រដ្ឋាភិបាលកម្ពុជាបានសម្រេចបញ្ចប់កិច្ចសន្យាដែលផ្តល់សិទ្ធិឱ្យក្រុមហ៊ុនសុខាអូតែលរបស់លោកឧកញ៉ាសុខ គង់ដែលមានសិទ្ធិលក់សំបុត្រចូលទស្សនាប្រាសាទអង្គរនៅខេត្តសៀមរាបបន្ទាប់ពីក្រុមហ៊ុននេះបានគ្រប់គ្រងអស់ជាច្រើនឆ្នាំនិងបានបង្កឱ្យមានការតវ៉ាជាច្រើនពីគណបក្សប្រឆាំងនិងសាធារណជន។
សេចក្តីជូនដំណឹងរបស់ទីស្តីការគណៈរដ្ឋមន្ត្រីនៅថ្ងៃសុក្រនេះឱ្យដឹងថារដ្ឋាភិបាលកម្ពុជាបានសម្រេចដកសិទ្ធិនិងកំពុងរៀបចំបែបបទដើម្បីបង្កើតសហគ្រាសសាធារណៈរដ្ឋបាលមួយដែលគ្រប់គ្រងដោយរដ្ឋាភិបាលសម្រាប់គ្រប់គ្រងដំណើរការប្រមូលចំណូលពីការលក់សំបុត្រនេះវិញ។ សហគ្រាសសាធារណៈរដ្ឋបាលនេះគ្រោងនឹងចាប់ផ្តើមដំណើរការការងាររបស់ខ្លួននៅខែមករា ឆ្នាំ២០១៦។
លោកផៃ ស៊ីផាន រដ្ឋលេខាធិការនៃ ទីស្តីការគណៈរដ្ឋមន្ត្រីនិងជាអ្នកនាំពាក្យបានបញ្ជាកប្រាប់វីអូអេថា៖
«អង្គរវត្តមិនមែនគ្រាន់តែ ជាទិសដៅនៃពាណិជ្ជកម្មទេគឺអង្គរវត្តជាមោទនភាពរបស់កម្ពុជាដែលយើងមានរូបជានិមិត្តរូបនៅលើទង់ជាតិដូច្នេះនៅក្នុងឱកាសនេះសម្តេចអគ្គមហាសេនាបតីតេជោហ៊ុន សែនលោកសម្រេចថានឹងឯកភាពជាមួយនឹងក្រុមហ៊ុនថាត្រូវតែរដ្ឋយកមកគ្រប់គ្រងវិញ»។
ចំណូលដែលបានមកពីការលក់សំបុត្រចូលទស្សនាប្រាសាទអង្គរមានចំនួនជាង៤៧លានដុល្លារក្នុងរយៈពេល១០ខែពីខែមករាដល់ខែតុលាឆ្នាំ២០១៥នេះ។ រីឯអ្នកចូលទស្សនាមានចំនួនជិត១,៧លាននាក់។ នេះបើតាមការឱ្យដឹងរបស់អាជ្ញាធរជាតិអប្សរា។
លោកផៃ ស៊ីផានបានបន្ថែមដែរថាបុគ្គលិកដែលកំពុងធ្វើការនៅតំបន់អង្គរនាពេលបច្ចុប្បន្ននឹងមិនមានផលប៉ះពាល់ទេ៖
«អ្វី ដែលធ្វើឱ្យប៉ះពាល់គឺចំណូលបានច្រើនដោយសាររាជរដ្ឋាភិបាលឈប់ចែករំលែកនូវប្រាក់ចំណេញដែលកាលពីដើមយើងធ្លាប់ធ្វើជាមួយនឹងឯកជនហើយត្រូវបញ្ចប់ហើយប្រាក់ចំណេញទាំងពួងបានចូលត្រង់មកថវិការដ្ឋដើម្បីបំពេញបន្ថែមនូវថវិកាអភិវឌ្ឍន៍ដទៃទៀតក៏ដូចជាការដំឡើងប្រាក់បៀវត្សរ៍មន្ត្រីរាជការ»។
ការគ្រប់គ្រងប្រាសាទអង្គរវត្តដោយក្រុមហ៊ុនឯកជនរបស់លោកឧកញ៉ាសុខ គង់ដែលមានទំនាក់ទំនងយ៉ាងជិតស្និទ្ធជាមួយនឹងគណបក្សប្រជាជនកម្ពុជាដែលជាគណបក្សកាន់អំណាចតែងតែទទួលរងការរិះគន់ពីគណបក្សប្រឆាំងថាមិនមានការគ្រប់គ្រងចំណូលត្រឹមត្រូវហើយមានការបន្លំក្នុងការផ្តល់ចំណូលចូលមករដ្ឋប៉ុន្តែអាជ្ញាធរជាតិអប្សរាតែងតែប្រកែក។ បញ្ហានេះក៏បានឡើងកំដៅនៅ រាល់ពេលជិតបោះឆ្នោតជាតិម្តងៗពីសាធារណជនដែលមិនចង់ឃើញថៅកែឯកជនមកគ្រប់គ្រងយកចំណូលចំណេញផ្ទាល់ខ្លួននោះឡើយ៕