បណ្តារដ្ឋាភិបាលនៃប្រទេសអាស៊ីអាគ្នេយ៍ នៅតែសម្តែងការមិនចង់ទទួលជនទេសន្តរប្រវេសន៍ និងជនភៀសខ្លួនតាមទូកជាច្រើន ដែលពួកអ្នកជួញដូរមនុស្ស បោះបង់ចោលនៅលើសមុទ្រនោះ។
ក្រុមសកម្មជនកាក់ស្មានថា ជនធ្វើដំណើរតាមទូកដែលមានចំនួនអាចដល់ទៅ ៨ពាន់នាក់នោះ កំពុងស្ថិតនៅលើសមុទ្រ ដោយគ្មានម្ហូបអាហារ ឬទឹកផឹក ក្រោយពីមានការបង្ក្រាបពីសំណាក់ថៃ លើក្រុមអ្នកជួញដូរមនុស្សយ៉ាងធំមួយ បានរារាំងដល់ប្រព័ន្ធដឹកជញ្ជូនឧក្រិដ្ឋកម្មបែបនេះ។
ប្រទេសម៉ាឡេស៊ី ឥណ្ឌូណេស៊ី និង ថៃ ដែលជាប្រទេសបីដែលពួកជនទេសន្តរប្រវេសន៍ និង ជនភៀសខ្លួនបានព្យាយាមធ្វើដំណើរទៅនេះ និយាយថាជនទេសន្តរប្រវេសន៍ទាំងនោះ មិនមែនជាការទទួលបន្ទុករបស់ខ្លួនទេ ដោយច្រានចោលការអំពាវនាវពីសំណាក់អ.ស.ប និង អង្គការសិទ្ធិមនុស្ស។
អនុរដ្ឋមន្ត្រីក្រសួងមហាផ្ទៃនៃប្រទេសម៉ាឡេស៊ី Wan Junaidi បានថ្លែងនៅថ្ងៃព្រហស្សតិ៍នេះថា ប្រទេសរបស់លោកចាំបាច់ត្រូវតែបញ្ជូនសារត្រឹមត្រូវមួយ គឺយើងមិនស្វាគមន៍ពួកគេនៅទីនេះទេ។ មន្ត្រីម៉ាឡេស៊ីឯទៀតបានថ្លែងថា ម៉ាឡេស៊ីកំពុងបង្កើនការយាមល្បាតតាមដែនសមុទ្រ និង ដែនអាកាស ដើម្បីរារាំងការចូលដោយខុសច្បាប់នេះ។
កាលពីដើមសប្តាហ៍នេះ ជនភៀសខ្លួនតាមទូកប្រមាណជាងមួយពាន់នាក់ បានឡើងគោកក្នុងប្រទេសម៉ាឡេស៊ី។ ក្រុមមន្ត្រីនិយាយថាជនទាំងនោះឥឡូវកំពុងស្ថិតនៅក្នុងជំរុំឃុំឃាំង នៅស្របពេលដែលប្រទេសម៉ាឡេស៊ី កំពុងរៀបចំធ្វើក្រដាសស្នាមដើម្បីបញ្ជូនពួកគេទៅកន្លែងមួយផ្សេងទៀត។
ជនទេសន្តរប្រវេសន៍ជិតប្រាំមួយរយនាក់ ត្រូវបានទាហានជើងទឹកឥណ្ឌូនេស៊ី ជួយសង្គ្រោះកាលពីថ្ងៃអាទិត្យមុន។ ក្រុមមន្ត្រីនិយាយថាជនទាំងនោះ កំពុងទទួលបានស្បៀងអាហារ និង កន្លែងជ្រកកោន នៅតំបន់ Aceh ខាងជើង ខណៈដែលរដ្ឋាភិបាលពិគ្រោះជាមួយអ.ស.ប និង អង្គការអន្តរជាតិដទៃទៀត។ ទូកឯទៀតដែលដឹកមនុស្សរាប់រយនាក់ ត្រូវបានកងយោធាជើងទឹកនៃប្រទេសម៉ាឡេស៊ី និង ឥណ្ឌូនេស៊ីស្ទាក់ចាប់ ហើយបន្ទាប់ពីបានផ្តល់ស្បៀងអាហារ និង ទឹកផឹករួចមកក៏ត្រូវច្រានឲ្យចេញទៅសមុទ្រវិញ។