ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

បក្ស​ប្រជាជន​នឹង​គ្រប់គ្រង​អាសនៈ​ជាង​៤​ពាន់​នៅ​ថ្នាក់​ក្រោម​ជាតិ​ ក្នុង​ការ​បោះ​ឆ្នោត​ខែ​ក្រោយ


រូបភាព​ឯកសារ៖ សមាជិក​ក្រុម​ប្រឹក្សា​សង្កាត់​មួយ​រូប​បង្ហាញ​លិខិត​ស្នាម​របស់​លោក​ដល់​មន្ត្រី​បោះ​ឆ្នោត ​ការិយាល័យ​បោះ​ឆ្នោត​ព្រឹទ្ធសភា​​ ដែល​ជា​ការ​បោះឆ្នោត​អសកល​ផង​ដែរ ​កាល​ពី​ថ្ងៃទី២៥ ​ខែកុម្ភៈ ​ឆ្នាំ២០១៨។ ​(អូន ឆេងប៉រ/VOA)

កម្ពុជា​នឹង​រៀបចំ​ការ​បោះឆ្នោត​មួយ​ទៀត គឺ​ការ​បោះឆ្នោត​ក្រុមប្រឹក្សា​រាជធានី ខេត្ត​ ក្រុង ស្រុក ខណ្ឌ នៅ​ក្នុង​ខែ​ឧសភា ខាង​មុខ​នេះ ដោយ​មិន​មាន​វត្តមាន​គណបក្ស​សង្គ្រោះ​ជាតិ​ដែល​ត្រូវ​បាន​រំលាយ​ចោល និង​ធ្លាប់​មាន​សំឡេង​ប្រកួតប្រជែង​ជាមួយ​គណបក្ស​កាន់​អំណាច។

នៅ​ថ្ងៃ​ទី​២៦ ខែ​ឧសភា ឆ្នាំ​២០១៩ ខាង​មុខ​នេះ សមាជិក​ក្រុមប្រឹក្សា​ចំនួន​៥​នាក់ ក្នុង​សង្កាត់​ត្រើយ​កោះ ក្រុង​កំពត ខេត្ត​កំពត ដែល​ជា​តំបន់​ផលិត​អំបិល នឹងទៅ​ចូលរួម​បោះ​ឆ្នោត​ក្រុមប្រឹក្សា​រាជធានី ខេត្ត​ ក្រុង ស្រុក ខណ្ឌ ដែល​ជា​ការ​បោះ​ឆ្នោត​មួយ​ប្រជាជន​កម្ពុជា​តិចតួច​ណាស់​យក​ចិត្ត​ទុកដាក់ និង​ចាប់​អារម្មណ៍។

លោក ​ពៅ សុន​ ចៅ​សង្កាត់​ត្រើយ​កោះ ដែល​ជា​អង្គ​បោះ​ឆ្នោត​ម្នាក់​ មក​ពី​គណបក្ស​ប្រជាជន​កម្ពុជា បាន​ថ្លែង​ប្រាប់ ​VOA​ ថា ​លោក​នឹង​ទៅ​បោះ​ឆ្នោត​ឲ្យ​គណបក្ស​ប្រជាជន​កម្ពុជា ដោយ​សារ​លោក​ជា​សមាជិក​គណបក្ស។ លោក​បន្ថែម​ថា លោក​សង្ឃឹម​ថា សហការី​របស់​លោក​ទាំង​៤​នាក់​ទៀត ដែល​ជា​សមាជិក​ក្រុមប្រឹក្សា​សង្កាត់​នេះ នឹង​សម្រេច​ចិត្ត​ដូច​រូប​លោក​ផង​ដែរ។

លោក ពៅ សុន ចៅ​សង្កាត់​ត្រើយកោះ ក្នុង​ក្រុង​កំពត ខេត្ត​កំពត​បាន​ផ្តល់​បទសម្ភាសន៍​ដល់ VOA នៅ​ផ្ទះ​របស់​លោក។ (ស៊ុន ណារិន/VOA)
លោក ពៅ សុន ចៅ​សង្កាត់​ត្រើយកោះ ក្នុង​ក្រុង​កំពត ខេត្ត​កំពត​បាន​ផ្តល់​បទសម្ភាសន៍​ដល់ VOA នៅ​ផ្ទះ​របស់​លោក។ (ស៊ុន ណារិន/VOA)

លោក ពៅ សុន ដែល​បាន​ធ្វើ​ជា​ចៅ​សង្កាត់​ជាង​២០​ឆ្នាំ​មក​ហើយ បាន​ថ្លែង​នៅ​ផ្ទះ​របស់​លោក​ថា៖ «៥​នាក់​នេះ បើ​យើង​គិត​ទៅ បើ​បោះ​ឆ្នោត​អាណត្តិ​ក្រោយ​ទៀត គឺ​គាត់​ត្រូវ​បោះ​ឆ្នោត​ឲ្យ​គណបក្ស​ប្រជាជន​ហើយ ព្រោះ​គាត់​នៅ​ក្នុង​គណបក្ស​ប្រជាជន​ទាំង​អស់»។

ប៉ុន្តែ​គណបក្ស​ប្រជាជន​កម្ពុជា​ដែល​ជា​គណបក្ស​កាន់​អំណាច​បាន​អះអាង​ថា នឹង​ឈ្នះ​អាសនៈលើស​លប់ ក្នុង​ចំណោម​អាសនៈ​សរុប​ទាំង​អស់​ចំនួន​៤.១១៤ ខណៈ​អវត្តមាន​គណបក្ស​ប្រឆាំង​ដ៏​ធំ​នៅ​កម្ពុជា គឺ​គណបក្ស​សង្គ្រោះ​ជាតិ ដែល​ត្រូវ​បាន​រំលាយ​ចោល​កាល​ពី​ខែ​វិច្ឆិកា ឆ្នាំ​២០១៧។

អ្នក​នាំ​ពាក្យ​គណបក្សប្រជាជន​កម្ពុជា លោក សុខ ឥសាន ​មាន​ប្រសាសន៍​ថា បើ​តាម​ចំនួន​ក្រុមប្រឹក្សា​ដែល​គណបក្ស​របស់​លោក​មាន គណបក្ស​ប្រជាជន​កម្ពុជារំពឹង​ថា ​នឹង​ឈ្នះ​ច្រើន​លើស​លប់។

លោក​មាន​ប្រសាសន៍​ថា៖ «បើ​តាម​តួលេខ​នេះ គណបក្ស​ប្រជាជន​ទទួល​បាន​អាសនៈ​ច្រើន​លើស​លប់​នៅ​ក្នុង​អាសនៈ​ក្រុមប្រឹក្សា​រាជធានី​ខេត្ត ក្រុង ស្រុក​ខណ្ឌ​នេះ​ឯង»។

នេះ​ជា​លើក​ទី​៣​ហើយ ​នៃ​ការ​បោះ​ឆ្នោតដែល​ធ្វើ​ឡើង​ក្នុង​រយៈ​ពេល​៥​ឆ្នាំ​ម្តង​មួយ​នេះ។ ហើយ​ការ​បោះឆ្នោត​ខាង​មុខនេះ​ គឺ​បន្ទាប់​ពី​ការ​បោះ​ឆ្នោត​ក្រុមប្រឹក្សា​ឃុំ​សង្កាត់ ដែល​ធ្វើ​ឡើង​កាល​ពី​ខែ​មិថុនា ឆ្នាំ​២០១៧ ការ​បោះឆ្នោត​ព្រឹទ្ធសភា ដែល​ធ្វើ​ឡើង​កាល​ពី​ខែ​កុម្ភៈ ឆ្នាំ​២០១៨ និង​ការ​បោះ​ឆ្នោត​រដ្ឋសភា ដែល​ជា​ការ​បោះឆ្នោត​ធំ​ជាង​គេ និង​ធ្វើ​ឡើង​កាល​ពី​ខែកក្កដា ឆ្នាំ​២០១៨។

អង្គ​បោះ​ឆ្នោត​សម្រាប់​ការ​បោះ​ឆ្នោត​មួយ​នេះ គឺ​ជា​សមាជិក​ក្រុមប្រឹក្សា​សរុបទាំង​អស់​ចំនួន​១១.៥៧២​នាក់ ដែល​ត្រូវ​បាន​ពលរដ្ឋ​បោះ​ឆ្នោត​ជ្រើសរើស​កាល​ពី​ជិត​២​ឆ្នាំ​មុន។ នេះ​ជា​ការ​បោះ​ឆ្នោត​មួយ​ ដែល​ប្រជាពលរដ្ឋ​មិន​មែន​ជា​អ្នក​បោះ​ជ្រើសរើស​ដោយ​ផ្ទាល់​នោះ​ទេ។ ជា​ធម្មតា​ សមាជិក​ក្រុមប្រឹក្សា​មក​ពី​គណបក្ស​ណា​ត្រូវ​រំពឹង​ថា នឹងបោះ​ឆ្នោត​ឲ្យ​គណបក្ស​ខ្លួន​នោះ។

ក្នុង​ចំណោម​ក្រុមប្រឹក្សា​សរុប​ទាំង​អស់​នេះ គណបក្ស​សង្គ្រោះ​ជាតិ​ធ្លាប់​គ្រប់គ្រង​ចំនួន​៥.០០៧​នាក់ គឺ​ស្មើ​នឹង​៤៣​ភាគរយ មុន​ពេល​គណបក្ស​មួយ​នេះ​ត្រូវ​បាន​រំលាយ។ ប៉ុន្តែ​អាសនៈ​ទាំង​នេះ​ត្រូវ​បាន​បែង​ចែក​ឲ្យ​គណបក្ស​ផ្សេង ក្រោយ​គណបក្ស​សង្គ្រោះ​ជាតិ​ត្រូវ​បាន​រំលាយ​ ហើយ​គណបក្ស​ប្រជាជន​កម្ពុជា​ទទួល​បាន​ស្ទើរ​តែ​ទាំង​អស់។

នៅ​ក្នុង​ការ​បោះឆ្នោត​ខាង​មុខ អាសនៈ​ប្រកួត​ប្រជែង​នៅ​ថ្នាក់រាជធានី​ភ្នំពេញ និង​ខេត្ត​ទាំង​២៤ ​នេះ មាន​ចំនួន​៥៥៩។ អាសនៈ​សម្រាប់​ថ្នាក់ក្រុង ស្រុក​និង​ខណ្ឌ​ទាំង​អស់ មាន​ចំនួន​៣.៥៥៥។

បើ​តាម​គណៈ​កម្មាធិការ​ជាតិ​រៀប​ចំ​ការ​បោះ​ឆ្នោត ​គណបក្ស​នយោបាយ​ចំនួន​៧​ នឹងចូល​រួម​ឈរ​ឈ្មោះ​ក្នុង​ការ​បោះឆ្នោត​ ដោយ​ក្នុង​នោះ​មាន​គណបក្ស​ប្រជាជន​កម្ពុជា គណបក្ស​សញ្ជាតិ​កម្ពុជា​ គណបក្ស​ខ្មែរ​រួបរួម​ជាតិ​ គណបក្ស​រាជានិយម គណបក្សហ៊្វុនស៊ិនប៉ិច​ ​គណបក្ស​យុវជន​កម្ពុជា និង​គណបក្ស​ខ្មែរ​សាធារណរដ្ឋ។

សាលា​សង្កាត់​ត្រើយកោះ ស្ថិត​ក្នុង​ក្រុង​កំពត ខេត្តកំពត។ (ស៊ុន ណារិន/VOA)
សាលា​សង្កាត់​ត្រើយកោះ ស្ថិត​ក្នុង​ក្រុង​កំពត ខេត្តកំពត។ (ស៊ុន ណារិន/VOA)

នៅ​ពេល​សួរ​ពី​អវត្តមាន​របស់​គណបក្ស​សង្គ្រោះ​ជាតិ​នៅ​ក្នុង​ការ​បោះ​ឆ្នោត​នេះ លោក ពៅ សុន ចៅ​សង្កាត់​ត្រើយ​កោះ បាន​ស្ទាក់​ស្ទើរ​ក្នុង​ការ​ឆ្លើយ​តប។ ប៉ុន្តែ​លោក​បញ្ជាក់​ថា ប្រជាធិបតេយ្យ គឺ​ជា​ការ​ផ្តល់​អំណាច​ទៅ​ឲ្យ​ពលរដ្ឋ។

តែ​លោក​មិន​អាច​ពន្យល់​ការណ៍​ដែល​តំណាង​មក​ពី​គណបក្ស​សង្គ្រោះ​ដែល​ត្រូវ​បាន​ពលរដ្ឋ​បោះឆ្នោត​ឲ្យកាល​ពី​ខែ​មិថុនា ឆ្នាំ​២០១៧ មិន​អាច​ចូលរួម​បោះ​ឆ្នោត​បាន។

លោក​បាន​ថ្លែង​ថា៖ «ខ្ញុំ​មិន​សូវ​ជា​យល់​អី​ខ្លាំង​ដែរ ប៉ុន្តែ​ខ្ញុំ​គ្រាន់​តែ​គិត​ថា បើ​សិន​ជា​លទ្ធិ​ប្រជាធិបតេយ្យ យើង​យល់​ថា​ប្រជាជន​ជា​ធំ។ អ៊ីចឹង​បើ​សិន​ជា​ប្រជាជន​គាត់​យល់​ថា​ខាង​ណា​ល្អ ឬ​គណបក្ស​ណា​ល្អ គាត់​បោះ​ទៅ​ខាង​ហ្នឹង​ច្រើន។ អាហ្នឹង​ខ្ញុំ​គិត​ថា ​លទ្ធិប្រជាធិបតេយ្យ​ហើយ ដោយសារ​តែ​ការ​ចូលរួម​របស់​គាត់​ច្រើន។ បាន​ន័យ​ថា ​ការ​ពេញចិត្ត»។

មន្ត្រី​គណបក្ស​ប្រឆាំង​បាន​អះអាង​ថា ប្រសិន​បើ​គណបក្ស​សង្គ្រោះ​ជាតិ​អាច​ចូលរួម​បោះ​ឆ្នោត​មួយ​នេះ ពួកគេ​នឹង​ទទួល​បាន​ចំនួនអាសនៈ​ដែល​អាច​ប្រកួតប្រជែង​នឹង​គណបក្ស​ប្រជាជន​កម្ពុជា។

ឧទាហរណ៍​ដូច​ជា​នៅ​រាជធានី​ភ្នំពេញ ដែល​គណបក្ស​សង្គ្រោះ​ជាតិ​ទទួល​បាន​សំឡេង​គាំទ្រ និង​អាសនៈ​ច្រើន​ជាង​គណបក្ស​ប្រជាជន​កម្ពុជា​កាល​ពី​ការ​បោះ​ឆ្នោត​ក្រុមប្រឹក្សា​ឃុំ​សង្កាត់ គឺ​ប្រមាណ​៥៣​ភាគរយ ទល់​នឹង​៤៥​ភាគរយ។ គណបក្ស​សង្គ្រោះ​ជាតិ ទទួល​បានអាសនៈចំនួន​៤៦៨ ហើយ​គណបក្ស​ប្រជាជន​ចំនួន​៤៣១។ នេះ​មាន​ន័យ​ថា​ បេក្ខ​ជន​ឈរ​ឈ្មោះ​សម្រាប់​គណបក្ស​សង្គ្រោះ​ជាតិ​អាច​នឹងក្លាយ​ជា​ប្រធាន​ក្រុមប្រឹក្សា​រាជធានី​ភ្នំពេញ។

លោក ពៅ សុន មាន​ប្រសាសន៍​ថា ក្រុមប្រឹក្សា​ដែល​លោក​នឹង​បោះឆ្នោត​ឲ្យ ​មាន​សិទ្ធិ​ក្នុង​ការ​កោះ​ប្រជុំ និង​ដាក់​ផែន​ការ​ការងារ​សម្រាប់​ការ​អនុវត្ត។ លោក​បញ្ជាក់​ថា ក្រុមប្រឹក្សា​មិន​មាន​អំណាច​ដូច​ជា​អភិបាល ដែល​ជា​អ្នក​បំពេញ​ការងារ​ប្រចាំ​ថ្ងៃ។

លោក​បាន​ថ្លែង​ប្រាប់​ VOA ​ថា៖ «បើ​និយាយ​ពី​ក្រុម​ប្រឹក្សា​ រដ្ឋធានី ខេត្ត​ក្រុង​ហ្នឹង បាន​ន័យ​ថា គាត់​មាន​អំណាច​ដាក់​ផែន​ការ ប្រជុំ​ដាក់​ផែន​ការ​ទៅ​ឲ្យ​គណបក្ស​អភិបាល​ជា​អ្នក​អនុវត្ត។ អ៊ីចឹងគណៈអភិបាល​បាន​ទទួល​ផែន​ការ​អញ្ចឹង​មក។ ហើយ​គណៈអភិបាល​ក្រុង​ បាន​ផ្សព្វផ្សាយ​ចូល​មក​ក្រុម​ប្រឹក្សា​ឃុំ​សង្កាត់ ធ្វើ​បន្ត​អ៊ីចឹង​មក»។

តំណែង​អភិបាល​គ្រប់​ថ្នាក់ រួម​មាន​រាជធានី ខេត្ត​ ក្រុង ស្រុក ខណ្ឌ ត្រូវ​បាន​តែង​តាំង​ដោយ​រដ្ឋាភិបាល​ដែល​ដឹកនាំ​ប្រទេស។

លោក​ ពៅ សុន មាន​ប្រសាសន៍​ថា៖ «គណៈអភិបាល​គឺ​គាត់​រវល់ បើ​ខាង​ក្រុមប្រឹក្សា​ប្រហែល​ជា​មិន​សូវ​រវល់​ដូច​គណៈអភិបាល​ទេ ព្រោះ​អី​គាត់​ជា​អ្នក​ដាក់​ផែន​ការ ហើយ​អ្នក​ធ្វើ​ធម្មតា​ជួប​បញ្ហា​ច្រើន​ជាង​អ្នក​ដែល​ដាក់​ផែនការ​ឲ្យ​ធ្វើ»។

អតីត​មន្ត្រី​គណបក្ស​សង្គ្រោះ​ជាតិ ដែល​ជា​ថ្នាក់​ដឹកនាំ​ប្រចាំ​ខេត្ត​បាត់ដំបង លោក ជា ជីវ បាន​ថ្លែង​ប្រាប់ ​VOA​ ថា ការ​បោះ​ឆ្នោត​ដែលមិន​មានវត្តមាន​គណបក្ស​របស់​លោក មិន​អាច​ទទួល​យក​បាន ហើយ​នាំ​ឲ្យ​ខាត​បង់​ថវិកា​ជាតិ។ លោក​មាន​ប្រសាសន៍​ថា៖ «ដូច្នេះ​មិន​បាច់​ចាំ​រៀបចំ​ការ​បោះ​ឆ្នោត នាំ​តែ​ចំណាយ​ថវិកា​ជាតិ​ទេ។ គណបក្ស​កាន់​អំណាច​គួរ​តែ​ចាត់​ចែងរៀបចំ ធ្វើ​កិច្ច​ការ​ ហើយ​ចាត់​ចែងដាក់​តួនាទី​ទូទៅ​បណ្តោយ​ទៅ»។

លោក ជា ជីវ ដែល​ត្រូវ​បាន​កាត់​សិទ្ធិ​ធ្វើ​នយោបាយ​ចំនួន​៥​ឆ្នាំ ដូច​ថ្នាក់​ដឹកនាំ​ជាន់​ខ្ពស់​ផង​ដែរ បន្ទាប់​ពី​គណបក្ស​ត្រូវ​បាន​រំលោយ​មាន​ប្រសាសន៍​ថា បេក្ខ​ជន​គណបក្ស​របស់​លោក​អាច​នឹង​ឈ្នះ​តំណែង​ប្រធាន​ក្រុមប្រឹក្សា​សម្រាប់​ក្រុង​បាត់​ដំបង ប្រសិន​បើ​គណបក្ស​អាច​ចូលរួម​ប្រកួត​ប្រជែង ដោយសារ​គណបក្ស​មាន​ក្រុម​ប្រឹក្សា​សង្កាត់​ ច្រើន​ជាង​គណបក្ស​កាន់​អំណាច។

លោក ជា ជីវ ដែល​ធ្លាប់​មាន​បទ​ពិសោធន៍​ជា​សមាជិក​ក្រុមប្រឹក្សា​ខេត្ត​បាត់​ដំបង នៅ​ពេល​គណបក្ស​មិន​ទាន់​ត្រូវ​បាន​រំលាយ មាន​ប្រសាសន៍​ថា ក្រុមប្រឹក្សា​មិន​មាន​អំណាច​អ្វី​នោះ​ទេ គឺ​គ្រាន់​តែ​អាច​ប្រជុំ​ដើម្បី​ពិនិត្យ​មើល​ការងារ​តិចតួច​តែ​ប៉ុណ្ណោះ។ ប៉ុន្តែ​លោក​បញ្ជាក់​ថា អភិបាល​ខេត្ត​ត្រូវ​មាន​ការ​គាំទ្រ​ពី​សមាជិក​ក្រុម​ប្រឹក្សា​ខេត្ត​ទាំង​អស់​នៅ​ពេល​អនុវត្ត​ផែន​ការ​មួយ​ចំនួន។ លោក​ថា​ គណបក្ស​ប្រជាជន​មាន​សំឡេង​គ្រប់គ្រាន់​ក្នុង​ការ​សម្រេច​ការងារ​របស់​ពួកគេ។

លោក ជា ជីវ មាន​ប្រសាសន៍​ថា៖ «ក្រុមប្រឹក្សា​ខេត្ត​ឯកបក្ស​ទៀត​សោត ដូច្នេះ​គេ​ធ្វើ​ដូច​ជា​លក្ខណៈ​ជិះ​សេះ​លែង​ដៃ ធ្វើ​អ្វី​ស្រេច​តែ​ចិត្ត​នឹង​របស់​គេ គ្មាន​សំឡេង​ប្រឆាំង គ្មាន​សំឡេង​ស្ថាបនា។ ដូច្នេះ​ខ្ញុំ​ជឿ​ជាក់​ថា ​ក្រុមប្រឹក្សា​ខេត្ត​បង្កើត​មក​នា​ពេល​ខាង​មុខ វា​មិន​មាន​សារៈ​ប្រយោជន៍ ដើម្បី​ការពារ​ផល​ប្រយោជន៍​រួម​របស់​ប្រជាពលរដ្ឋ​ក្នុង​ខេត្ត ក៏​ដូច​ជាប្រជាពលរដ្ឋ​នៅ​ក្នុង​សហគមន៍​របស់​គេ​ទេ»។

គណបក្ស​ប្រជាជន​កម្ពុជា​បាន​គ្រប់គ្រង​អំណាច​គ្រប់​លំដាប់​ថ្នាក់ ក្រោយ​ការរំលាយ​គណបក្ស​សង្គ្រោះជាតិ រួម​មាន​ថ្នាក់​ព្រឹទ្ធសភា រដ្ឋសភា ថ្នាក់​ឃុំ​សង្កាត់ និង​ឈាន​ទៅ​គ្រប់គ្រង​ថ្នាក់​រាជធានី ខេត្ត​ ក្រុង ស្រុក ខណ្ឌ ក្រោយ​ការ​បោះឆ្នោត​ខាង​មុខ។

ទោះ​ជា​យ៉ាងណា ការ​បោះ​ឆ្នោត​មួយ​នេះ មិន​ជា​ការ​ចាប់​អារម្មណ៍​របស់​ប្រជាជន​នោះ​ទេ ហើយ​ពួកគេ​ក៏​មិន​មាន​ចំណេះ​ដឹង​ច្រើន​ទាក់ទង​នឹង​ការងារ​របស់​ក្រុមប្រឹក្សា​ផង​ដែរ។

លោក សូត្រ ពៅ អាយុ​៤៨​ឆ្នាំ ដែល​ជា​កម្មករ​ស្រែ​អំបិល​ម្នាក់​នៅ​ក្នុង​សង្កាត់​ត្រើយ​កោះ មាន​ប្រសាសន៍​ថា លោក​មិន​ដឹង​អំពី​ពេលវេលា​នៃ​ការ​បោះ​ឆ្នោត​ ហើយ​អ្វី​ទៅ​ជា​ការ​បោះ​ឆ្នោត​ក្រុមប្រឹក្សា​នេះ​នោះ​ទេ។ លោក​បាន​សួរ​ត្រឡប់​មក​វិញ​ថា លោក​ត្រូវ​ទៅ​បោះ​ឆ្នោត​ឬ​យ៉ាងណា?

ចំណែក​លោក ឆោម ចន្ធី ជា​ពលរដ្ឋម្នាក់​ទៀតនៅ​ក្នុង​សង្កាត់​ត្រើយ​កោះ មាន​ប្រសាសន៍​ថា​ លោក​ក៏​មិន​ដឹង​អំពី​ការ​បោះ​ឆ្នោត​នេះ ហើយ​ក៏មិន​ដឹង​តួនាទី​របស់​ក្រុមប្រឹក្សា​នោះ​ទេ។

បុរស​វ័យ​៥០​ឆ្នាំ​រូប​នេះមាន​ប្រសាសន៍​ថា លោក​ចង់​បានការ​បោះ​ឆ្នោត​ទាំង​អស់​ប្រព្រឹត្ត​ទៅ​ដោយ​រលូន។ លោក​បញ្ជាក់​ថា៖ «ខ្ញុំ​ថា​បោះ​ធ្វើ​ម៉េច​បោះ​ទៅ កុំ​ឲ្យ​វា​មាន​បញ្ហា​នឹង​គ្នា។ ចេះ​តែ​រលូន​ទៅ​មុខ​ ដឹកនាំ ធ្វើ​ម៉េច​ប្រទេស​យើង​ឲ្យ​បានរីក​ចម្រើន កុំ​ឲ្យ​វាមាន​សង្គ្រាម​ត​ទៅ​ទៀត។ ខ្ញុំ​ចង់​បាន​តែ​ប៉ុណ្ណឹង​ទេ ប្រជាពលរដ្ឋ»។

លោក ​ ចន្ធី​ ជា​អ្នកស៊ី​ឈ្នួល​គេ​ទទួល​ខុសត្រូវ​មើល​ថែ​ស្រែ​អំបិល ​មាន​ប្រសាសន៍​ថា លោក​មិន​ហ៊ាន​និយាយ​អំពី​នយោបាយ​នៅ​ពេល​នេះ​នោះ​ទេ។

លោក​មាន​ប្រសាសន៍​ថា៖ « អត់ហ៊ាន​និយាយ​ទេ​ការងារ​អស់​ហ្នឹង។ បាន​តែ​ម៉ា​ស្តាប់​ទុក​ក្នុង​ចិត្ត»។

ប៉ុន្តែ​លោក​ ចន្ធី លើក​ឡើង​ថា ​ប្រទេស​មាន​ការ​រីកចម្រើន​ ទាល់​តែ​មាន​សំឡេង​គណបក្ស​ប្រឆាំង។

លោក​មាន​ប្រសាសន៍​ថា៖ «អាហ្នឹង​ចឹង​ហើយ ត្រូវ​តែ​មាន​ការ​ដាស់​តឿន​គ្នា​ទៅ​វិញ​ទៅ​មក។ បើ​ទៅ​តែ​ឯង​សុទ្ធ ក៏​ទៅ​អត់​កើត​ដែរ»៕

XS
SM
MD
LG