ជំងឺកូវីដ១៩បានបន្តរាលដាលទៅវត្តអារាមក្នុងរាជធានីភ្នំពេញ និងតាមបណ្តាខេត្តមួយចំនួន ដែលរហូតមកដល់ពេលនេះ ព្រះសង្ឃប្រមាណ២៤០អង្គបានឆ្លងជំងឺនេះ។
របាយការណ៍មួយរបស់ក្រសួងធម្មការ និងសាសនាដែលវីអូអេទទួលបានឲ្យដឹងថាព្រះសង្ឃចំនួន២៣៩អង្គបានឆ្លងជំងឺកូវីដ១៩ដែលគិតចាប់តាំងពីការផ្ទុះឆ្លងព្រឹត្តិការណ៍សហគមន៍២០កុម្ភៈ ខណៈការឆ្លងក្នុងប្រទេសមិនទាន់ថមថយនៅឡើយ។
របាយការណ៍ស្តីពីការឆ្លងក្នុងចំណោមព្រះសង្ឃនិងសាសនិកផ្សេងៗទៀតឲ្យដឹងថាព្រះសង្ឃដែលឆ្លងច្រើនជាងគេគឺនៅរាជធានីភ្នំពេញ ដែលមាន១៣៤អង្គ និងខេត្តផ្សេងៗ ដូចជាត្បូងឃ្មុំ៨៨អង្គកំពត១០អង្គ ព្រៃវែង៤អង្គ កណ្តាល១អង្គ ស្វាយរៀង១អង្គ និងកំពង់ចាម១អង្គ។
កាលពីថ្ងៃចន្ទ អាជ្ញាធរសុខាភិបាលបានឲ្យដឹងថាខ្លួនបានរកឃើញករណីឆ្លងក្នុងចំណោមព្រះសង្ឃ២០អង្គដែលគង់នៅវត្តទួលទំពូង រហូតដល់មានការបិទវត្តនេះជាបណ្តោះអាសន្ន។
ព្រះចៅអធិការវត្តទួលទំពូង ព្រះតេជគុណ ស៊ា ប៊ុនណាត មានសង្ឃដីកាប្រាប់វីអូអេនៅថ្ងៃពុធនេះថាការឆ្លងរីករាលដាលជំងឺកូវីដ១៩ចូលមកក្នុងវត្តរបស់ព្រះអង្គ គឺដោយសារការធ្វេសប្រហែសរបស់ព្រះសង្ឃមួយចំនួន ដែលអនុញ្ញាតឲ្យសិស្សមកពីខាងក្រៅស្នាក់អាស្រ័យក្នុងអំឡុងពេលផ្ទុះជំងឺកូវីដ១៩នេះ។
ព្រះតេជគុណបញ្ជាក់ថា៖ «កុដិមួយហ្នឹងលោកដូចជាការធ្វេសប្រហែស។ បានន័យថាសិស្សហ្នឹងគាត់ធ្លាប់រស់នៅកន្លែងហ្នឹងពីមុនមក ដល់ពេលមួយរយៈនេះ គាត់ឈប់នៅហើយគាត់ទៅជួលផ្ទះគេតែដល់ល្ងាចថ្ងៃចន្ទ[ទី១២ ខែកក្កដា] គាត់មកហើយស្នាក់នៅក្នុងកុដិ ដោយភាពស្និទ្ធស្នាលពីមុនមកលោកក៏អនុញ្ញាត... ទាំងដែលមិនដឹងថាគាត់ហ្នឹងនាំកូវីដមកទេ។ ដល់គាត់ទៅធ្វើតេស្តនៅពេទ្យរុស្សី ដល់យប់ឡើងពេទ្យរុស្សី គេខលមកខាងសង្កាត់ថាមានវិជ្ជមានសិស្សកុដិលេខ៥ហ្នឹង។ ហើយអញ្ចឹងចៅសង្កាត់បានខលមកអាត្មាទាំងយប់។ អាត្មាក៏បានរៀបចំភ្លាមៗ តេប្រាប់តាមបណ្តាកុដិនីមួយៗឈប់ឲ្យមានការឆ្លងកាត់គ្នាទៅវិញទៅមកនិងបិទខ្ទប់»។
ព្រះចៅអធិការវត្តបានឲ្យដឹងទៀតថាបច្ចុប្បន្នក្នុងវត្តមានព្រះសង្ឃសរុប៦០អង្គ ដែលក្នុងនោះចំនួន២០អង្គបានឆ្លងជំងឺកូវីដ១៩នឹងបានទៅសម្រាកព្យាបាលនៅមណ្ឌលទួលពង្រ និង៤០អង្គផ្សេងទៀតបានគង្គនៅក្នុងវត្ត ដើម្បីធ្វើចត្តាឡីស័ក និងមិនអនុញ្ញាតឲ្យនិមន្តចេញក្រៅវត្តនោះទេ។ ព្រះតេជគុណមានសង្ឃដីកាបន្តថាការឆ្លងក្នុងវត្តទួលទំពូងនេះភាគច្រើនកើតលើសាមណេរដែលមានជាង១០អង្គ។
រូបឯកសារ៖ ព្រះសង្ឃមួយអង្គកំពុងទិញបន្លែពីអ្នកលក់បន្លែតាមរទេះក្បែរផ្សារកណ្តាល ខណៈ ផ្សារមិនរៀបរយទូទាំងរាជធានីត្រូវបានបិទ ដើម្បីទប់ស្កាត់ការរីករាលដាលជំងឺកូវីដ១៩ ក្នុងអំឡុងពេលបិទខ្ទប់នៅរាជធានីភ្នំពេញ និងក្រុងតាខ្មៅ ថ្ងៃទី២៦ ខែមេសា ឆ្នាំ២០២១។ (កាន់ វិច្ឆិកា/វីអូអេ)
ព្រះតេជគុណបញ្ជាក់បន្ថែមថា៖ «ភាគច្រើនគឺសាមណេរតូចៗ។ អង្គធំៗក៏មានដែរ។ អង្គធំៗប្រមាណបីបួនប្រាំអង្គដែរ។ ហើយក្នុងនោះសុទ្ធតែមានអ្នកចាក់វ៉ាក់សាំង។ ធំៗហ្នឹងសុទ្ធតែបានចាក់វ៉ាក់សាំង»។
ព្រះតេជគុណគុណ ណន ដែលកំពុងសម្រាកព្យាបាលជំងឺកូវីដ១៩នៅមណ្ឌលទួលពង្រ ក្នុងខណ្ឌពោធិ៍សែនជ័យ បានប្រាប់វីអូអេនៅថ្ងៃពុធនេះថាព្រះតេជគុណកំពុងតែសម្រាកព្យាបាលនៅក្នុងអគារមួយជាមួយប្រជាពលរដ្ឋទូទៅ។ ព្រះតេជគុណស្នើឲ្យដាក់ព្រះសង្ឃសម្រាកព្យាបាលដាច់ដោយឡែកពីអ្នកជំងឺទូទៅផ្សេងទៀត។
ព្រះតេជគុណមានសង្ឃដីកាថា៖ «ទីតាំងមណ្ឌលទួលពង្រ មានទាំងស្រី ទាំងប្រុសទាំងព្រះសង្ឃទាំងអស់គ្នាជារួម។ ពេទ្យនាំមកអញ្ចឹងគឺកន្លែងណាទំនេរ គឺដាក់អញ្ចឹងទៅ»។
ព្រះតេជគុណឲ្យដឹងទៀតថាព្រះអង្គមិនដែលបាននិមន្តចេញក្រៅវត្តនោះទេ ប៉ុន្តែដោយសារតែកូនសិស្សនៅក្នុងវត្តចេញចូលធ្វើការជាប្រចាំ ទើបបណ្តាលឲ្យមានករណីឆ្លងមកដល់ក្នុងវត្តបែបនេះ។
ព្រះតេជគុណបញ្ជាក់ថា៖ «អាត្មាអត់ដែលនិមន្តទៅណាផងហ្នឹងអាត្មានៅតែកុដិអញ្ចឹងហើយដល់ពេលព្រឹកឡើងទៅ ធ្វើតេស្តទៅក៏ចេញមកអញ្ចឹងទៅ ពីព្រោះសុខភាពអត់កើតអីផងគ្រាន់តែថាពេលយប់យើងគ្រាន់តែរៀងហូរសម្បោរ ក្តៅខ្លួនបន្តិចបន្តួចអញ្ចឹងទៅ។ ដល់ព្រឹកឡើងធ្វើតេស្ត ក៏វិជ្ជមានអញ្ចឹងទៅ»។
បើយោងតាមព័ត៌មានរបស់អនុគណៈកម្មការស្រាវជ្រាវជំងឺកូវីដ១៩ដែលបានបង្ហាញលើបណ្តាញសង្គមហ្វេសប៊ុករបស់ខ្លួន វត្តអារាមដែលមានការឆ្លងរីករាលដាលជំងឺកូវីដ១៩នេះរួមមានវត្តទួលទំពូង វត្តសារាវ័នតេជោ វត្តទឹកថ្លា វត្តសំរោងអណ្តែត និងវត្តបុទុមវត្តីផងដែរ។
ព្រះអង្គ រឹម ណាំឈាវ ដែលគង់នៅវត្តមហាមន្ត្រី និងបានយកសំណាកទៅពិនិត្យ បានប្រាប់VOAនៅថ្ងៃពុធនេះថាការឆ្លងរីករាលដាលជំងឺកូវីដ១៩នេះអាចទំនងមកពីការចេញចូលរបស់ប្រជាពលរដ្ឋ ដោយមិនបានអនុវត្តវិធានការការពារ។
ព្រះតេជគុណមានសង្ឃដីកាថា៖ «ការបើកចំហវត្តក្នុងការឲ្យពុទ្ធបរិស័ទចេញចូលក្នុងការប្រគេនទេយ្យទានក៏វាជាហានិភ័យ ពីព្រោះយើងអត់ដឹងថាតើគ្រហស្ថ ឬពុទ្ធបរិស័ទមានជំងឺហ្នឹងដែរ ឬអត់ ពីព្រោះពុទ្ធបរិស័ទខ្លះក៏លោកអត់ដឹងថា លោកមានជំងឺហ្នឹងដែរ។ អញ្ចឹងពេលលោកយកចង្ហាន់មក គឺត្រូវប៉ះពាល់ដោយផ្ទាល់ ប៉ះពាល់ដោយប្រយោលខ្លះជាមួយព្រះសង្ឃ»។
ព្រះអង្គបន្ថែមថា៖ «ការចេញចូល ដូចជាវត្តមហាមន្ត្រី ឬក៏វត្តក្បែៗហ្នឹង ក៏មានចរាចរណ៍ឆ្លងកាត់ ទាំងម៉ូតូឌុប ទាំងអ្នកធ្វើដំណើរមួយចំនួនគាត់បានឆ្លងកាត់។ អញ្ចឹងការឆ្លងកាត់ការសួរនាំពីផ្លូវពីអ្នកស្គាល់គ្នា ឬអ្នកមិនស្គាល់គ្នាក្នុងវត្ត អញ្ចឹងវាអាចជាបញ្ហាប្រឈមមួយផងដែរ»។
ព្រះអង្គក៏មានការព្រួយបារម្ភ ប្រសិនបើការទប់ស្កាត់ជំងឺកូវីដ១៩នេះមិនបានឆាប់រហ័សនោះទេវានឹងប៉ះពាល់ដល់ចង្ហាន់និងការរៀនសូត្ររបស់ព្រះសង្ឃក្នុងរាជធានីភ្នំពេញ។
ព្រះអង្គមានសង្ឃដីកាថា៖ «ព្រះសង្ឃនៅរាជធានីភ្នំពេញ គឺលោកប្រមូលបច្ច័យពីការបិណ្ឌបាតពីញាតិញោមមកគឺដើម្បីផ្គត់ផ្គង់ការសិក្សារបស់លោក ចង្ហាន់របស់លោក និងអ្វីផ្សេងៗទៀតដែលជាតម្រូវការចាំបាច់ផ្ទាល់ខ្លួន។ ហើយនៅពេលដែលមានបញ្ហាប្រឈមគឺទី១ លោកខាតបង់ពេលវេលាសូម្បីការសិក្សារបស់លោក ហើយបញ្ហាប្រឈមគឺកង្វះខាតចំពោះមុខ គឺថវិកាបង់ថ្លៃសាលា ថ្លៃចង្ហាន់ ថ្លៃអ្វីផ្សេងៗជាដើម គឺវាជាបញ្ហាប្រឈមមែនទែន»។
គួរបញ្ជាក់ថាក្រសួងសុខាភិបាលនៅថ្ងៃពុធនេះបានរាយការណ៍ករណីឆ្លងថ្មីចំនួន៨១២នាក់ និងស្លាប់១៩នាក់ ដែលនាំឲ្យករណីស្លាប់សរុបមានចំនួន១.១៦៨នាក់ និងករណីឆ្លងសរុបក្នុងប្រទេសមានជិត៧ម៉ឺននាក់៕