តុលាការក្រុងភ្នំពេញ កាលពីថ្ងៃពុធបានសម្រេចផ្ដន្ទាទោសបុរសម្នាក់ដាក់ពន្ធនាគាររយៈពេល៣ឆ្នាំដោយសារតែប្រមាថព្រះមហាក្សតាមបណ្តាញសង្គមហ្វេសប៊ុកដែលជាការផ្តន្ទាទោសលើកទីពីរ ក្រោមច្បាប់ប្រមាថព្រះមហាក្សត្រដែលត្រូវបានអនុម័តកាលពីឆ្នាំមុន។ ក្រុមសិទ្ធិមនុស្សមានការព្រួយបារម្ភថា ច្បាប់នេះអាចត្រូវបានប្រើដើម្បីរារាំងការប្រឆាំង។
លោក អ៊ី រិន អ្នកនាំពាក្យតុលាការក្រុងភ្នំពេញបានប្រាប់ទីភ្នាក់ងារព័ត៌មាន Reuters ថា៖ «តុលាការបានប្រកាសសាលក្រមឲ្យលោក អៀង ជលសា ជាប់ពន្ធនាគាររយៈពេល៣ឆ្នាំនិងបង្គាប់ឱ្យបង់ប្រាក់សំណង៥លានរៀល»។
លោកអ៊ី រិន បាននិយាយថាសារលើបណ្តាញហ្វេសប៊ុកដែលតុលាការរកឃើញថា ប្រមាថព្រះមហាក្សត្រនរោត្តមសីហមុនីនេះត្រូវបានបង្ហោះកាលពីខែមិថុនាឆ្នាំមុន។ មិនមានព័ត៌មានអំពីមេធាវីការពារជនជាប់ចោទទេ ហើយមន្ត្រីតុលាការមិនបញ្ជាក់ថា ជនជាប់ចោទមានមេធាវីឬយ៉ាងណាទេ។
ច្បាប់ប្រមាថព្រះមហាក្សត្រូវបានអនុម័តជាឯកច្ឆន្ទដោយសភាកាលពីខែកុម្ភៈឆ្នាំមុន។ ក្រុមសិទិ្ធមនុស្សបានបង្ហាញការព្រួយបារម្ភនៅពេលនោះថា ច្បាប់ដែលស្រដៀងនឹងច្បាប់នៅប្រទេសថៃនេះ អាចត្រូវបានប្រើដើម្បីបិទមាត់អ្នករិះគន់រដ្ឋាភិបាល។កាលពីខែតុលាឆ្នាំមុន តុលាការខេត្តសៀមរាបបានឃុំឃាំងសមាជិកគណបក្សសង្គ្រោះជាតិដែលជាគណបក្សប្រឆាំងដោយប្រើច្បាប់នេះ៕