នៅព្រឹកថ្ងៃព្រហស្បតិ៍នេះ ពួកប៉ូលិសហូឡង់បានចាប់ខ្លួនជនជាប់សង្ស័យម្នាក់អាយុ២២ឆ្នាំដោយមានទាក់ទងនឹងការផ្តល់តម្រុយមួយពីពួកប៉ូលិសអេស្ប៉ាញដែលថាការវាយប្រហារភេរវកម្មមួយនៅក្នុងការប្រជុំតន្ត្រីរ៉ុកមួយនៅក្នុងក្រុង Rotterdam មួយថ្ងៃមុននេះអាចកើតមានបាន។
បុរសនេះបានត្រូវចាប់ខ្លួននៅក្នុងការឆ្មក់នៅក្នុងខេត្ត Brabant នាប៉ែកខាងត្បូងប្រទេសដែលនៅទីនោះពួកប៉ូលិសក៏បានឆែកឆេរផ្ទះគាត់ដែរ។
ពួកមន្ត្រីនៅក្នុងក្រុង Rotterdam បានលុបចោលការប្រគុំតន្ត្រីនេះនៅថ្ងៃពុធដោយពួកតន្ត្រីរ៉ុកអាមេរិកាំង Allah-Las។ អ្នកចាត់ចែងការប្រគុំតន្ត្រី Rotown បាននិយាយតាម Twitter ថាកន្លែងប្រគុំតន្ត្រីនេះដែលជាអតីតកន្លែងស្តុកគ្រាប់ធញ្ញជាតិមួយឈ្មោះ Maassilo បានត្រូវជម្លៀស។ សេចក្តីសម្រេចលុបចោលការប្រគុំតន្ត្រីនេះបានត្រូវធ្វើឡើងនៅពេលតិចជាងមួយម៉ោងមុនពេលបើកទ្វារឱ្យសាធារណជនចូលមើលការប្រគុំតន្ត្រីនេះ។
លោក Ahmed Aboutaleb អភិបាលក្រុង Rotterdam បាននិយាយនៅក្នុងសន្និសីទកាសែតមួយកាលពីយប់ថ្ងៃពុធថាពួកប៉ូលិសបានសាកសួរចម្លើយអ្នកបើកឡាន Van មួយគ្រឿងមានផ្ទុកធុងឧស្ម័នដែលបានត្រូវរកឃើញនៅជិតកន្លែងប្រគុំតន្ត្រីនេះ។ រថយន្តនេះមានចុះបញ្ជីនៅក្នុងប្រទេសអេស្ប៉ាញ។
ក៏ប៉ុន្តែពួកប៉ូលិសបាននិយាយនៅថ្ងៃព្រហស្បតិ៍នេះថា អ្នកបើកឡាននេះជាពលរដ្ឋអេស្ប៉ាញ និងជាជាងឡានដែល «បានពន្យល់អំពីហេតុអ្វីបានជាធុងឧស្ម័នទាំងនេះឋិតនៅក្នុងរថយន្តនោះ»។ ពួកប៉ូលិសនិយាយថាគ្មានការទាក់ទិនជាក់លាក់នឹងការគំរាមកំហែងនេះទេ តែថាបុរសនេះប្រឈមនឹងការសួរចម្លើយថែមទៀតនៅថ្ងៃព្រហស្បតិ៍នេះ។
លោក Aboutaleb អភិបាលក្រុង Rotterdam បាននិយាយថា ពួកប៉ូលិសអេស្ប៉ាញបានរាយការណ៍អំពីការគំរាមកំហែងភេរវកម្មនេះតែប៉ុន្មានម៉ោងមុនពេលក្រុមតន្ត្រីនេះមកពីរដ្ឋ California មានកំណត់ឡើងលើឆាកហើយតម្រុយនេះហ្មត់ចត់គ្រប់គ្រាន់ស័ក្តិសមនាំឱ្យមានការលុបចោលការប្រគុំតន្ត្រីនេះ៕