បេក្ខជនឈរឈ្មោះប្រធានាធិបតីខាងគណបក្សប្រជាធិបតេយ្យឌឺដងគ្នាកាលពីថ្ងៃអាទិត្យ នៅរយៈពេលពីរថ្ងៃមុនការបោះឆ្នោតបឋមដ៏សំខាន់នៅរដ្ឋ New Hampshire ដើម្បីជ្រើសរើសបេក្ខជនប្រធានាធិបតីរបស់គណបក្ស។ ពួកគេព្យាយាមនិយាយបន្ដុះបង្អាប់គ្នាទៅវិញទៅមកដើម្បីទទួលបានការជ្រើសតាំងពីគណបក្សសម្រាប់ប្រកួតប្រជែងជាមួយនឹងលោកប្រធានាធិបតី ដូណាល់ ត្រាំ ខាងគណបក្សសាធារណរដ្ឋ នៅក្នុងការបោះឆ្នោតជាតិនៅវិច្ឆិកាខាងមុខនេះ។
ទាំងអតីតប្រធានាធិបតី លោក Joe Biden និងអតីតអភិបាលក្រុង South Bend រដ្ឋ Indiana លោក Pete Buttigieg បានអះអាងក្នុងកម្មវិធី «This Week» របស់ទូរទស្សន៍ ABC News ថា ការប្រជែងជាមួយនឹងលោក ត្រាំ នឹងកាន់តែពិបាកនឹងយកឈ្នះបាន ប្រសិនបើលោក Bernie Sanders សមាជិកព្រឹទ្ធសភានៃរដ្ឋ Vermont ក្លាយជាបេក្ខជនប្រធានាធិបតីតំណាងគណបក្សប្រជាធិបតេយ្យដោយសារតែលោកបានប្រកាសខ្លួនឯងថាជាអ្នកសង្គមនិយមប្រជាធិបតេយ្យ។
ការស្ទង់មតិរាល់ថ្ងៃនៅក្នុងរដ្ឋ New Hampshire នេះបានបង្ហាញថា លោក Sanders បាននាំមុខលោក Buttigieg លោក Biden អ្នកស្រី Elizabeth Warren សមាជិកព្រឹទ្ធសភានៃរដ្ឋ Massachusetts និងអ្នកស្រី Amy Klobuchar សមាជិកព្រឹទ្ធសភានៃរដ្ឋ Minnesota។
ការបោះឆ្នោតបឋមនៅរដ្ឋ New Hampshire នៅថ្ងៃអង្គារនេះ ត្រូវបានធ្វើឡើងក្នុងរយៈពេលមួយសប្ដាហ៍បន្ទាប់ពីលោក Buttigieg បាននាំមុខលោក Sanders យ៉ាងប្រកៀកប្រកិត នៅក្នុងការបោះឆ្នោតបឋមនៅរដ្ឋ Iowa៕