ក្រសួងយុត្តិធម៌សហរដ្ឋអាមេរិកកំពុងពិនិត្យមើលដុំឯកសារដែលអាចចាត់ទុកថាជាឯកសារសម្ងាត់ដែលត្រូវបានរកឃើញនៅក្នុងការិយាល័យធ្វើការក្នុងរដ្ឋធានីវ៉ាស៊ីនតោននៃអតីតវិទ្យាស្ថានរបស់លោកប្រធានាធិបតី Joe Biden។ នេះបើតាមការបញ្ជាក់របស់សេតវិមានកាលពីថ្ងៃចន្ទ។
លោក Richard Sauber ទីប្រឹក្សាពិសេសរបស់លោកប្រធានាធិបតី បាននិយាយថា «ឯកសារមួយចំនួនតូច ដែលមានសញ្ញាសម្គាល់ថា សម្ងាត់» ត្រូវបានរកឃើញនៅពេលដែលមេធាវីផ្ទាល់ខ្លួនរបស់ Biden កំពុងបោសសម្អាតការិយាល័យ Penn Biden Center ជាកន្លែងដែលប្រធានាធិបតីរក្សាការិយាល័យមួយបន្ទាប់ពីលោកបានចាកចេញពីតំណែងជាអនុប្រធានាធិបតីនៅឆ្នាំ ២០១៧ គឺរហូតដល់មុនពេលតែបន្តិច ដែលលោក Biden ចាប់ផ្តើមយុទ្ធនាការឃោសនាសម្រាប់តំណែងប្រធានាធិបតីឆ្នាំ ២០២០ របស់លោកនៅឆ្នាំ២០១៩ ។ លោក Richard Sauber អះអាងថា ឯកសារទាំងនេះត្រូវបានរកឃើញនៅថ្ងៃទី២ ខែវិច្ឆិកា ឆ្នាំ២០២២ នៅក្នុង «ទូចាក់សោ» នៅក្នុងការិយាល័យ។
លោក Sauber បាននិយាយថា មេធាវីបានជូនដំណឹងភ្លាមៗដល់ការិយាល័យទីប្រឹក្សាច្បាប់របស់សេតវិមាន ដែលបានជូនដំណឹងដល់រដ្ឋបាលបណ្ណសារ និងកំណត់ត្រាជាតិ (National Archives and Records Administration) ដែលបានរក្សាទុកឯកសារទាំងនោះនៅថ្ងៃបន្ទាប់។
លោក Sauber បាននិយាយថា៖ «ចាប់តាំងពីការរកឃើញនោះ មេធាវីផ្ទាល់ខ្លួនរបស់ប្រធានាធិបតីបានសហការជាមួយនឹងការិយាល័យបណ្ណសារ និងក្រសួងយុត្តិធម៌ក្នុងដំណើរការមួយដើម្បីធានាថា រាល់កំណត់ត្រារដ្ឋបាល Obama-Biden គឺត្រូវរក្សាទុកដោយបណ្ណសារជាតិយ៉ាងត្រឹមត្រូវ»។
បុគ្គលម្នាក់ដែលដឹងអំពីបញ្ហានេះ ប៉ុន្តែមិនត្រូវបានអនុញ្ញាតឱ្យនិយាយចេញជាសាធារណៈបាននិយាយថា រដ្ឋមន្ត្រីក្រសួងយុត្តិធម៌អាមេរិកលោក Merrick Garland បានស្នើសុំឱ្យលោក John Lausch រដ្ឋអាជ្ញាសហរដ្ឋអាមេរិកសម្រាប់សង្កាត់ភាគខាងជើងនៃរដ្ឋ Illinois ពិនិត្យមើលបញ្ហានេះឡើងវិញ បន្ទាប់ពីបណ្ណសារជាតិបានបញ្ជូនបញ្ហានេះ ទៅក្រសួងយុត្តិធម៌។ លោក John Lausch ត្រូវបានតែងតាំងឱ្យកាន់តំណែងរបស់លោកដោយអតីតប្រធានាធិបតី Donald Trump៕