មេដឹកនាំក្រុមប្រឆាំងដែលអភិរក្សនិយមក្នុងប្រទេសក្រិក គឺលោក Kyriakos Mitsotakis បានទទួលជោគជ័យភ្លូកទឹកភ្លូកដីលើលោកនាយករដ្ឋមន្ត្រី Alexis Tsipras នៅក្នុងការបោះឆ្នោតសភាជាតិកាលពីថ្ងៃអាទិត្យហើយគ្រោងនឹងចូលកាន់តំណែងនៅថ្ងៃចន្ទនេះ។
ដោយមានសន្លឹកឆ្នោតជាង៩០ភាគរយបានរាប់រួចហើយគឺគណបក្សប្រជាធិបតេយ្យថ្មីរបស់លោក Mitsotakis ទទួលបានសន្លឹកឆ្នោតចំនួន៣៩,៨ភាគរយ រីឯគណបក្ស Syriza របស់លោក Tsipras ទទួលបាន៣១,៦ភាគរយ។
លោក Tsipras ដែលមានអាយុ៤៤ឆ្នាំត្រូវបានពលរដ្ឋបោះឆ្នោតទម្លាក់ពីមេដឹកនាំនៃប្រទេសក្រិកបន្ទាប់ពីកាន់អំណាចបានបួនឆ្នាំ។ លោកបានទូរស័ព្ទទៅលោក Mitsotakis ដោយព្រមទទួលចុះចាញ់ហើយបានអបអរសាទរជ័យជម្នះរបស់លោក Mitsotakis ផងដែរ។
លោក Mitsotakis បានថ្លែងនៅក្នុងសុន្ទរកថាជោគជ័យរបស់លោកថា៖
«ខ្ញុំបានស្នើសុំអាណត្តិដ៏ខ្លាំងមួយដើម្បីផ្លាស់ប្តូរប្រទេសក្រិក។ អ្នកទាំងអស់គ្នាបានផ្តល់ជូនដោយក្តីសប្បុរស។ ចាប់ពីថ្ងៃនេះតទៅ ការប្រយុទ្ធប្រកបដោយការលំបាកប៉ុន្តែល្អប្រសើរចាប់ផ្តើមហើយ... ពលរដ្ឋក្រិកសក្តិសមទទួលបានអ្វីៗដែលល្អជាងនេះហើយពេលវេលាបានមកដល់សម្រាប់យើងបង្ហាញការពិតហើយ»។
លោក Mitsotakis បានបញ្ចប់ការសិក្សាពីសាកលវិទ្យាល័យ Harvard នៅសហរដ្ឋអាមេរិក។ គណបក្សរបស់លោកទទួលបានអាសនៈចំនួន១៥៨ដែលជាចំនួនភាគច្រើននៅក្នុងសភាជាតិដែលមានចំនួន៣០០អាសនៈ។
លោកជាកូនប្រុសតែមួយគត់របស់លោក Konstantinos Mitsotakis អតីតនាយករដ្ឋមន្ត្រី និងជាប្អូនប្រុសរបស់លោកស្រីអតីតរដ្ឋមន្ត្រីការបរទេស Theodora “Dora” Bakoyanni និងជាឪពុកមារបស់ចៅហ្វាយក្រុងអាថែនដែលទើបជាប់ឆ្នោតថ្មីៗនេះ។
លោក Mitsotakis បានសន្យាថានឹងបង្កើតការងារឱ្យបានប្រសើរជាងពេលបច្ចុប្បន្ន តាមរយៈការទាក់ទាញវិនិយោគទុនបរទេស ការកាត់បន្ថយពន្ធដារ និងលុបចោលឧបសគ្គនានាចំពោះអ្នកធ្វើជំនួញ៕