ក្រុមអ្នកគាំទ្រគណបក្សសង្គ្រោះជាតិនៅប្រទេសបារំាងគ្រោងរៀបចំពិធីអបអរសាទរនៅថ្ងៃសៅរ៍ក្នុងទីក្រុងប៉ារីសដល់លោកសម រង្ស៊ី មេដឹកនាំអតីតបក្សប្រឆាំងដែលបានទទួលពានរង្វាន់ជាជើងឯកប្រជាធិបតេយ្យចំពោះវីរភាពនិងការតស៊ូដើម្បីសិទ្ធិមនុស្សនិងលទ្ធិប្រជាធិបតេយ្យនៅកម្ពុជា។
ពានរង្វាន់នេះត្រូវបានផ្តល់ឲ្យដោយអង្គការកូរ៉េឈ្មោះ វេទិកាសិទ្ធិមនុស្ស និងសន្តិភាព អាស៊ី។
លោកសុក សុផាត ប្រធានសាខាគណបក្សសង្គ្រោះជាតិនៅប្រទេសបារំាងបានបញ្ជាក់ប្រាប់វីអូអេថា៖
«ការដែលគាត់ទទួលរង្វាន់ហ្នឹងគឺជាទីមួយកិត្តិយសអ្នកប្រជាធិបតេយ្យទាំងអស់ទាំងអ្នកនៅបរទេសទាំងនៅខាងក្នុងប្រទេស។ ទីពីរគឺដើម្បីឱ្យបងប្អូនខ្មែរយើងដែលមិនទាន់យល់ច្បាស់ យល់ថែមទៀតគឺមានតែលទ្ធិប្រជាធិបតេយ្យទេដែលនាំឱ្យស្រុកយើងទៅមុខ»។
កាលពីសប្តាហ៍មុន ក្រុមអ្នកប្រជាធិបតេយ្យខ្មែរដែលមកពីប្រទេសជាច្រើនរួមទាំងប្រទេសកម្ពុជាផងបានជួបជុំគ្នារយៈពេលបីថ្ងៃនៅទីក្រុងក្វាងជូ ប្រទេសកូរ៉េខាងត្បូងដើម្បីផ្លាស់ប្តូរយោបល់និងទស្សនៈពីបញ្ហានយោបាយនិងជជែកពិភាក្សាផ្តល់គំនិតជាអនុសាសន៍គន្លឹះដើម្បីស្វែងរកដំណោះស្រាយនិងដើម្បីជំរុញឱ្យមានការស្តារនិងពង្រឹងលទ្ធិប្រជាធិបតេយ្យនៅកម្ពុជាដោយផ្តោតលើប្រធានបទធំៗពីរគឺ «ប្រជាធិបតេយ្យនៅកម្ពុជាបានដើរមកដល់ផ្លូវទាល់ តើគួរធ្វើយ៉ាងណាដើម្បីទាញដំណើរវិវត្តន៍នៃប្រជាធិបតេយ្យខ្មែរឱ្យងាកមកលើផ្លូវត្រូវវិញ» និង«ការបន្តវេននិងវប្បធម៌នយោបាយថ្មីសម្រាប់កម្ពុជា»។
ការជួបជុំនោះក៏មានការធ្វើមហាបាតុកម្មអុចទៀនដើម្បីទាមទារលទ្ធិប្រជាធិបតេយ្យនិងឱ្យលោកនាយករដ្ឋមន្ត្រីហ៊ុន សែនចុះចេញពីតំណែង ហើយមានការចូលរួមពីពលករខ្មែរដែលធ្វើការនៅប្រទេសកូរ៉េខាងត្បូងជាច្រើនពាន់នាក់ផងដែរ។
លោកសុក សុផាត បានបន្ថែមថា៖
«យើងប្រជុំគ្នាហ្នឹងយើងបានសម្រេចថាគោលការណ៍ប្រជាធិបតេយ្យហ្នឹងរបៀបម៉េច ហើយបើថ្ងៃណាមួយយើងទាំងអស់គ្នាដែលជាអ្នកនៅក្នុងសមាជហ្នឹង បានទៅដឹកនាំស្រុកយើងគឺយើងអនុវត្តលទ្ធិប្រជាធិបតេយ្យមែនទែនជាគោលការណ៍។ ដូច្នេះហើយជាសក្ខីភាពដែលលោកប្រធានបានទទួលរង្វាន់ជើងឯកប្រជាធិបតេយ្យ ជាសក្ខីភាពគឺកិត្តិយសដល់គាត់គឺជាអ្នកប្រជាធិបតេយ្យខ្មែរយើងហ្នឹងគឺមានគោលការណ៍ដើម្បីដឹកនាំយើង ដឹកនាំពលរដ្ឋខ្មែរឱ្យស្គាល់លទ្ធិប្រជាធិបតេយ្យ»។
សេចក្តីសម្រេចរបស់សមាជនោះបានទាមទារឱ្យគោរពស្មារតីកិច្ចព្រមព្រៀងសន្តិភាពទីក្រុងប៉ារីស ការចរចាជាមួយនឹងសហគមន៍អឺរ៉ុបនិងសហគមន៍អន្តរជាតិដើម្បីស្វែងរកដំណោះស្រាយនយោបាយ និងស្តារលទ្ធិប្រជាធិបតេយ្យឡើងវិញដើម្បីបញ្ចៀសទណ្ឌកម្មសេដ្ឋកិច្ចជាដើម។
លោកសម រង្ស៊ីប្រធានស្តីទីគណបក្សសង្គ្រោះជាតិបានបញ្ជាក់ប្រាប់ក្រុមអ្នកចូលរួមមហាបាតុកម្មភ្លើងទៀនជាច្រើនពាន់នាក់ថាការប្តេជ្ញាចិត្តមុនអ្វីៗទាំងអស់គឺត្រូវដណ្តើមយកប្រទេសកម្ពុជាមកពី ក្រុមគ្រួសារលោកនាយករដ្ឋមន្ត្រីហ៊ុន សែនដែលបានកាន់អំណាចជាង៣០ឆ្នាំមកហើយ។
លោកបានបន្ថែមថា៖
«ក្នុងន័យនេះខ្ញុំបានប្តេជ្ញាថាខ្ញុំនឹងវិលត្រឡប់ទៅប្រទេសកម្ពុជាក្នុងពេលឆាប់ៗនេះហើយខ្ញុំសូមបបួលក្មួយៗនៅ កូរ៉េឱ្យទៅប្រទេសកម្ពុជាជាមួយខ្ញុំ។ ព្រមទេ?»
សំណើរបស់លោកត្រូវបានក្រុមអ្នកចូលរួមស្រែកគាំទ្រថានឹងចូលរួមក្នុងដំណើរវិលវិញ។ លោកបានបន្ថែមថា៖
«ថ្ងៃនេះបងប្អូនរៀបចំឱ្យបានត្រឹមត្រូវ។ ខ្ញុំទៅមិនមែនឱ្យហ៊ុន សែនចាប់ខ្ញុំទេបងប្អូន។ មិនមែនឱ្យហ៊ុន សែនសម្លាប់ខ្ញុំទេបងប្អូន។ ខ្ញុំទៅជាមួយបងប្អូនក្មួយៗកូរ៉េ ក្មួយៗបងប្អូនពីប្រទេសថៃ។ ក្មួយៗគ្រប់ប្រទេសដែលធ្វើដំណើរជាមួយខ្ញុំ យើងទៅបំផុសកម្លាំងស្នេហាជាតិក្នុងប្រទេសកម្ពុជា។ យើងទៅកម្ពុជាទៅ ចាប់ហ៊ុន សែនឱ្យប្រជារាស្ត្រកាត់ទោសជនក្បត់ជាតិហ៊ុន សែន»។
គណបក្សប្រជាជនកម្ពុជារបស់លោកនាយករដ្ឋមន្ត្រីហ៊ុន សែន បានចាត់ទុកថាសមាជនោះគឺធ្វើក្រៅក្របខណ្ឌនៃច្បាប់ប្រទេសកម្ពុជាដែលគណបក្សកាន់អំណាចមិនយកចិត្តទុកដាក់ទេ។ ហើយបានបន្ថែមថាការលើកឡើងនានានៅក្នុងសេចក្តីសម្រេចរបស់សមាជនោះគឺគ្រាន់តែជាសារដដែលៗដែលគណបក្សកាន់អំណាចមិនឆ្លើយឆ្លងជាមួយទេ។
លោកសួស យ៉ារ៉ា អ្នកនាំពាក្យគណបក្សបានបន្ថែមប្រាប់វីអូអេថា៖
«ទីមួយយើងមិនចង់ប្រើពាក្យថាអ្នកដែលនៅក្រៅច្បាប់ហើយយើងក៏មិនចង់ហៅឈ្មោះគាត់ទៀតដែរក៏ប៉ុន្តែគាត់ត្រូវអនុវត្តច្បាប់សិន ចាំគាត់និយាយគេ។ ទីពីរយើងទាំងអស់គ្នាយល់ឃើញថាប្រទេសកម្ពុជាមានសុខសន្តិភាពតាមបែបកម្ពុជាហើយ។ អីចឹងជនណាដែលនៅក្រៅច្បាប់ហើយលើកឡើងសំណើឬពាក្យចាក់រុកទាំងឡាយ ឬក៏សុភាពរាបសារទាំងឡាយនេះគឺជាល្បិចកលណាមួយដែលចង់បំផ្លិចបំផ្លាញសន្តិភាពនៅ កម្ពុជា។ អីចឹងសម្រាប់កម្ពុជាការបង្រួបបង្រួមគឺស្ថិតនៅក្នុងក្របខណ្ឌកម្ពុជារួចទៅហើយ ហើយប្រជាជនក៏កំពុងតែចូលរួមនិងរីករាយនូវអ្វីដែលសន្តិភាពកំពុងទទួលបាន។ អីចឹងដូច្នេះនិយាយឱ្យចំទៅគឺយើងមិនគិតមិនគូមិនពិចារណានូវសម្តី ដែលគ្មានខ្លឹមសារសម្រាប់ធ្វើការពិចារណាអ្វីទៅថ្ងៃអនាគតទេ»។
រូបឯកសារ៖ លោក សួស យ៉ារ៉ា អ្នកនាំពាក្យគណបក្សប្រជាជនកម្ពុជា ថ្លែងក្នុងពិធីសាធារណៈមួយកាលពីឆ្នាំ២០១៥។ (ទីភ្នាក់ងារព័ត៌មានកម្ពុជា AKP)
មន្ត្រីអតីតគណបក្សប្រឆាំងនិងសកម្មជនគាំទ្រមិនអាចធ្វើសកម្មភាពនយោបាយអ្វីនៅក្នុងប្រទេសកម្ពុជាទេក្រោយពីការរំលាយគណបក្សនេះកាលពីចុងឆ្នាំ២០១៧។ ប៉ុន្តែពលករចំណាកស្រុកកម្ពុជាដែលធ្វើការនៅប្រទេសកូរ៉េខាងត្បូងបានធ្វើបាតុកម្មជាបន្តបន្ទាប់ពីបញ្ហានយោបាយ។
កញ្ញារស់ សុផល ពលការិនីនៅក្នុងប្រទេសកូរ៉េខាងត្បូងនិងជាអ្នករៀបចំសមាជនិងមហាបាតុកម្មបានបញ្ជាក់ប្រាប់វីអូអេក្នុងកម្មវិធីហេឡូវីអូអេថា៖
«មហាបាតុកម្មភ្លើងទៀននេះខ្ញុំចង់បញ្ជាក់ទៅដល់បងប្អូនជនរួមជាតិថាគឺជាការបង្ហាញអំពីកម្លាំងសាមគ្គីអ្នកជាតិនិយម អ្នកប្រជាធិបតេយ្យហើយយើងមើលឃើញថាលោកហ៊ុន សែនដែលជាគណបក្សកាន់អំណាចបច្ចុប្បន្នហ្នឹងគឺគាត់ភ័យខ្លាចខ្លាំងណាស់ចំពោះកម្លាំងសាមគ្គីអ្នកប្រជាធិបតេយ្យ ដល់ថ្នាក់លោកហ៊ុន សែនផ្ទាល់និយាយទៅកាន់ពលរដ្ឋថាងើបមួយវាយមួយងើបពីរវាយពីរ។ ហើយមួយវិញទៀតមហាបាតុកម្មរបស់យើងខ្ញុំមើលឃើញថាដើម្បីលើកទឹកចិត្តនិងបណ្តុះនូវពង្រីកឆន្ទៈមនសិការដល់ពលរដ្ឋខ្មែរនៅក្នុងស្រុកឱ្យពួកគាត់មានស្មារតីប្រយុទ្ធនឹងមេដឹកនាំផ្តាច់ការនិងរំលោភសិទ្ធិមនុស្ស»។
លោកស្រីមូរ សុខហួរអនុប្រធានគណបក្សសង្គ្រោះជាតិមើលឃើញថាពលករទាំងនោះមានឆន្ទៈមោះមុត គោលដៅច្បាស់លាស់និងការទទួលខុសត្រូវខ្ពស់ក្នុងការចង់បានលទ្ធិប្រជាធិបតេយ្យនិងសិទ្ធិមនុស្សកើតឡើងជាថ្មីនៅកម្ពុជាទើបពួកគេអាចធ្វើសកម្មភាពបានដោយគ្មានខ្លាចការគំរាមកំហែង៕