កងនាវារបស់សហរដ្ឋអាមេរិកប្រាប់ឲ្យដឹងថា នាវាពិឃាតរបស់ចិនបានបាញ់កាំរស្មីឡាស៊ែដាក់យន្តហោះយានល្បាតរបស់សហរដ្ឋអាមេរិក ខណៈដែលយន្តហោះនោះបានហោះកាត់សមុទ្រហ្វីលីពីន ដែលស្ថិតនៅចម្ងាយប្រហែល៦០០គីឡូម៉ែត្រភាគខាងលិចកោះ Guam កាលពីសប្តាហ៍មុន។
កងនាវាសហរដ្ឋអាមេរិកបានប្រាប់ឲ្យដឹងនៅក្នុងសេចក្តីថ្លែងការណ៍ថា នាវាចិន បានបាញ់រស្មីឡាស៊ែដាក់យន្តហោះអាមេរិកាំងធុន P-8A Poseidon ក្នុងរបៀបគ្រោះថ្នាក់និងមិនមានវិជ្ជាជីវៈ ខណៈដែលយន្តហោះ P-8A បានប្រតិបត្តិការនៅក្នុងដែនអាកាសអន្តរជាតិស្របទៅតាមច្បាប់អន្តរជាតិ។
នាវាសហរដ្ឋអាមេរិកប្រាប់ឲ្យដឹងទៀតថា សកម្មភាពរបស់ចិនជាការរំលោភ ក្រមសម្រាប់ការប្រឈមមុខដែលគ្មានផែនការគ្រោងទុកនៅសមុទ្រឬ CUES ជាកិច្ចព្រមព្រៀងពហុភាគីដែលបានធ្វើឡើងនៅឆ្នាំ២០១៤ ហើយក៏មិនស្របទៅតាមអនុសាសន៍នៃការយល់យោគគ្នារវាងក្រសួងការពារប្រទេសសហរដ្ឋ និងចិនស្តីពីសុវត្ថិភាពតាមអាកាស និងការប្រឈមគ្នាតាមសមុទ្រ។
កាំរស្មីឡាស៊ែនេះ ត្រូវតាមរកឃើញដោយយន្តហោះ P-8A ហើយគេមិនអាចមើលឃើញដោយភ្នែកទទេបានទេ។ កងនាវាសហរដ្ឋអាមេរិកបានប្រាប់ឲ្យដឹងទៀតថា «កាំរស្មីឡាស៊ែដែលមានកម្រិតស្មើនឹងអាវុធ អាចបណ្តាលឲ្យគ្រោះថ្នាក់ដល់ក្រុមអាកាសយាននិកនិងទាហានម៉ារីននិងប្រព័ន្ធនាវានិងយន្តហោះ»។
យន្តហោះ P-8A Poseidon ត្រូវបានដាក់ពង្រាយនៅមូលដ្ឋានទ័ពអាកាស Kadena នៅកោះអូគីណាវ៉ានៃប្រទេសជប៉ុន ហើយបានធ្វើកិច្ចប្រតិបត្តិការជាប្រចាំតាមសមុទ្រ និងស៊ើបយកការណ៍នៅក្នុងតំបន់កិច្ចប្រតិបត្តិការរបស់កងនាវាទី៧របស់សហរដ្ឋអាមេរិក៕