ចំនួនមនុស្សស្លាប់នៅក្នុងប្រទេសអ៊ីតាលីដោយសារមេរោគកូរ៉ូណាមានចំនួន៧នាក់ដោយមានការឆ្លងជាង២០០ករណី។
យ៉ាងហោចណាស់មានទីក្រុងចំនួន១០នៅភាគខាងជើងត្រូវបិទចរាចរហើយកងទ័ពបានការពារមិនឲ្យមាននរណាម្នាក់ចេញចូលទីក្រុងនោះទេ កំឡុងពេលបិទដើម្បីត្រួតពិនិត្យនេះ។
អាជ្ញាធរអ៊ីតាលីកំពុងធ្វើការពេញ២៤ម៉ោងក្នុងមួយថ្ងៃដើម្បីចាត់វិធានការដែលមិនធ្លាប់មានពីមុនមកក្នុងកិច្ចប្រឹងប្រែងទប់ស្កាត់ការឆ្លងមេរោគនេះ។ យ៉ាងហោចណាស់តំបន់ឧស្សាហកម្មចំនួន៦នៅភាគខាងជើងប្រទេសអ៊ីតាលី និងសាលារៀនហើយនិងសាកលវិទ្យាល័យត្រូវបិទ។
បុគ្គលិកមិនអាចទៅធ្វើការទេ ហើយត្រូវបញ្ជាឲ្យស្នាក់នៅក្នុងផ្ទះឱ្យបានច្រើនតាមតែអាចធ្វើទៅបាន។ រោងភាពយន្ត សារមន្ទីរ បារនិងកន្លែងរាំងឌីស្កូត្រូវបានបិទ។ ពិធីបុណ្យនៅទីក្រុង Venice ត្រូវបានកាត់បន្ថយជាលើកដំបូងមិនធ្លាប់មាន។
អាជ្ញាធរបានហាមឃាត់រាល់ការធ្វើបាតុកម្ម និងការប្រមូលផ្តុំជាសាធារណៈ រួមទាំងកម្មវិធីកីឡានិងការជួបជុំនៅព្រះវិហារ ខណៈប្រទេសអ៊ីតាលីកំពុងទប់ទល់ការរាលដាលមេរោគនេះច្រើនបំផុតនៅអឺរ៉ុប។ និស្សិតសាកលវិទ្យាល័យនៅតំបន់ដែលរងផលប៉ះពាល់មិនអាចទៅប្រឡងបានទេ។
លោក Andrea Borrelli ប្រធាននាយកដ្ឋានការពារជនស៊ីវិលរបស់ប្រទេសអ៊ីតាលី បាននិយាយថា អាជ្ញាធរមានការភ្ញាក់ផ្អើលចំពោះការរីករាលដាលយ៉ាងលឿននៃមេរោគនេះ។ លោកបានមាននិយាយថា អំពីផែនការឃាត់អ្នកដែលបានឆ្លងមេរោគនេះឲ្យនៅដាច់ពីគេ។
អ្នកលក់ម៉ាស់ម្នាក់នៅខាងក្រៅស្ថានីយរថភ្លើងក្រុង Milan បាននិយាយថា គាត់លក់ម៉ាសមួយតម្លៃ១១ដុល្លារ៕