សមយុទ្ធយោធាជុំចុងក្រោយបង្អស់រវាងយោធាសហរដ្ឋអាមេរិកនិងកូរ៉េខាងត្បូងត្រូវបានបញ្ចប់រួចរាល់ហើយ។ ប្រេសិតជាន់ខ្ពស់របស់សហរដ្ឋអាមេរិកសម្រាប់កិច្ចការកូរ៉េខាងជើងកំពុងស្ថិតនៅក្នុងទីក្រុងសេអ៊ូល។ អ្វីៗហាក់ដូចជាត្រូវបានគេត្រៀមរួចរាល់ដើម្បីបន្តកិច្ចចរចាថ្នាក់ការងារ ដែលត្រូវផ្អាកជាយូរមកហើយជាមួយនឹងភាគីកូរ៉េខាងជើង។ អ្វីៗត្រូវបានត្រៀមរួចរាល់ហើយសម្រាប់ការពិភាក្សា លើកលែងតែប្រទេសកូរ៉េខាងជើងមួយប៉ុណ្ណោះ។
លោក Stephen Biegun តំណាងពិសេសខាងភាគីសហរដ្ឋអាមេរិកសម្រាប់ប្រទេសកូរ៉េខាងជើង ដែលបានធ្វើដំណើរមកដល់រដ្ឋធានីនៃប្រទេសកូរ៉េខាងត្បូងកាលពីថ្ងៃអង្គារម្សិលមិញ ដើម្បីបំពេញទស្សនកិច្ចរយៈពេលបីថ្ងៃបានថ្លែងថា «យើងត្រៀមខ្លួនរួចរាល់ហើយ ពេលណាកូរ៉េខាងត្បូងរួចរាល់ នោះយើងនឹងចាប់ផ្តើមកិច្ចចរចា»។
លោក Biegun បានជួបពិភាក្សាជាមួយនឹងមន្រ្តីជាន់ខ្ពស់កូរ៉េខាងត្បូងនៅក្នុងទីក្រុងសេអ៊ូលនៅថ្ងៃពុធនេះ មួយថ្ងៃបន្ទាប់ពីសហរដ្ឋអាមេរិកនិងកូរ៉េខាងត្បូងបិទបញ្ចប់សមយុទ្ធយោធារួមគ្នា។ បើទោះណាជាកូរ៉េខាងជើងធ្លាប់អះអាងថា ខ្លួននឹងត្រឡប់ទៅការសន្ទនាវិញបន្ទាប់ពីការបញ្ចប់សមយុទ្ធយោធាក៏ដោយ ក៏កូរ៉េខាងជើងនៅមិនទាន់ផ្តល់សញ្ញាថ្មីណាមួយដែលបញ្ជាក់ថា ខ្លួនត្រៀមលក្ខណៈរួចរាល់ដើម្បីចរចាជាមួយរដ្ឋាភិបាលក្រុងសេអ៊ូល ឬរដ្ឋាភិបាលក្រុងវ៉ាស៊ីនតោននោះទេ។
ផ្ទុយទៅវិញអត្ថាធិប្បាយមួយដែលចេញផ្សាយនៅក្នុងសារព័ត៌មាន Rodong Sinmunរបស់រដ្ឋកូរ៉េខាងជើងបានសរសេររិះគន់សហរដ្ឋអាមេរិកថា«មានគោលនយោបាអរិភាពមិនផ្លាស់ប្តូរ» និងបានបញ្ជាក់ទៀតថា សមយុទ្ធយោធារួមគ្នារវាងសហរដ្ឋអាមេរិកនិងកូរ៉េខាងត្បូងមិនគួរកើតឡើងនោះទេ។
កូរ៉េខាងជើងបាននិយាយថា «យើងបានព្រមានជាច្រើនដងរួចមកហើយថា សមយុទ្ធយោធារួមគ្នាបែបនេះអាចរារាំងដល់ការវិវត្តន៍ផ្នែកទំនាក់ទំនងរវាងកូរ៉េខាងជើង និងសហរដ្ឋអាមេរិក ហើយទង្វើនេះនឹងធ្វើឲ្យយើងពិចារណាអំពីចំណាត់ការសំខាន់ៗដែលយើងមាន»។ អត្ថាធិប្បាយនោះបានសរសេរបន្ថែមទៀតថា សហរដ្ឋអាមេរិកកំពុងរុញច្រានឲ្យប្រទេសយើងចាត់វិធានការតបតវិញដោយការពារខ្លួន ដើម្បីលុបបំបាត់ការគំរាមកំហែងនានាដែលអាចកើតឡើង»៕