បន្ទាប់ពីមានការបាក់ស្រុតផ្លូវមួយខ្សែក្នុងខណ្ឌមានជ័យ អាជ្ញាធរបានរួសរាន់ចុះជួសជុលផ្លូវនោះភ្លាមៗ ខណៈប្រជាពលរដ្ឋបានអំពាវនាវឱ្យអាជ្ញាធរគិតគូរពីគុណភាពសំណង់ដើម្បីបញ្ចៀសហានិភ័យដែលអាចកើតឡើងនៅថ្ងៃខាងមុខ។
កាលពីថ្ងៃចន្ទ ផ្លូវមួយខ្សែប្រវែង ១៤៧ ម៉ែត្រ ដែលជាប់ប្រឡាយទឹកចាស់មួយ បានបាក់ស្រុត ក្រោយមានការសា្តរប្រឡាយក្នុងរដូវវស្សានេះ។ ពលរដ្ឋមួយចំនួនដែលវីអូអបានសម្ភាសបានបញ្ជាក់ឱ្យដឹងថា ការបាក់ស្រុតផ្លូវនោះអាចបណ្តាលមកពីការកាយយកដីភក់ចេញពីប្រឡាយនោះជម្រៅជ្រៅ ដើម្បីទប់ទល់នឹងការធ្លាក់ភ្លៀងក្នុងពេលប៉ុន្មានថ្ងៃជាប់ៗគ្នាចុងក្រោយនេះ។
អ្នកស្រី ស៊ុន សុខឃីម អាយុ ៣៩ ឆ្នាំ ម្ចាស់ហាងបោកអ៊ុតនៅភូមិភ្នាត សង្កាត់ស្ទឹងមានជ័យ២ ទីដែលមានការបាក់ស្រុតផ្លូវបេតុងនោះ ប្រាប់វីអូអេនៅថ្ងៃអង្គារនេះថា ផ្លូវនោះមានសភាពប្រេះ ៣ទៅ៤ថ្ងៃមុនពេលបាក់ស្រុត ប៉ុន្តែអាជ្ញាធរមិនបានចុះមកមើលទេ បើទោះបីពលរដ្ឋរាយការណ៍ភាពមិនប្រក្រតីដែលបានកើតឡើងលើផ្លូវនោះទៅអាជ្ញាធរក៏ដោយ។ អ្នកស្រីស្នើឱ្យអាជ្ញាធរពន្លឿនការធ្វើផ្លូវដែលបាក់ស្រុតនោះឱ្យបានឆាប់ ដើម្បីងាយស្រួលក្នុងការរកស៊ីប្រចាំថ្ងៃ។
អ្នកស្រីថ្លែងថា៖ «បើសិនជាអាចឃើញស្នាមប្រេះអីកន្លែងណាមួយ ចង់សុំឱ្យគាត់រហ័សរហួនមកត្រួតពិនិត្យផង ព្រោះខាងនេះប្រេះឡើងបី ឬបួនថ្ងៃហើយ មានអ្នកខលទៅអាជ្ញាធរដែរ តែអត់ឃើញមកទេ រហូតបាក់។ បាក់ហើយ សុំសំណូមពរតែម៉្យាងទេ សុំធ្វើម៉េចឱ្យគាត់ជួយពន្លឿន ដោយសារយើងរកស៊ី យើងនៅផ្ទះជួលអត់ស្រួលទេ ពិបាក។ ប៉ះពាល់ខ្លាំងដែរ សម្រាប់ខ្ញុំនៅផ្ទះជួល។ ខ្ញុំបើកបោកអ៊ុត ដល់ពេលបាក់អ៊ីចឹងគឺបាត់ហើយភ្ញៀវ។ គាត់ពិបាកនឹងទៅមក ប៉ះពាល់ខ្លាំងដែរ មិនដឹងថា ពេលណាគាត់ធ្វើហើយបានដូចដើមវិញ»។
បើតាមម្ចាស់ហាងបោកអ៊ុតរូបនេះ មូលហេតុនៃការបាក់ស្រុតផ្លូវនេះទំនងមកពីការកាយយកដីភក់ចេញពីប្រឡាយច្រើនពេក។
កម្មករកំពុងតែជួសជុសផ្លូវដែលបាក់ស្រុត នៅរាជធានីភ្នំពេញ នាព្រឹកថ្ងៃទី២៤ ខែកញ្ញា ឆ្នាំ២០២៤។ (មាស ដា/វីអូអេ)
ពលរដ្ឋម្នាក់ទៀត គឺអ្នកស្រី រ័ត្ន ស្រីម៉ៅ អាយុ ៤៩ ឆ្នាំ រស់នៅទីតាំងនោះដែរ ប្រាប់វីអូអេថា អ្នកស្រីនៅតែមានការព្រួយបារម្ភពីគ្រោះថ្នាក់ដែលអាចកើតឡើងនាពេលខាងមុខ បើទោះបីភាគីអាជ្ញាធរបានចុះមកត្រួតពិនិត្យ និងណែនាំឱ្យពលរដ្ឋមានការប្រុងប្រយ័ត្ន ក្រោយមានការបាក់ស្រុតផ្លូវភ្លាមៗក៏ដោយ។
អ្នកស្រីថ្លែងថា៖ «ព្រួយ! ព្រួយបង! ព្រួយ! ខ្លាចវាមកទាំងអស់។ ខ្លាចវារញ្ជួយទាំងអស់គ្នា។ ខ្ញុំមិនទុកចិត្តដែរ រឿងដីស្រុត»។
ចំណែកលោក សុខ ខុន ដែលរស់ក្បែរទីតាំងដែលមានហេតុការណ៍បាក់ស្រុតផ្លូវនោះ បានឱ្យដឹងដែរថា កន្លងទៅក៏ធ្លាប់មានការបាក់ស្រុតដែរ តែតិចតួចមិនខ្លាំងដូចលើកនេះទេ។ លោកថា មូលហេតុនៃការបាក់ស្រុតផ្លូវនេះអាចបណ្តាលមកពីការជីកប្រឡាយជ្រៅពេក ខណៈចំណុចដែលបាក់ស្រុតនោះមានសភាពស្រុតខ្លាំង។
លោកថ្លែងថា៖ «ស្រុតកន្លែងដដែរៗហ្នឹង ទាល់តែគេសៀតថ្មកៀនៗហ្នឹងទៀតបានលែងបាក់។ តែអានេះមកពីគេជីកប្រឡាយច្រើនពេក»។
ប្រធានកម្មវិធីសិទ្ធិក្នុងទីក្រុងនៃអង្គការសមាគមធាងត្នោត លោក ស៊ាង មួយឡៃ យល់ថា រដ្ឋាភិបាលគួរតែបង្កើនការយកចិត្តទុកដាក់បន្ថែមលើគណនេយ្យភាព និងតម្លាភាព លើការប្រើប្រាស់ថិវកាសាងសង់ហេដ្ឋារចនាសម្ព័ន្ធ ជូនប្រជាពលរដ្ឋ ដើម្បីបញ្ចៀសឧប្បតិ្តហេតុបាក់ស្រុតផ្លូវ ដែលបានកើតឡើងនាពេលថ្មីៗនេះ ក្នុងសង្កាត់ស្ទឹងមានជ័យទី ២ នោះ។
លោកថ្លែងថា៖ «ពាក់ព័ន្ធជាមួយនឹងករណីតម្លាភាព គណនេយ្យភាពនៅក្នុងដំណើរការនៃការសាងសង់ផ្លូវអីនេះ ខ្ញុំគិតថា វាជាផ្នែកមួយសំខាន់ដែរ នៅក្នុងដំណើរការនៃអភិបាលកិច្ច ព្រោះបើខ្វះធាតុផ្សំណាមួយ ធ្វើឱ្យប្រជាពលរដ្ឋគាត់បាត់បង់នូវទំនុកចិត្ត ហើយបង្កើតឱ្យមានការរិះគន់ព្រោះ ប្រជាពលរដ្ឋគាត់ជាអ្នកខាត តាមរយៈការប្រើប្រាស់នៃថវិការបស់ពួកគាត់ ថវិកាជាតិហ្នឹង»។
ផ្លូវដែលបាក់ស្រុតក្នុងខណ្ឌមានជ័យកាលពីថ្ងៃចន្ទ។ រូបភាពថតនាព្រឹកថ្ងៃទី២៤ ខែកញ្ញា ឆ្នាំ២០២៤។ (មាស ដា/វីអូអេ)
បើតាមលោក ស៊ាង មួយឡៃ ករណីបាក់ស្រុតផ្លូវដែលបានកើតឡើងនៅពេលថ្មីៗនេះអាចជាមេរៀន សម្រាប់អ្នកពាក់ព័ន្ធ ក៏ដូចជាអាជ្ញាធរមូលដ្ឋានឈ្វេងយល់ពីបច្ចេកទេសនៃការសាងសង់សំណង់ផ្សេងៗ មិនថា នៅលើផ្ទៃដីដែលសម្បូរដោយខ្សាច់ ឬនៅជាប់នឹងប្រឡាយចាស់ៗដែលមិនទាន់មានការសង់សំណង់រឹងមាំអមទប់នឹងដងផ្លូវ។
អភិបាលរងសាលារាជធានីភ្នំពេញលោក កើត ឆែ បដិសេធមិនផ្តល់ការអត្ថាធិប្បាយ ដោយបានប្រាប់អ្នកយកព័ត៌មានឱ្យសំឡេងសហរដ្ឋអាមេរិក (វីអូអេ) សួរទៅអ្នកស្រី ដោ សម្ផស្ស នាយិកាទីចាត់ការរដ្ឋបាលសាលារាជធានីភ្នំពេញ និងជាអ្នកនាំពាក្យ។
អ្នកស្រី ដោ សម្ផស្ស ប្រាប់វីអូអេថា ផ្លូវដែលបាក់ស្រុតនេះមានអាយុកាលជាង២៤ឆ្នាំហើយ ហើយការបាក់ស្រុតនេះគឺដោយសារស្ថានភាពទឹកហូរច្រោះ។
អ្នកស្រីបន្ថែមថា បន្ទាប់ពីមានការបាក់ស្រុតភ្លាមៗ ខាងអភិបាលរាជធានីភ្នំពេញក៏បានចុះពិនិត្យ និងជំរុញឱ្យមានការជួសជុលផ្លូវនេះបានឆាប់រហ័សជូនប្រជាពលរដ្ឋផងដែរ៕