អាជ្ញាធរកម្ពុជាអះអាងថា ពលរដ្ឋឥណ្ឌូណេស៊ីចំនួន៤១នាក់ត្រូវបានស្ថានទូតឥណ្ឌូណេស៊ីប្រចាំកម្ពុជាជួយសម្រួលត្រទ្បប់ទៅប្រទេសពួកគេវិញ ហើយពួកគេមិនមែនជាជនរងគ្រោះពាក់ព័ន្ធនឹងករណីឆបោកតាមអនឡាញនោះទេ ខណៈស្ថានទូតឥណ្ឌូណេស៊ីប្រចាំកម្ពុជាបញ្ជាក់ថា ខ្លួនបានជួយសម្រួលឱ្យពលរដ្ឋរបស់ខ្លួនបានត្រឡប់ទៅប្រទេសឥណ្ឌូណេស៊ីវិញ គិតចាប់តាំងពីពាក់កណ្តាលខែកក្កដា ដល់ដើមខែសីហាឆ្នាំ២០២៣នេះ។
នៅក្នុងសារអ៊ីមែលឆ្លើយតបមកកាន់សំឡេងសហរដ្ឋអាមេរិកវីអូអេ ស្ថានទូតឥណ្ឌូណេស៊ីប្រចាំកម្ពុជាបញ្ជាក់ឱ្យដឹងថា នគរបាលជាតិកម្ពុជាបានជួយសង្គ្រោះប្រជាជនឥណ្ឌូណេស៊ីតាមទីតាំងផ្សេងៗគ្នាក្នុងប្រទេសកម្ពុជារួមមាន ខេត្តបន្ទាយមានជ័យ ក្រុងប៉ោយប៉ែត ខេត្តស្វាយរៀង ក្រុងបាវិត និងរាជធានីភ្នំពេញ។
ស្ថានទូតឥណ្ឌូណេស៊ីបានលើកឡើងជាភាសាអង់គ្លេសហើយត្រូវប្រែសម្រួលជាខេមរភាសាក្នុងអត្ថន័យដើមថា៖ «ពលរដ្ឋឥណ្ឌូណេស៊ី ដែលជាជនរងគ្រោះនៃក្រុមហ៊ុនបោកប្រាស់តាមប្រព័ន្ធអនឡាញ ត្រូវបាននគរបាលជាតិកម្ពុជា (CNP) ជួយសង្គ្រោះនៅវេលា និងទីតាំងដាច់ដោយឡែកពីគ្នា ចាប់ពីថ្ងៃទី៥ ដល់ថ្ងៃទី១៤ ខែមិថុនា ឆ្នាំ២០២៣ ដោយមាននៅខេត្តបន្ទាយមានជ័យ (១ទីតាំងនៅក្រុងប៉ោយប៉ែត) ខេត្តស្វាយរៀង (៤ទីតាំងក្នុងក្រុងបាវិត) និងរាជធានីភ្នំពេញ (២ទីតាំង)»។
រូបថតដែលត្រូវបានបង្ហោះនៅលើទំព័រហ្វេសប៊ុកស្ថានទូតឥណ្ឌូណេស៊ីប្រចាំកម្ពុជា នៅថ្ងៃទី៨ ខែសីហា ឆ្នាំ២០២៣ បង្ហាញពីពលរដ្ឋឥណ្ឌូណេស៊ីមួយចំនួនដែលត្រូវបានស្ថានទូតឥណ្ឌូណេស៊ីប្រចាំកម្ពុជាជួយសម្រួលឱ្យបានត្រឡប់ទៅឥណ្ឌូណេស៊ីវិញ។ (Facebook / Indonesian Embassy Phnom Penh)
ស្ថានទូតឥណ្ឌូណេស៊ីក៏បញ្ជាក់ដែរថា ពលរដ្ឋឥណ្ឌូណេស៊ីទាំងនោះត្រូវបានបង្ខំឱ្យក្លាយជាអ្នកបោកប្រាស់តាមរយៈគម្រោងជាច្រើន រួមទាំងការបោកប្រាស់តាមកម្មវិធីពាណិជ្ជកម្មតាមប្រព័ន្ធអនឡាញដែលគ្រប់គ្រងដោយក្រុមហ៊ុនផងដែរ។
អនុប្រធានគណៈកម្មាធិការជាតិប្រយុទ្ធប្រឆាំងការជួញដូរមនុស្សអ្នកស្រី ជូ ប៊ុនអេង ប្រាប់វីអូអេថា ករណីរំលោភបំពាន ឬការកេងប្រវ័ញ្ចតាមអនឡាញមានសឹងតែគ្រប់បណ្តាប្រទេសទាំងអស់ មិនមែនមានតែនៅកម្ពុជាមួយនោះទេ។
អ្នកស្រីជំរុញឱ្យមន្ត្រីមានសមត្ថកិច្ចគ្រប់ភាគីពាក់ព័ន្ធទាំងអស់នៅកម្ពុជាគួរតែមានកិច្ចសហប្រតិបត្តិការជាមួយបណ្តាប្រទេសមួយចំនួនផ្សេងទៀត ដើម្បីកុំឱ្យបញ្ហានេះចេះតែបន្តកើតមានឡើង។
អ្នកស្រីថ្លែងថា៖ «គ្រប់ប្រទេសទាំងអស់យើងត្រូវរួមសហការគ្នាដើម្បីឆ្លើយតបទៅនឹងបទល្មើសហ្នឹង ហើយយើងព្យាយាមផ្សារភ្ជាប់ទំនាក់ទំនងកិច្ចសហប្រតិបត្តិការ តាមដាន ឬគ្រប់គ្រងករណីហ្នឹងឱ្យបានទាំងអស់គ្នា ហើយអត់មានឆ្លើយដាក់គ្នាបានទេ។ បើរវល់តែចង្អុលដាក់គ្នាថា ប្រទេសនោះ ជនជាតិនោះ រដ្ឋាភិបាលនេះ ឱ្យតែនិយាយរបៀបហ្នឹង ជនល្មើសបានដៃហើយ! គេ [ជនល្មើស] នឹងរកគ្រប់វិធីធ្វើឱ្យយើងហ្នឹងពុលហើយ!»
ក៏ប៉ុន្តែ ស្នងការនគរបាលខេត្តបន្ទាយមានជ័យ លោក សិទ្ធ ឡោះ ប្រាប់វីអូអេនៅថ្ងៃចន្ទនេះថា មិនមានករណីចាប់បង្ខាំង ឬជំរិតមនុស្សឱ្យធ្វើការខុសច្បាប់អ្វីនោះឡើយ ក្នុងខេត្តបន្ទាយមានជ័យដែលមានព្រំប្រទល់ជាប់ប្រទេសថៃ។
លោកថ្លែងថា៖ «អូន បងសុំជម្រាបខ្លីសម្រាប់ [ខេត្ត] បន្ទាយមានជ័យយើងអត់មានទេណ៎ាអូនណា៎។ មានតែករណីដែលពួកគាត់មកនៅខុសច្បាប់ ហើយពួកគាត់មានការប្តឹងបរិហារ មានការបង្ខាំង តែតាមពិតជាក់ស្តែងធាតុពិតអត់មានទេ ហើយកិច្ចការងារទាំងអស់ ចង់ប្រាប់ប្អូនថា យើងបានធ្វើការដោះស្រាយរួចហើយជួយរកពួកគាត់ ដើម្បីជួយពួកគាត់ទៅខាងស្ថានទូតដើម្បីឱ្យគាត់ត្រឡប់ទៅប្រទេសកំណើតវិញ ទៅតាមជនអន្តោប្រវេសន៍»។
វីអូអេបានព្យាយាមទាក់ទងសុំការអត្ថាធិប្បាយពីអ្នកនាំពាក្យស្នងការដ្ឋាននគរបាលរាជធានីភ្នំពេញ លោក សាន សុខសីហា និងអ្នកនាំពាក្យអគ្គស្នងការដ្ឋាននគរបាលជាតិលោក ឆាយ គឹមឃឿន ទាំងតាមទូរស័ព្ទ តេឡេក្រាម Whatsapp តែមិនទទួលបានការឆ្លើយតបទេ គិតត្រឹមរសៀលថ្ងៃចន្ទនេះ។
អ្នកនាំពាក្យអគ្គនាយកដ្ឋានអន្តោប្រវេសន៍នៃក្រសួងមហាផ្ទៃ លោក កែវ វណ្ណថន ប្រាប់វីអូអេនាថ្ងៃចន្ទនេះថា ជនជាតិឥណ្ឌូណេស៊ីទាំង៤១នាក់ដែលត្រូវបានបញ្ជូនត្រឡប់ទៅកាន់ប្រទេសដើមវិញនោះគឺមានជាប់ពាក់ព័ន្ធនឹងការលួចស្នាក់នៅ និងធ្វើការខុសច្បាប់ក្នុងប្រទេសកម្ពុជា។ លោកបន្តថា ក្រសួងមហាផ្ទែបានបញ្ជូនពលរដ្ឋទាំងនោះចេញ ៦លើករួចមកហើយ ដោយក្នុងនោះមានស្រីចំនួន៥នាក់។
លោកបានបញ្ជាក់ប្រាប់វីអូអេឱ្យដឹងតាមប្រព័ន្ធទំនាក់ទំនងតេឡេក្រាមដោយសរសេរក្នុងន័យដើមថា៖ «បន្ទាប់ពីទទួលបានប្រកាសបណ្តេញចេញរបស់ក្រសួងមហាផ្ទៃ អគ្គនាយកដ្ឋានបានធ្វើការបណ្តេញចេញពីចន្លោះថ្ងៃទី១៤ ខែកក្កដា ដល់ថ្ងៃទី៥ ខែសីហា ឆ្នាំ២០២៣ សរុបចំនួន៦លើក មានមនុស្ស៤១នាក់ ស្រី៥នាក់ ទៅប្រទេសដើមវិញ តាមព្រលានយន្តហោះភ្នំពេញ»។
មន្ត្រីកម្មវិធីនៃមជ្ឈមណ្ឌលសម្ព័ន្ធភាពការងារនិងសិទ្ធិមនុស្ស (សង់ត្រាល់) ទទួលបន្ទុកការពារសិទ្ធិពលករចំណាកស្រុក លោក ឌីថេ ហូយ៉ា លើកឡើងតាមប្រព័ន្ធទំនាក់ទំនងតេឡេក្រាមថា សង់ត្រាល់តែងតែទទួលបានករណីនៃកិច្ចសុំអន្តរាគមន៍ពីជនរងគ្រោះ រួមមានជនជាតិឥណ្ឌូណេស៊ី ចិន រៀតណាម និងម៉ាឡេស៊ីជាដើម ដែលត្រូវបានឆបោកឱ្យមកធ្វើការឆបោកតាមប្រព័ន្ធអនឡាញក្នុងប្រទេសកម្ពុជា។
បើតាមលោក ឌីថេ ហូយ៉ា មូលហេតុដែលអាជ្ញាធរកម្ពុជាខ្លះច្រានចោលព័ត៌មានជុំវិញការឆបោកតាមអនឡាញរបស់ជនជាតិឥណ្ឌូណេស៊ីនោះ គឺដោយសារកន្លងទៅ របាយការណ៍របស់ក្រសួងការបរទេសសហរដ្ឋអាមេរិកបានរកឃើញពីការជួញដូរមនុស្ស និងរំលោភបំពានយ៉ាងគួរឱ្យព្រួយបារម្ភក្នុងប្រទេសកម្ពុជា។
លោកថ្លែងថា៖ «ការណ៍ដែលរដ្ឋាភិបាលកម្ពុជាលោកព្យាយាមបដិសេដ វាអាចពាក់ព័ន្ធទៅលើ កន្លងមករបាយការណ៍របស់ក្រសួងការបរទេសសហរដ្ឋអាមេរិក ដែលរកឃើញអំពីការជួញដូរមនុស្ស រកឃើញអំពីការរំលោភបំពានអីជាដើមហ្នឹង ហើយកំណត់ប្រទេសកម្ពុជាពី tier 2 to tier 3 [កម្រិតទី២ដល់កម្រិតទី៣] មានន័យថា កម្រិតនៃការជួញដូរខ្លាំងដែលគួរឱ្យព្រួយបារម្ភ»។
យ៉ាងណាមិញ អ្នកការពារសិទ្ធិពលកររូបនេះលើកឡើងថា អាជ្ញាធរកម្ពុជាគួរតែធ្វើការស្រាវជ្រាវ និងស៊ើបអង្កេតឱ្យបានស៊ីជម្រៅពីដើមហេតុដែលបង្កឱ្យមានការឆបោក និងជួញដូរតាមអនឡាញ ដោយមានការចូលរួមពីភាគីពាក់ព័ន្ធដែលធ្វើការលើរឿងទាំងអស់នេះ។ លោកបន្ថែមថា អាជ្ញាធរត្រូវសហការជាមួយប្រទេសនានាដើម្បីកម្ចាត់ការជួយដូរជាប្រព័ន្ធដែលកំពុងកើតមានសព្វថ្ងៃនេះ។
លោកថ្លែងថា៖ «ជាពិសេសគឺមន្រ្តីជំនាញខាងផ្នែក Online Scam [បោកបញ្ឆោតតាមអនឡាញ] ត្រូវច្បាស់ ត្រូវដឹង ហើយត្រូវកំណត់មុខសញ្ញាចំពោះជនប្រព្រឹត្តពីប្រទេសណា ក្រុមណា ជនណា ហើយរៀបចំសហការពីប្រទេសមួយទៅប្រទេសមួយដើម្បីចាត់វិធានការឱ្យបានម៉ឺងម៉ាត់ ឱ្យបានមានប្រសិទ្ធភាព ទើបជួយការពារ និងកាត់បន្ថយបញ្ហានៃការជួញដូរនេះបាន»។
កាលពីចុងខែកក្កដា អាជ្ញាធរឥណ្ឌូណេស៊ីក៏បានអះអាងផងដែរថា ខ្លួនកំពុងស៊ើបអង្កេតករណីនៃការជួញដូរសរីរាង្គមនុស្សខុសច្បាប់ ហើយការវះកាត់ធ្វើឡើងនៅប្រទេសកម្ពុជា។ អាជ្ញាធរឥណ្ឌូណេស៊ីបានចោទប្រកាន់ប៉ូលិស និងមន្រ្តីអន្តោប្រវេសន៍របស់ខ្លួនដែលត្រូវបានចោទប្រកាន់ថា ធ្វើឯកសារបន្លំដើម្បីអាចបញ្ជូនជនជាតិឥណ្ឌូណេស៊ីចំនួន១២២នាក់មកវះកាត់លក់ក្រលៀនរបស់ពួកគេនៅប្រទេសកម្ពុជា៕