ការបោះឆ្នោត caucus នៅក្នុងរដ្ឋ Iowa របស់គណបក្សប្រជាធិបតេយ្យ ដែលជាការបោះឆ្នោតដើម្បីជ្រើសតាំងបេក្ខជនប្រធានាធិបតីដើម្បីចូលប្រកួតនៅក្នុងការបោះឆ្នោតប្រធានាធិបតីនៅខែវិច្ឆិកាខាងមុខនេះ បានជួបប្រទះបញ្ហាដ៏គួរឲ្យអៀនខ្មាសកាលពីល្ងាចថ្ងៃចន្ទម្សិលមិញ នៅពេលដែលគណបក្សប្រជាធិបតេយ្យប្រចាំរដ្ឋ Iowa មិនអាចប្រកាសអំពីលទ្ធផលនៃការបោះឆ្នោតនេះ ក្នុងពេលប៉ុន្មានម៉ោងក្រោយមក បន្ទាប់ពីការបោះឆ្នោតបានបញ្ចប់។
មន្ត្រីគណបក្សប្រជាធិបតេយ្យប្រចាំរដ្ឋ Iowa ថា ការពន្យារពេលនេះគឺបណ្ដាលមកពីបញ្ហានៅក្នុងការរាយការណ៍អំពីចំនួនសរុបពីគ្រប់មណ្ឌលបោះឆ្នោតទាំងអស់នៅទូទាំងរដ្ឋ និងបានបន្ថែមថា ពួកគេរំពឹងថានឹង «ទទួលបានចំនួនសរុបដើម្បីរាយការណ៍» នៅថ្ងៃអង្គារនេះ។
លោក Troy Price ប្រធានគណបក្សប្រជាធិបតេយ្យប្រចាំរដ្ឋ Iowa បានបញ្ជាក់នៅក្នុងសេចក្ដីប្រកាសមួយទៅកាន់អ្នកកាសែតថា៖ «យើងកំពុងផ្ទៀងផ្ទាត់គ្រប់ទិន្នន័យទាំងអស់ដែលយើងមានជាមួយនឹងឯកសារនានារបស់យើង។ ប្រព័ន្ធបែបនេះគឺចំណាយពេលយូរជាងការរំពឹងទុក ប៉ុន្តែជាប្រព័ន្ធមួយដែលធានាថា យើងនឹងអាចរាយការណ៍អំពីលទ្ធផលដោយភាពជឿជាក់ពេញទំហឹង»។
ដោយសារមិនទាន់ដឹងលទ្ធផលដូច្នេះ បេក្ខជនទាំងអស់នៅមានភាពស្រពិចស្រពិល ប៉ុន្តែបានបង្ហាញភាពសុទិដ្ឋិនិយមនៅពីមុខអ្នកគាំទ្ររបស់ខ្លួន។
ដោយសារមិនទាន់ដឹងអ្នកឈ្នះ និងអ្នកចាញ់ នោះមានន័យថា បេក្ខជនដែលនាំមុខគេនៅក្នុងការស្ទង់មតិកន្លងមកនៅមិនទាន់ហ៊ានអះអាងថាខ្លួននឹងទទួលជោគជ័យនៅឡើយទេ។ បេក្ខជនមួយចំនួនបានធ្វើដំណើរពីរដ្ឋ Iowa ទៅរដ្ឋ New Hampshire នៅព្រឹកថ្ងៃអង្គារនេះ ដើម្បីចាប់ផ្ដើមធ្វើយុទ្ធនាការឃោសនាទោះបីជាមិនទាន់ដឹងលទ្ធផលនៃការបោះឆ្នោត caucus នៅរដ្ឋ Iowa នេះក៏ដោយ។
ការបោះឆ្នោត primary ដែលជាទម្រង់មួយផ្សេងទៀតនៃការបោះឆ្នោតដើម្បីជ្រើសតាំងបេក្ខជនប្រធានាធិបតីរបស់គណបក្សផងដែរ នឹងធ្វើឡើងនៅសប្ដាហ៍ក្រោយនៅរដ្ឋ New Hampshire៕
