ជាថ្មីម្តងទៀត នៅព្រឹកថ្ងៃអង្គារនេះ សភាស៊ើបសួរនៃសាលាឧទ្ធរណ៍បន្តច្រានចោលបណ្តឹងសុំនៅក្រៅឃុំរបស់លោក កឹម សុខា ប្រធានគណបក្សសង្គ្រោះជាតិដែលត្រូវបានតុលាការរំលាយ ដោយសម្រេចបន្តឃុំខ្លួនលោកក្នុងពន្ធនាគារដដែល។ នេះបើតាមការបញ្ជាក់របស់មន្រ្តីជាន់ខ្ពស់សាលាឧទ្ធរណ៍។
លោក ទូច ថារិទ្ធ អ្នកនាំពាក្យសាលាឧទ្ធរណ៍ ប្រាប់ VOA នាព្រឹកថ្ងៃអង្គារនេះថា ក្នុងសវនាការអសាធារណៈលើបណ្តឹងសុំនៅក្រៅឃុំរបស់លោក កឹម សុខា ចៅក្រមសាលាឧទ្ធរណ៍បានសម្រេចតម្កល់សាលក្រមសាលាដំបូងរាជធានីភ្នំពេញទុកជាបានការ ដោយបន្តឃុំខ្លួនលោក កឹម សុខា ក្នុងពន្ធនាគារជាបន្តដើម្បីស៊ើបសួរ។
លោកបញ្ជាក់ថា៖
«មូលហេតុដោយសារសាលាឧទ្ធរណ៍យល់ឃើញថា អ្វីៗដែលសាលាដំបូងរាជធានីភ្នំពេញបានសម្រេចនោះមានលក្ខណៈត្រឹមត្រូវតាមផ្លូវច្បាប់ និងគ្រប់គ្រាន់អស់ហើយ ដូចនេះបានជាសាលាឧទ្ធរណ៍តម្កល់»។
រហូតមកដល់ពេលនេះ លោក កឹម សុខា ត្រូវបានឃុំខ្លួនអស់រយៈពេលជាង៩ខែ ដោយមិនត្រូវបានអនុញ្ញាតឲ្យមានការចូលសួរសុខទុក្ខ ក្រៅពីមេធាវី និងក្រុមគ្រួសាររបស់លោកនោះទេ។
ក្រុមមេធាវីការពារក្ដីឲ្យលោកកឹម សុខាបានដាក់បណ្ដឹងតាមការស្នើរបស់លោក កឹម សុខា ទៅតុលាការគ្រប់ជាន់ថ្នាក់ជាបន្តបន្ទាប់ ដើម្បីសុំឲ្យលោកបាននៅក្រៅឃុំជាបណ្ដោះអាសន្ន ដើម្បីព្យាបាលជំងឺ ដោយមានភ្ជាប់ជាមួយវេជ្ជបញ្ជារបស់គ្រូពេទ្យពីប្រទេសសឹង្ហបុរី ឲ្យលោកកឹម សុខាទៅវះកាត់ និងព្យាបាលជំងឺផង។
ប៉ុន្តែតុលាការទាំងនោះបានច្រានចោលសំណើរបស់ក្រុមមេធាវី ដោយលើកហេតុផលថា ការបន្តឃុំខ្លួនលោកកឹម សុខាគឺដើម្បីបង្ការកុំឲ្យកើតមានបទល្មើសថ្មី និងរក្សាជនត្រូវចោទទុកជូនតុលាការចាត់ការតាមនីតិវិធី។ ចំណែកការព្យាបាល តុលាការអះអាងថា ពន្ធនាគារធ្វើតាមលទ្ធភាពដែលមាន និងមិនអាចអនុញ្ញាតឲ្យលោកកឹម សុខាចេញទៅព្យាបាលជំងឺនៅក្រៅប្រទេសបាននោះទេ។
VOA មិនអាចទាក់ទងសុំការអធិប្បាយពីអ្នកស្រី ម៉េង សុភារី និងលោក ចាន់ ចេន មេធាវីការពារក្តីឲ្យលោក កឹម សុខា ដើម្បីសាកសួរពីដំណើរការសវនាការនាព្រឹកនេះបានទេ។
លោក កឹម សុខា ត្រូវបានសមត្ថកិច្ចសម្រុកចូលចាប់ខ្លួនពីក្នុងផ្ទះទាំងកណ្ដាលយប់រំលងអាធ្រាត្រ កាលពីដើមខែកញ្ញា ឆ្នាំ២០១៧ ដោយចោទលោកពីបទ «ក្បត់ជាតិ» និងបញ្ជូនលោកទៅឃុំក្នុងពន្ធនាគារត្រពាំងផ្លុង នៅខេត្តត្បូងឃ្មុំ ដែលជាខេត្តមានព្រំប្រទល់ជាប់ប្រទេសវៀតណាម។
ក្រោយការចាប់ឃុំខ្លួនលោកកឹម សុខា គេឃើញស្ថាប័នអន្តរជាតិធំៗជាច្រើនបានប្រតិកម្ម និងរិះគន់រដ្ឋាភិបាលកម្ពុជាជាបន្តបន្ទាប់។
កាលពីដើមខែឧសភានេះ ក្រុមការងារអង្គការសហប្រជាជាតិទទួលបន្ទុកដោះស្រាយការឃុំខ្លួនដោយបំពាន និងអង្គការសហព័ន្ធអន្តរជាតិដើម្បីសិទ្ធិមនុស្ស បានហៅការចាប់ឃុំខ្លួនលោកកឹម សុខា ថា ជាទង្វើដែលគួរឲ្យអាម៉ាស់ និងអមនុស្សធម៌ ព្រមទាំងបានទាមទារឲ្យអាជ្ញាធរកម្ពុជាដោះលែងលោកជាបន្ទាន់។ ពួកគេថា ការឃុំខ្លួនលោកកឹម សុខាគឺជាការបំពានលើសេចក្ដីប្រកាសជាសកលស្ដីពីសិទ្ធិមនុស្ស និងកិច្ចព្រមព្រៀងអន្តរជាតិ។
ក្រៅពីក្រុមការងារអង្គការសហប្រជាជាតិទទួលបន្ទុកដោះស្រាយការឃុំខ្លួនដោយបំពាន និងសហព័ន្ធអន្តរជាតិដើម្បីសិទ្ធិមនុស្ស កន្លងមកក៏មានស្ថាប័ន និងអង្គការអន្តរជាតិធំៗជាច្រើនទៀត រួមមានសហគមន៍អឺរ៉ុប អង្គការឃ្លាំមើលសិទ្ធិមនុស្ស (Human Rights Watch) ក្រុមសមាជិកសភាអាស៊ានដើម្បីសិទ្ធិមនុស្ស ព្រមទាំងប្រទេសកាន់លទ្ធិប្រជាធិបតេយ្យធំៗមួយចំនួនទៀតក៏បានអំពាវនាវឲ្យរដ្ឋាភិបាលរបស់លោកនាយករដ្ឋមន្ត្រី ហ៊ុន សែន ដោះលែងលោក កឹម សុខា ជាបន្ទាន់ ដោយឥតលក្ខខណ្ឌ ដើម្បីធានាថា ការបោះឆ្នោតថ្នាក់ជាតិនាពេលខាងមុខ ប្រកបដោយសេរីភាព និងយុត្តិធម៌ពិតប្រាកដ។
យ៉ាងណាក៏ដោយ ក្រុមមន្រ្តីជាន់ខ្ពស់រដ្ឋាភិបាលកម្ពុជាបានច្រានចោលការលើកឡើងរបស់ស្ថាប័នអន្តរជាតិទាំងនោះ និងថា រដ្ឋាភិបាលកំពុងអនុវត្តច្បាប់ ស្របតាមនីតិរដ្ឋ៕