ក្រសួងការពារជាតិនៃប្រទេសរុស្ស៊ី បាននិយាយនៅថ្ងៃអង្គារថា ខ្លួនបានបញ្ជៀសការវាយប្រហារដោយដ្រូនរបស់អ៊ុយក្រែនលើសមុទ្រខ្មៅ និងឧបទ្វីប Crimea។
ក្រសួងការពារជាតិរុស្ស៊ីថា កងការពារដែនអាកាសរបស់រស្ស៊ីបានបំផ្លាញដ្រូនចំនួន៩គ្រឿង ហើយបានទប់ស្កាត់ដ្រូន៨គ្រឿងទៀតដោយវិធីអេឡិចត្រូនិក។
លោក Mikhail Razvozhayev អភិបាលក្រុង Sevastopol ដែលរុស្ស៊ីបានលើកបន្តុបនោះ បាននិយាយលើបណ្តាញសង្គម Telegram ថា បំណែកដ្រូនដែលធ្លាក់ បានធ្វើឱ្យមនុស្សម្នាក់រងរបួស។
នៅពេលជាមួយគ្នានេះ លោកប្រធានាធិបតី Volodymyr Zelenskyy នៃប្រទេសអ៊ុយក្រែន បាននិយាយកាលពីថ្ងៃចន្ទ ក្នុងសុន្ទរកថាតាមវីដេអូប្រចាំពេលរាត្រីរបស់លោកថា វាជាការ«មិនទទួលខុសត្រូវទាំងស្រុង» ក្នុងការនិយាយអំពីការបោះឆ្នោតក្នុងប្រទេសអ៊ុយក្រែន ក្នុងអំឡុងពេលសង្រ្គាម។ លោកបានអំពាវនាវឱ្យមានការសាមគ្គីគ្នា ដើម្បីជៀសវៀងការពិភាក្សារឿងនយោបាយដែលមិនបានការ។
លោក Zelenskyy បាននិយាយថា ការផ្តោតទៅលើការប្រឈមផ្នែកយោធាជារឿងសំខាន់ចាំបាច់ក្រោមច្បាប់អាជ្ញាសឹកដែលកំពុងចូលជាធរមានក្នុងប្រទេសអ៊ុយក្រែន ការបោះឆ្នោតត្រូវហាមឃាត់ ប៉ុន្តែលោក Zelenskyy បានពិចារណាថាតើគួរប្រើប្រាស់មាត្រាពិសេសដើម្បីរៀបចំការបោះឆ្នោត ដែលមានរួមទាំងការផ្លាស់ប្តូរមួយក្នុងច្បាប់ និងក្នុងជំនួយបរទេស ដើម្បីយកទៅចាយវាយក្នុងដំណើរការបោះឆ្នោតឬទេ។
មានការអំពាវនាវមួយចំនួនពីបរទេស រួមទាំងពីសមាជិកព្រឹទ្ធសភាសហរដ្ឋអាមេរិក ខាងគណបក្សសាធារណរដ្ឋ គឺលោក Lindsey Graham ដែលចង់ឱ្យមានការបោះឆ្នោត ដើម្បីបង្ហាញជាភស្តុតាងថាមានកំណែទម្រង់នៅក្នុងស្ថាប័នប្រជាធិបតេយ្យរបស់អ៊ុយក្រែន៕
ព័ត៌មានខ្លះសម្រាប់សេចក្ដីរាយការណ៍នេះត្រូវបានដកស្រង់មកពីទីភ្នាក់ងារសារព័ត៌មាន AP ទីភ្នាក់ងារសារព័ត៌មាន Reuters និងទីភ្នាក់ងារសារព័ត៌មាន AFP។
