដល់ រួមមានជនជាតិអាហ្វហ្កានីស្ថាន អ៊ីរ៉ាក់ ស៊ីរី យ៉េមែន កេនយ៉ា ម៉ារ៉ុកនិងសូម៉ាលី។ នេះបើតាមពួកមន្ត្រីព្រំដែន។
រដ្ឋាភិបាលរុស្ស៊ីបានសម្តែងការសោកស្តាយចំពោះការសម្រេចរបស់ហ្វាំងឡង់ដើម្បីបិទចំណុចត្រួតពិនិត្យនេះហើយបានច្រានចោលការអះអាងរបស់អាជ្ញាធរហ្វាំងឡង់ថារុស្ស៊ីបានលើកទឹកចិត្តឱ្យមានជនចំណាកស្រុកដ៏ភ្លូកទឹកភ្លូកដីនៅឯព្រំដែនដើម្បីដាក់ទណ្ឌកម្មហ្វាំងឡង់ចំពោះការចូលរួមអង្គការអូតង់។
រដ្ឋាភិបាលហ្វាំងឡង់បានសម្រេចបិទចំណុចឆ្លងកាត់ព្រំដែនដ៏មមាញឹកជាមួយរុស្ស៊ីនៅក្នុងតំបន់ភាគអាគ្នេយ៍នៃប្រទេសហ្វាំងឡង់កាលពីសប្តាហ៍មុនលើការសង្ស័យនៃការធ្វើសកម្មភាពទុច្ចរិតដោយពួកមន្ត្រីព្រំដែនរបស់រុស្ស៊ី។
អ្នកនាំពាក្យក្រសួងការបរទេសរុស្ស៊ីលោកស្រី Maria Zakharovaបាននិយាយកាលពីថ្ងៃពុធម្សិលមិញថាអាជ្ញាធររុស្ស៊ីប្រុងប្រៀបជាស្រេចហើយដើម្បីធ្វើការរួមគ្នាជាមួយពួកមន្ត្រីហ្វាំងឡង់ដើម្បីធ្វើឱ្យសម្រេចកិច្ចព្រមព្រៀងស្តីពីបញ្ហាព្រំដែន។ លោកស្រីបានជជែកឱ្យហេតុផលថាហ្វាំងឡង់ត្រូវតែ«បញ្ជូនការព្រួយកង្វល់របស់ខ្លួនដើម្បីធ្វើឱ្យមានដំណោះស្រាយដែលអាចទទួលយកបានដោយភាគីទាំង២ ឬទទួលបានការពន្យល់»។
នៅក្នុងការវិវត្តមួយទៀតពាក់ព័ន្ធនឹងសង្គ្រាមរុស្ស៊ីនៅអ៊ុយក្រែនគឺនៅពេលដែលពួកសមាជិកសភានៅក្នុងរដ្ឋធានីវ៉ាស៊ីនតោនថ្លឹងថ្លែងពីការបញ្ជូនប្រាក់រាប់ពាន់លានដុល្លារនៅក្នុងការគាំទ្ររបស់សហរដ្ឋអាមេរិកដល់រដ្ឋាភិបាលអ៊ុយក្រែនដើម្បីជួយប្រយុទ្ធនឹងការឈ្លានពានរបស់រុស្ស៊ីនោះ ពលរដ្ឋអាមេរិកាំងជិតពាក់កណ្តាលគិតថាអាមេរិកកំពុងចំណាយច្រើនពេកលើជំនួយដល់ប្រទេសអ៊ុយក្រែន។ នេះបើតាមការស្ទង់មតិពីមជ្ឈមណ្ឌលស្រាវជ្រាវកិច្ចការសាធារណៈរបស់ទីភ្នាក់ងារសារព័ត៌មាន AP-NORC។
មនោសញ្ចេតនាទាំងនោះដែលភាគច្រើនមកពីពួកគណបក្សសាធារណរដ្ឋ គឺបង្ហាញឲ្យឃើញការជំទាស់តវ៉ាដ៏ខ្លាំងក្នុងចំណោមពួកសមាជិកសភាអភិរក្សនិយមរបស់គណបក្សសាធារណរដ្ឋនៅវិមានសភា Capitolដែលកំពុងច្រានចោលការខំប្រឹងប្រែងពីលោកប្រធានាធិបតី Joe Biden ដើម្បីអនុម័តកញ្ចប់ជំនួយថ្មីសម្រាប់អ៊ុយក្រែនដោយពួកគេជជែកឱ្យហេតុផលថាប្រាក់ទាំងនោះត្រូវចំណាយសម្រាប់បញ្ហាអាទិភាពនៅក្នុងប្រទេសវិញ។
ប៉ុន្តែការជំទាស់ប្រឆាំងដល់ជំនួយបានធ្លាក់ចុះបន្តិច បើប្រៀបធៀបកាលពីមួយខែមុននៅក្នុងការស្ទង់មតិរបស់ AP-NORC ។ ឥឡូវនេះ ៤៥ភាគរយនិយាយថារដ្ឋាភិបាលសហរដ្ឋអាមេរិកកំពុងចំណាយច្រើនពេកលើជំនួយលើប្រទេសអ៊ុយក្រែននៅក្នុងសង្គ្រាមប្រឆាំងនឹងរុស្ស៊ី បើប្រៀបធៀបចំនួន៥២ភាគរយនៅក្នុងខែតុលា។ ការផ្លាស់ប្តូរនេះទំនងកើតមានឡើងភាគច្រើនមកពីពួកគណបក្សសាធារណរដ្ឋដោយឥឡូវនេះ៥៩ភាគរយនិយាយថាមានការចំណាយច្រើនពេកលើជំនួយអ៊ុយក្រែន ក៏ប៉ុន្តែ ចំនួននេះបានធ្លាក់ចុះពីចំនួន៦៩ភាគរយនៅក្នុងខែតុលា។
ទោះជាយ៉ាងណាក៏ដោយ ការបន្តជំទាស់ប្រឆាំងរបស់ពួកគណបក្សសាធារណរដ្ឋដល់ជំនួយអ៊ុយក្រែននៅតែខ្លាំង៕