វេជ្ជបណ្ឌិតផ្នែកជំងឺបេះដូងលោក Jonathan Rich បានផ្តល់សក្ខីកម្មកាលពីថ្ងៃចន្ទម្សិលមិញថា លោក George Floyd ដែលបានស្លាប់ក្រោមសមត្ថកិច្ចរបស់ប៉ូលិសនៅក្នុងទីក្រុង Minneapolis រដ្ឋ Minnesota កាលពីឆ្នាំមុន មិនបានស្លាប់ដោយសាររោគគាំងបេះដូង ឬការប្រើថ្នាំញៀនលើសកម្រិតនោះទេ ហើយគាត់អាចនៅរស់រានមានជីវិត ប្រសិនបើគាត់មិនត្រូវបានលោក Derek Chauvin ដែលជាមន្ត្រីប៉ូលិស ប្រើជង្គង់សង្កត់កអស់រយៈពេលជាង ៩ នាទីនោះ។
លោកវេជ្ជបណ្ឌិត Jonathan Rich ដែលជាសាស្ត្រាចារ្យនៅមហាវិទ្យាល័យវេជ្ជសាស្ត្រនៃសាកលវិទ្យាល័យ Northwestern បានប្រាប់គណៈវិនិច្ឆ័យតុលាការនៅឯការកាត់ទោសលោក Chauvin នៅក្នុងទីក្រុង Minneapolis ថា ប្រសិនបើលោក Floyd «មិនត្រូវបានសង្កត់ដូចនៅពេលនោះទេ ខ្ញុំគិតថា គាត់នឹងនៅមានជីវិត»។
លោក Eric Nelson មេធាវីការពារក្តីរបស់លោក Chauvin បានអះអាងថា លោក Floyd ដែលមានអាយុ ៤៦ ឆ្នាំ បានស្លាប់ដោយសារការប្រើថ្នាំញៀនហួសកម្រិត និងដោយសារបញ្ហាសុខភាពដែលមានជាប់នឹងខ្លួន មិនមែនដោយសារវិធីដែលលោក Chauvin ចាប់ខ្លួនគាត់កាលពីថ្ងៃទី ២៥ ខែឧសភា ឆ្នាំមុន ពីបទសង្ស័យប្រើក្រដាសប្រាក់ ២០ ដុល្លារក្លែងក្លាយនោះទេ។
លោក Chauvin អាយុ ៤៥ ឆ្នាំ មិនបានសារភាពទទួលកំហុសពីបទចោទប្រកាន់ថាបានប្រព្រឹត្តិអំពើឃាតកម្មនិងមនុស្សឃាតដោយអចេតនានៅក្នុងសំណុំរឿងរបស់លោក Floyd នេះទេ៕