ជនចំណាកស្រុកអេរីទ្រេ (Eritrea) ម្នាក់បានស្លាប់ ក្រោយត្រូវបានបាញ់ដោយប៉ូលីសអ៊ីស្រាអែល ដែលបានច្រឡំគាត់ថាជាជនជាប់សង្ស័យម្នាក់នៅក្នុងការវាយប្រហារមួយនៅឯស្ថានីយ៍ឡានក្រុង នៅក្រោយពេលបុរសម្នាក់ទៀតបានសម្លាប់ទាហានអ៊ីស្រាអែលម្នាក់ និងធ្វើឱ្យរបួសមនុស្ស១០នាក់ទៀត។
ប៉ូលីសបាននិយាយថា ប៉ូលីសមា្នក់បានបាញ់លោក Mulu Habtom Zerhom កាលពីថ្ងៃអាទិត្យ ក្រោយពីជឿជាក់ថាលោកជាជនល្មើសទី២។ វីដេអូមួយថតនៅនឹងកន្លែងកើតហេតុបង្ហាញឱ្យឃើញហ្វូងមនុស្សវាយតប់បុរសត្រូវរបួសនេះ ដោយគាត់ដេកលើដីមានឈាមចេញពីខ្លួនប្រាណនៅឯស្ថានីយ៍ឡានក្រុង Beersheba ក្នុងប៉ែកខាងត្បូងនៃប្រទេសអ៊ីស្រាអែល។
នាយករដ្ឋមន្ត្រីអ៊ីស្រាអែល Benjamin Netanyahu បានព្រមានប្រឆាំងនឹងទង្វើតាំងខ្លួនថាជាអ្នកការពារអ្វីមួយដោយគ្មានច្បាប់អនុញ្ញាត ដោយលោកបាននិយាយថា «គ្មាននរណាម្នាក់ត្រូវកាត់ក្តីដោយខ្លួនឯងទេ។»
បណ្តាញព័ត៌មានក្នុងស្រុកបានពណ៌នាលោក Zerhom ថាជាអ្នកស្វះស្វែងសុំសិទ្ធិជ្រកកោនក្នុងប្រទេសអ៊ីស្រាអែល មានអាយុជាង២០ឆ្នាំដែលបានស្ថិតនៅក្នុងក្រុងនោះ ដើម្បីបំពេញសំណុំឯកសារទិដ្ឋាការ។
កាលពីថ្ងៃច័ន្ទ ក្រុមមន្ត្រីសន្តិសុខអ៊ីស្រាអែលបាននិយាយថា អ្នកធ្វើការវាយប្រហារពិតប្រាកដ គឺជាពលរដ្ឋអ៊ីស្រាអែលដើមកំណើតអារ៉ាប់អាយុ២១ឆ្នាំឈ្មោះ Mohammad al-Aqaby ដែលគ្មានប្រវត្តិជាជនសកម្មប្រយុទ្ធទេ។
ប៉ូលីសបានបាញ់សម្លាប់ al-Aqaby នៅក្រោយឈ្មោះនេះបានបាញ់កាំភ្លើងនៅឯស្ថានីយ៍ឡានក្រុងនោះ បណ្តាលឱ្យទាហានអ៊ីស្រាអែលឈ្មោះ Omri Levi អាយុ១៩ឆ្នាំបាត់បង់ជីវិត៕