លោកដូណាល់ ត្រាំដែលបានស្បថកាលពីថ្ងៃសុក្រជាប្រធានាធិបតីទី៤៥របស់សហរដ្ឋអាមេរិក បានប្រើប្រាស់សុន្ទរកថាស្បថចូលកាន់ដំណែងរបស់លោកប្រាប់មនុស្សរាប់សែននាក់ដែលបានប្រមូលផ្តុំគ្នានៅទីលាន National Mall ដើម្បីមើលកាស្បថចូលកាន់តំណែងថា លោកនឹងគិតគូរប្រទេសអាមេរិកនិងកម្មករអាមេរិកាំងមុន។
លោកត្រាំបានមានប្រសាសន៍ថា «ចាប់ពីថ្ងៃនេះទៅអ្វីៗសម្រាប់តែប្រទេសអាមេរិកមុន។ ខ្ញុំនឹងមិនធ្វើឲ្យអស់លោកអ្នកខកចិត្តទេ។ ប្រទេសអាមេរិកនឹងចាប់ផ្តើមឈ្នះ ឈ្នះមិនដូចកាលពីពេលមុន»។ ឃ្លានេះត្រូវបានធ្វើតាមវោហាសាស្រ្តប្រហាក់ប្រហែលគ្នាដែលលោកបានប្រើក្នុងអំឡុងនៃយុទ្ធនាការឃោសនាជ្រើសរើសប្រធានាធិបតីប្រកបដោយជោគជ័យរបស់លោក។
មេដឹកនាំសភានិងអតីតប្រធានាធិបតីលោកបារ៉ាក់ អូបាម៉ា លោក George W. Bush លោក Bill Clinton និងលោក Jimmy Carter ស្ថិតនៅក្នុងចំណោមអ្នកដែលចូលរួមក្នុងពិធីស្បថចូលកាន់តំណែងដែលបានធ្វើឡើងនៅឯខាងមុខភាគខាងលិចវិមានរដ្ឋសភាសហរដ្ឋអាមេរិក។
ភាសាប្រហាក់ប្រហែលគ្នានោះ បានប្រើក្នុងអំឡុងនៃយុទ្ធនាការឃោសនាបោះឆ្នោតជ្រើសរើសប្រធានាធិបតីរបស់លោក លោកប្រធានាធិបតីថ្មីបានមានប្រសាសន៍ថា កម្មករអាមេរិកាំងបានត្រូវគេបំផ្លាញតាមរយៈកិច្ចព្រមព្រៀងពាណិជ្ជកម្មមិនល្អដែលបានធ្វើឡើងតាមរយៈរដ្ឋបាលមុនៗ។
លោកប្រធានាធិបតីត្រាំបានមានប្រសាសន៍ថា «ការសម្លាប់ជនជាតិអាមេរិកាំងត្រូវបញ្ឈប់នៅពេលឥឡូវនេះ។ រាល់ការសម្រេចចិត្តស្តីពីពាណិជ្ជកម្ម ពន្ធដារ អន្តោប្រវេសន៍ កិច្ចការបរទេស នឹងត្រូវធ្វើឡើងដើម្បីផ្តល់ផលប្រយោជន៍ដល់កម្មករអាមេរិ កាំងនិងក្រុមគ្រួសារអាមេរិកាំង»។
លោកប្រធានាធិបតីថ្មីក៏បាននិយាយដែរថា ពិធីស្បថចូលកាន់តំណែងកាលពីថ្ងៃសុក្រកត់សម្គាល់ព្រឹត្តិការណ៍ដ៏សំខាន់មួយក្នុងប្រវត្តិសាស្រ្តរបស់អាមេរិកដែលអំណាចត្រូវបានផ្ទេរ មិនត្រឹមតែពីគណបក្សមួយទៅគណបក្សមួយទៀតទេ ក៏ប៉ុន្តែអំណាចនោះត្រូវបានផ្ទេរពីរដ្ឋធានីវ៉ាស៊ីនតោនទៅឲ្យពលរដ្ឋដែរ៕