រយៈពេលពីរថ្ងៃបន្ទាប់ពីលោកប្រធានាធិបតីសហរដ្ឋអាមេរិក ដូណាល់ ត្រាំ បានបញ្ជាឱ្យបញ្ចប់ការបំបែកក្រុមគ្រួសារជនអន្តោប្រវេសន៍ដែលមកដល់ព្រំដែនសហរដ្ឋអាមេរិកនិងម៉ិកស៊ិក មានឪពុកម្តាយកុមារចំនួនបីនាក់ក៏ដូចជាមនុស្សជាច្រើនពាន់នាក់កំពុងខ្នះខ្នែងស្វែងរកព័ត៌មានពីទីកន្លែងនិងសុខទុក្ខកូនៗរបស់ពួកគេ។ នេះបើតាមការបញ្ជាក់របស់មេធាវីរបស់ពួកគេ។
លោកJeremy Wesevich មេធាវីនៃក្រុមហ៊ុនជំនួយការផ្នែកច្បាប់ RioGrande នៅរដ្ឋតិចសាសបានបញ្ជាក់បន្ថែមថា៖
«អតិថិជនរបស់យើងកំពុងជាប់នៅមន្ទីរឃុំឃាំងដោយមិនទទួលបានព័ត៌មានពីកូនៗរបស់ពួកគេទេ។ រដ្ឋាភិបាលមាននីតិវិធីក្នុងការផ្តល់ព័ត៌មានប៉ុន្តែរហូតមកដល់ពេលនេះគឺមិនបានផ្តល់គ្រប់គ្រាន់ទេ»។
អង្គការជំនួយផ្នែកច្បាប់មួយនេះកំពុងតែតំណាងឱ្យគ្រួសារទាំងបីនេះដាក់ពាក្យប្តឹងរដ្ឋបាលលោកប្រធានាធិបតី ដូណាល់ ត្រាំ ពីបទបំបែកបំបាក់គ្រួសារពួកគេ។ នេះគឺជាបញ្ហាប្រឈមផ្លូវច្បាប់ដ៏ធំមួយក្នុងចំណោមបញ្ហាចំនួនពីរនៃគោលនយោបាយដែលទើបតែបញ្ចប់របស់រដ្ឋាភិបាលនេះ។
លោក Wesevich បាននិយាយថាបទបញ្ជានីតិប្រតិបត្តិរបស់លោកត្រាំដែលបានចេញកាលពីថ្ងៃពុធបាននាំឱ្យមានក្តីសង្ឃឹមតិចតួចសម្រាប់ក្រុមគ្រួសារដែលត្រូវគេបំបែកទាំងនេះ។
បើយោងតាមក្រសួងសន្តិសុខជាតិ គឺមានកុមារចំនួនជាង២.៣០០នាក់ត្រូវបានបំបែកចេញពីក្រុមគ្រួសារនៅចន្លោះពីដើមខែឧសភារហូតដល់សប្តាហ៍មុននៅពេលដែលរដ្ឋាភិបាលបានចាប់ផ្តើមអនុវត្ត «គោលនយោបាយគ្មានការអត់ឱន» ក្នុងការអនុវត្តគោលនយោបាយអន្តោប្រវេសន៍។
ក្រសួងការពារជាតិបាននិយាយកាលពីថ្ងៃព្រហស្បតិ៍ថាក្រសួងបានទទួលសំណើពីក្រសួងសុខាភិបាលឱ្យផ្តល់ទីលំនៅដល់កុមារអន្តោប្រវេសន៍ដែលគ្មានឪពុកម្តាយមកជាមួយចំនួន២០.០០០នាក់៕