នៅម៉ោង ១១ ព្រឹក ថ្ងៃទី ១១ ខែវិច្ឆិកានេះ ដែលមានរយៈពេល ១ រយឆ្នាំគត់ បន្ទាប់ពីសង្គ្រាមលោកលើកទីមួយបានបញ្ចប់ទៅ បណ្ដាមេដឹកនាំមកពីប្រទេសចំនួន ៧០ បានជួបប្រជុំគ្នានៅឯបូជនីយដ្ឋាន Arc de Triomphe ដើម្បីរំលឹកដល់មនុស្សរាប់លាននាក់ដែលបានស្លាប់នៅក្នុងសង្គ្រាម។
ប្រធានាធិបតីបារាំងលោក Emmanuel Macron និងបណ្ដាមេដឹកនាំប្រទេសដទៃទៀត ដែលក្នុងនោះមានទាំងប្រធានាធិបតីអាមេរិកលោក Donald Trump ផងដែរ បានបង្ហាញខ្លួននៅឯបូជនីយដ្ឋានដែលសង្គ្រាមត្រូវបានបញ្ចប់កាលពីថ្ងៃទី ១១ ខែវិច្ឆិកា ឆ្នាំ ១៩១៨។
បណ្ដាមេដឹកនាំមកពីប្រទេសភាគច្រើនដែលបានបញ្ជូនទាហាន ឬក៏កម្មករទៅកាន់សមរភូមិ Western Front បានជួបជុំគ្នានៅឯបូជនីយដ្ឋាន Tomb of the Unknown Soldier ដែលជាបូជនីយដ្ឋានឧទ្ទិសដល់ទាហានមិនស្គាល់អត្តសញ្ញាណទាំងអស់ដែលបានស្លាប់នៅក្នុងសង្គ្រាម ដើម្បីដុតគប់ភ្លើងបំភ្លឺឡើងវិញជារៀងរាល់យប់។
ពិធីរំលឹកការបញ្ចប់សង្គ្រាមលោកលើកទីមួយដែលធ្វើឡើងនៅក្រោមមេឃភ្លៀងនេះ មានវត្តមានអ្នកកូដវីយូឡុងធំលោក Yo Yo Ma អ្នកចម្រៀងអ្នកស្រី Angelique Kidjo មកពីប្រទេសបេណាំងនៃទ្វីបអាហ្វ្រិក និងអ្នកផ្លុំត្រែមួយរូបទៀត ដើម្បីធ្វើពិធីស្មឹងស្មាធិ៍គោរពវិញ្ញាណក្ខន្ធអ្នកដែលបានស្លាប់។
គ្មានទាហានណាម្នាក់នៅក្នុងសម័យសង្គ្រាមលោកលើកទីមួយត្រូវគេជឿថានៅរស់រានមានជីវិតមកដល់សព្វថ្ងៃនេះទេ ប៉ុន្តែសំឡេងរបស់ពួកគេមានវត្តមាននៅក្នុងពិធីនេះតាមរយៈសិស្សវិទ្យាល័យអានលិខិតរបស់ទាហានទាំងនោះដែលបានសរសេរឡើងកាលពី ១ រយឆ្នាំមុន។
រយៈពេល ៤ ឆ្នាំនៃសង្គ្រាមលោកលើកទីមួយគឺពោរពេញទៅដោយការសម្លាប់រង្គាល ដោយសារតែពួកអង់គ្លេស និងអាមេរិកាំងទទូចថាវាជា «សង្គ្រាមដើម្បីបញ្ចប់រាល់សង្គ្រាមទាំងអស់»។ ប៉ុន្តែជាង ២០ ឆ្នាំបន្តិចក្រោយមក សង្គ្រាមលោកលើកទី ២ បានផ្ទុះឡើងដោយមានចំនួនអ្នកស្លាប់ និងរងរបួសជាច្រើនអនេកមិនដែលមានពីមុនមកក្នុងប្រវត្តិសាស្ត្រ៕