រដ្ឋាភិបាលសហរដ្ឋអាមេរិកបានបង្ហាញការសោកស្ដាយ «យ៉ាងខ្លាំង» ចំពោះការសម្រេចរបស់រដ្ឋាភិបាលកម្ពុជាដែលមិនអនុញ្ញាតឲ្យគណបក្សសង្គ្រោះជាតិ ដែលត្រូវបានរំលាយ ចូលរួមនៅក្នុងការបោះឆ្នោតនៅខែកក្កដា ឆ្នាំ ២០១៨ ខាងមុខនេះ។ នេះបើយោងតាមសេចក្ដីប្រកាសព័ត៌មានរបស់ការិយាល័យអ្នកនាំពាក្យក្រសួងការបរទេសសហរដ្ឋអាមេរិក ដែល VOA ទទួលបានកាលពីថ្ងៃព្រហស្បតិ៍។
លោកស្រី Heather Nauert អ្នកនាំពាក្យក្រសួងការបរទេស បានបញ្ជាក់បន្ថែមក្នុងសេចក្ដីប្រកាសព័ត៌មានដែលបានចេញផ្សាយកាលពីទី១៧ ខែឧសភានេះថា៖
«ការសម្រេចរបស់រដ្ឋាភិបាលកម្ពុជានេះ បានរារាំងសិទ្ធិប្រជាធិបតេយ្យរបស់ប្រជាពលរដ្ឋខ្មែរដែលមានសិទ្ធិបោះឆ្នោតរាប់លាននាក់ មិនឲ្យមានលទ្ធភាពបោះឆ្នោតឲ្យបេក្ខជនដែលខ្លួនពេញចិត្ត និងធ្វើឲ្យមានមន្ទិលសង្ស័យចំពោះសុចរិតភាពនៃដំណើរការបោះឆ្នោត»។
ជំហររបស់រដ្ឋាភិបាលសហរដ្ឋអាមេរិកកើតមាន ឡើងក្រោយពីគណៈកម្មាធិការជាតិរៀបចំការបោះឆ្នោតបានបិទបញ្ចប់ការចុះបញ្ជីឈ្មោះគណបក្សនយោបាយ កាលពីថ្ងៃទី១៤ ខែឧសភាដោយគ្មានគណបក្សសង្គ្រោះជាតិចូលរួម។
ក្រសួងការបរទេសបានបន្ថែមថា៖ «យើងទទូចឱ្យរដ្ឋាភិបាលកម្ពុជាប្រគល់សិទ្ធិឲ្យបេក្ខជនគណបក្សសង្គ្រោះជាតិឡើងវិញជាបន្ទាន់»។
សហរដ្ឋអាមេរិកក៏គាំទ្រការសម្រេចកាលពីពេលថ្មីៗនេះរបស់ក្រុមការងារអង្គការសហប្រជាជាតិទទួលបន្ទុកកិច្ចការឃុំខ្លួនដោយខុសច្បាប់ ដែលបានបញ្ជាក់ថា «ការឃុំខ្លួនលោក កឹម សុខា មេដឹកនាំគណបក្សសង្គ្រោះជាតិ គឺជាអំពើខុសច្បាប់» ហើយសហរដ្ឋអាមេរិក «អំពាវនាវសារជាថ្មីឲ្យមានការដោះលែងរូបលោកជាបន្ទាន់»។
គណបក្សសង្គ្រោះជាតិត្រូវបានតុលាការកំពូលរំលាយកាលពីខែវិច្ឆិកាឆ្នាំមុន ដោយសារលោក កឹម សុខា ដែលជាមេដឹកនាំគណបក្សនេះ ត្រូវបានចោទប្រកាន់ថាប្រព្រឹត្តអំពើក្បត់ជាតិ។
ការបោះឆ្នោតថ្នាក់ជាតិនៅកម្ពុជានឹងធ្វើឡើងនៅថ្ងៃទី ២៩ ខែកក្កដា ខាងមុខនេះ៕
