កាលពីថ្ងៃព្រហស្បតិ៍ សហរដ្ឋអាមេរិកបានចាត់វិធានការថ្មីៗប្រឆាំងនឹងរដ្ឋាភិបាលក្រុងមូស្គូដោយសារសង្គ្រាមនៅអ៊ុយក្រែន ដោយសំដៅលើសមត្ថភាពថាមពលក្នុងពេលអនាគតរបស់រុស្ស៊ី ការគេចវេះពីការដាក់ទណ្ឌកម្មនិងដ្រូនអត្តឃាតដែលជាការគំរាមកំហែងដល់ក្រុមទាហានអ៊ុយក្រែននិងគ្រឿងឧបករណ៍នៅក្នុងការដាក់ទណ្ឌកម្មលើបុគ្គលនិងអង្គភាពរាប់រយ។ នេះបើតាមសេចក្តីរាយការណ៍របស់ទីភ្នាក់ងារសារព័ត៌មាន Reuters។
ក្រសួងការបរទេសសហរដ្ឋអាមេរិកបាននិយាយនៅក្នុងសេចក្តីថ្លែងការណ៍មួយថាវិធានការថ្មីៗបំផុតនេះសំដៅលើអង្គភាពធំមួយទាក់ទិននៅក្នុងការអភិវឌ្ឍ ប្រតិបត្តិការនិងជាអ្នកមានកម្មសិទ្ធិនៃគម្រោងធំមួយដែលគេស្គាល់ថា Artic-2 LNG។ គម្រោងនេះរំពឹងថានឹងដឹកជញ្ជូនឧស្ម័នធម្មជាតិដែលគេស្គាល់ថាឧស្ម័នធម្មជាតិរាវទៅកាន់ទីផ្សារសាកល។
រដ្ឋាភិបាលក្រុងវ៉ាស៊ីនតោនក៏បានដាក់ទណ្ឌកម្មលើដ្រូនអត្តឃាត KUB-BLA និង Lancet ដែលបានត្រូវប្រើដោយក្រុមយោធារុស្ស៊ីនៅក្នុងប្រទេសអ៊ុយក្រែន ដាក់ចូលក្នុងបញ្ជីខ្មៅនូវបណ្តាញមួយដែលក្រសួងនេះបានចោទប្រកាន់ថាបានទិញឧបករណ៍នានាសម្រាប់គាំទ្រការផលិតរបស់ដ្រូនទាំងនោះ។ រដ្ឋាភិបាលអាមេរិកក៏បានដាក់ទណ្ឌកម្មលើអ្នកបង្កើតនិងអ្នករចនាដ្រូនទាំងនេះផងដែរ។
កាលពីថ្ងៃព្រហស្បតិ៍ដែរ ក្រសួងពាណិជ្ជកម្មសហរដ្ឋអាមេរិកបានបន្ថែមអង្គភាព១៣នៅក្នុងប្រទេសរុស្ស៊ីនិងប្រទេសអ៊ូសបេគីស្ថានទៅក្នុងបញ្ជីខ្មៅគ្រប់គ្រងការដឹកជញ្ជូនទំនិញចេញក្រៅប្រទេសរបស់ខ្លួនដោយសារអង្គភាពទាំងនេះបានធ្វើផ្ទុយនឹងផលប្រយោជន៍សន្តិសុខជាតិឬផលប្រយោជន៍គោលនយោបាយការបរទេសរបស់សហរដ្ឋអាមេរិក។
សហរដ្ឋអាមេរិកក៏បានបង្ក្រាបការគេចវេះពីការដាក់ទណ្ឌកម្មនៅក្នុងប្រទេសអេមីរ៉ាតអារ៉ាប់រួម តួកគីនិងចិន ដូចដែលក្រសួងហិរញ្ញវត្ថុអាមេរិកបាននិយាយថាក្រុមហ៊ុននៅក្នុងប្រទេសទាំងនេះបន្តបញ្ជូនទំនិញមានអាទិភាពខ្ពស់អាចប្រើការបានពីរយ៉ាងទៅឱ្យរុស្ស៊ី មានរួមមានគ្រឿងផ្សំដែលរដ្ឋាភិបាលក្រុងមូស្គូពឹងពាក់លើសម្រាប់ប្រព័ន្ធអាវុធរបស់ផងខ្លួនផងដែរ។
ធនាគារ៧នៅក្នុងប្រទេសរុស្ស៊ីនិងក្រុមហ៊ុនឧស្សាហកម្មរាប់សិបក៏បានរងការដាក់ទណ្ឌកម្មដោយក្រសួងហិរញ្ញវត្ថុដែរ មានរួមក្រុមហ៊ុន Gazpromneft Catalytic Systems LLC ដែលក្រសួងហិរញ្ញវត្ថុនិយាយថាបានផលិតសារធាតុគីមីសម្រាប់ធ្វើការចម្រាញ់ប្រេងបែបទំនើបនៅក្នុងប្រទេសរុស្ស៊ី។
អាជ្ញាធរវិមានក្រឹមឡាំងបាននិយាយកាលពីថ្ងៃព្រហស្បតិ៍នៅមុនការដាក់ទណ្ឌកម្មទាំងនេះថាខ្លួនរំពឹងថាក្រុមប្រទេសលោកខាងលិចនឹងដាក់ទណ្ឌកម្មតឹងតែងជាងមុនដោយសារសង្គ្រាមនៅអ៊ុយក្រែន តែមានការយល់ឃើញច្រើនជាងមុនថាការដាក់ទណ្ឌកម្មបែបនេះធ្វើឱ្យខូចផលប្រយោជន៍ពួកប្រទេសលោកខាងលិច នៅពេលដែលសេដ្ឋកិច្ចរុស្ស៊ីសម្របសម្រួលខ្លួនបានល្អប្រសើរ៕
