នាយករដ្ឋមន្ត្រីប្រទេសចិនលោក Li Keqiang បានផ្ញើលិខិតអបអរសាទរមួយច្បាប់ជូនសមភាគីរបស់លោកគឺនាយករដ្ឋមន្ត្រីអូស្ត្រាលីដែលទើបជាប់ឆ្នោតថ្មីលោក Anthony Albanese ដែលនេះជាការបញ្ចប់ការជាប់គាំងនៃទំនាក់ទំនងការទូតរវាងប្រទេសទាំងពីរដែលមានរយៈពេលប្រមាណមួយឆ្នាំមកហើយ។ នេះបើតាមការផ្សព្វផ្សាយរបស់ប្រព័ន្ធឃោសនារដ្ឋចិន ហើយដែលត្រូវបានរាយការណ៍ដោយទីភ្នាក់ងារព័ត៌មាន AFP។
ចិនបានកាត់ផ្តាច់ទំនាក់ទំនងការទូតនិងពាណិជ្ជកម្មជាមួយអូស្ត្រាលីនៅក្នុងសកម្មភាពនៃការខឹងសម្បាមួយកាលពីខែឧសភាឆ្នាំទៅ បន្ទាប់ពីមានការប៉ះទង្គិចគ្នាលើបញ្ហាមួយចំនួន ដែលរួមមានបញ្ហាសិទ្ធិមនុស្ស ចារកម្មនិងបញ្ហាប្រភពដើមនៃជំងឺកូវីដ១៩។
តាមទីភ្នាក់ងារព័ត៌មានស៊ីនហួ (Xinhua) ផ្លូវការនៃប្រទេសចិនបានរាយការណ៍ថា លោកLiបាននិយាយថា៖ «ភាគីចិនត្រៀមខ្លួនធ្វើការជាមួយភាគីអូស្ត្រាលីដើម្បីពិនិត្យមើលឡើងវិញជុំវិញបញ្ហាកាលពីអតីតកាលនិងសម្លឹងទៅរកអនាគតកាលដើម្បីលើកកម្ពស់ការរីកចម្រើនប្រកបដោយភាពរឹងមាំនៅក្នុងភាពជាដៃគូយុទ្ធសាស្ត្ររវាងប្រទេសទាំងពីរ។
ភាពតានតឹងរវាងប្រទេសទាំងពីរបានកើតមានឡើងក្នុងរយៈពេលប្រមាណ២ឆ្នាំកន្លងទៅនេះ ក្រោយពីរដ្ឋាភិបាលអូស្ត្រាលីបានអំពាវនាវឱ្យមានការស៊ើបអង្កេតដោយឯករាជ្យមួយលើប្រភពដើមនៃការឆ្លងរាតត្បាតនៃជំងឺកូវីដ១៩ ហើយបានហាមប្រាមក្រុមហ៊ុនទូរគមនាគមន៍ដ៏ធំរបស់ចិនគឺក្រុមហ៊ុន Huawei មិនឱ្យសាងសង់ប្រព័ន្ធបណ្តាញ 5G នៅក្នុងប្រទេសអូស្ត្រាលី។
ចិនដែលជាដៃគូពាណិជ្ជកម្មដ៏ធំបំផុតមួយរបស់អូស្ត្រាលីបានឆ្លើយតបវិញ ដោយការយកពន្ធខ្ពស់លើទំនិញនាំចូលរបស់អូស្ត្រាលីនិងធ្វើឱ្យរាំងស្ទះដល់ឧស្សាហកម្មសំខាន់ៗមួយចំនួនរបស់ប្រទេសនេះដែលក្នុងនោះរួមមានស្រាក្រហម ស្រូវសាឡីនិងធ្យូងថ្មជាដើម។
នៅក្នុងសុន្ទរកថាស្តីពីគោលនយោបាយការបរទេសលើកដំបូងរបស់លោកកាលពីថ្ងៃចន្ទម្សិលមិញ នាយករដ្ឋមន្ត្រីថ្មីអូស្ត្រាលីលោក Albanese បាននិយាយថា ទំនាក់ទំនងអូស្ត្រាលីជាមួយរដ្ឋាភិបាលក្រុងប៉េកាំង «នៅតែជាការលំបាកមួយដដែល»។ នេះបើតាមការចេញផ្សាយរបស់សារព័ត៌មានអូស្ត្រាលី៕