រដ្ឋមន្ត្រីការបរទេសកម្ពុជាលោក ប្រាក់ សុខុន នៅថ្ងៃព្រហស្បតិ៍បានថ្លែងថាលោកមានគម្រោងធ្វើដំណើរជាលើកដំបូងក្នុងនាមជាប្រេសិតពិសេសអាស៊ានទៅកាន់រដ្ឋធានីណៃពិដោនិងទីក្រុងរ៉ង់ហ្គូនប្រទេសភូមានៅសប្ដាហ៍ទីពីរខែមីនាខាងមុខ។
ប្រមុខការទូតកម្ពុជាថ្លែងដូច្នេះក្នុងសន្និសីទកាសែតមួយក្រោយបិទបញ្ចប់កិច្ចប្រជុំចង្អៀតរដ្ឋមន្ត្រីការបរទេសអាស៊ានក្នុងរាជធានីភ្នំពេញកាលពីរសៀលថ្ងៃព្រហស្បតិ៍។ លោកបានថ្លែងថានេះគ្រាន់តែជាគម្រោងតែអ្វីៗអាស្រ័យលើរបបសឹកអ្នករៀបចំនិងសម្របសម្រួលជូនសម្រាប់ទស្សនកិច្ចនេះ។
លោកប្រាក់ សុខុន ថ្លែងថា៖ «រដ្ឋមន្ត្រីការបរទេសទាំងអស់គឺបានសម្ដែងជាថ្មីគាំទ្រលើការតែងតាំងខ្ញុំជាប្រេសិតពិសេសរបស់ប្រធានអាស៊ានប៉ុន្តែគេនិយាយលេងសើចថាមិនមែនជាកាដូសម្រាប់អ្នកឯងនោះទេ ព្រោះបញ្ហាមីយ៉ាន់ម៉ាយើងដឹងថាជាបញ្ហាក្ដៅ។ ខ្ញុំទៅពេលណា?គឺដើមខែក្រោយ»។
ក្រោយពីមានការខ្វែងគំនិតគ្នាក្នុងចំណោមបណ្ដាប្រទេសជាសមាជិកផ្សេងទៀតលើអភិក្រមរបស់ខ្លួនលើបញ្ហាភូមា អាស៊ានបានសម្រេចមិនហៅលោក Wunna Maung Lwinរដ្ឋមន្ត្រីការបរទេសរបបសឹកមកភ្នំពេញដើម្បីចូលរួមកិច្ចប្រជុំចង្អៀតរដ្ឋមន្ត្រីការបរទេសអាស៊ាននេះឡើយ។ ការសម្រេចរបស់អាស៊ានត្រូវឈរលើគោលការណ៍មូលមតិគ្នាឬកុងសង់ស៊ីស។
លោកប្រាក់ សុខុន ថាកម្ពុជាត្រូវ«បង្ខំចិត្ត»ធ្វើដូច្នោះតាមសំណើរបស់រដ្ឋជាសមាជិក«មួយចំនួន»។
លោក Saifuddin Abdullah រដ្ឋមន្ត្រីការបរទេសម៉ាឡេស៊ីដែលមានវត្តមាននៅរាជធានីភ្នំពេញដែរបានស្នើឱ្យអាស៊ានរិះរកដំណោះស្រាយណាដែល«គោរពឆន្ទៈនិងសេចក្ដីប្រាថ្នានៃប្រជាជនមីយ៉ាន់ម៉ា»។ លោកថា លោកគាំទ្រលោកប្រាក់ សុខុនបំពេញតួនាទីជាប្រេសិតពិសេស។
ប្រមុខការទូតម៉ាឡេស៊ីរូបនេះបានសរសេរលើបណ្ដាញ Twitter ស្នើឱ្យរដ្ឋមន្រ្តីការបរទេសកម្ពុជាស្វះស្វែងជួបតំណាងរដ្ឋាភិបាលរួបរួមជាតិ (NUG) ដែលជារដ្ឋាភិបាលស្រមោលបង្កើតដោយអ្នកប្រឆាំងនឹងរបបសឹកភូមា។
លោកប្រាក់ សុខុន លើកឡើងថាសំណើជួបឥស្សរជនផ្សេងទៀតក្រៅពីមន្ត្រីរបបសឹកនោះគឺ អាស្រ័យនឹងរបបក្រុងណៃពិដោ«សម្រួលឱ្យជួប»។លោកថាលោកនឹងទៅរដ្ឋធានីណៃពិដោនិងទីក្រុងរ៉ង់ហ្គូន។
លោកប្រាក់ សុខុនក៏បាននិយាយជាសាធារណៈលើកដំបូងឈ្មោះ«រដ្ឋាភិបាលរួបរួមជាតិ(NUG)»របស់អ្នកប្រឆាំងរបបសឹកផងដែរ។
លោក ប្រាក់ សុខុន ថាការនិយាយជាមួយរដ្ឋាភិបាលនិរទេសខ្លួនភូមាមួយនេះគ្រាន់តែជាបញ្ហាពេលវេលាប៉ុណ្ណោះ ដោយលោកថាគេត្រូវថ្នមទំនាក់ទំនងជាមួយរបបសឹកដើម្បីរក្សាដំណើរការសន្តិភាពទាំងមូលឱ្យនៅមានសង្ឃឹម។
«គឺទីមួយ ធ្វើយ៉ាងណាឱ្យបានជួបសន្ទនាជាមួយគ្រប់ភាគីពាក់ព័ន្ធ។ ខ្ញុំនិយាយថាជាមួយភាគីពាក់ព័ន្ធ។ យើងអាចថា មិនទាំងអស់ទេ ហើយនេះជាការធ្វើដំណើរលើកទី១ផង។ យើងក៏និយាយទៅ...និយាយឱ្យចំទៅ យើងមិនអាចលោភបានទេ។ មាត់យើងទំពារបានប៉ុណ្ណាយើងលេបប៉ុណ្ណឹងបានហើយ។ ប៉ុន្តែយើងក៏នឹងមានការជួបជាមួយគ្រប់ភាគីពាក់ព័ន្ធ។ខ្ញុំក៏មានស្នើសុំជួបជាមួយឧត្ដមសេនីយ៍ Min Aung Hlaingជួបជាមួយរដ្ឋមន្ត្រីការបរទេសហើយខ្ញុំក៏នឹងស្នើជួបជាមួយឥស្សរជនផ្សេងទៀត»។
លោកថាគេចៀសមិនផុតពីត្រូវធ្វើការជាមួយរបបសឹកទេ ដោយលោកបញ្ជាក់ថា៖ «ចូរយើងដឹងថា មីយ៉ាន់ម៉ាជាប្រទេសមួយដែលដឹកនាំដោយរបបយោធាតាំងពីបានទទួលឯករាជ្យមកម្ល៉េះ...ចិតសិបប្លាយឆ្នាំហើយ...៧៤ឆ្នាំហើយ។ ខណៈពេលដែលលោកស្រី Aung San Suu Kyi ដឹកនាំរដ្ឋាភិបាលក៏មានចំណែករបស់យោធាដែរ។ យោធាអត់ទាន់ទៅណាទេ។អ៊ីចឹងក៏មានចំណែករបស់យោធាដែរ។រាប់មកចិតសិបប្លាយឆ្នាំ បានន័យថារបបគាត់បានចាក់ឫសជ្រៅនៅក្នុងសង្គមហើយ»។
ក្នុងជំនួបដាច់ដោយឡែកជាមួយលោកនាយករដ្ឋមន្ត្រី ហ៊ុន សែន នៅវិមានសន្តិភាពកាលពីថ្ងៃពុធវេជ្ជបណ្ឌិត Vivian Balakrishnan រដ្ឋមន្ត្រីការបរទេសសិង្ហបុរី បានលើកឡើងថាលោកទាំងពីរយល់ស្របគ្នាថាសមាសភាពចូលរួមរបស់តំណាងមីយ៉ាន់ម៉ាគួររក្សាត្រឹមកម្រិតតំណាងមិនមែននយោបាយ។
ក្នុងសេចក្ដីថ្លែងការណ៍របស់ប្រធានអាស៊ានក្រោយកិច្ចប្រជុំចង្អៀតរបបសឹកមីយ៉ាន់ម៉ាត្រូវបានអាស៊ានស្នើឱ្យចាត់វិធានការពេញលេញដើម្បីអនុវត្តកិច្ចព្រមព្រៀង៥ចំណុចដែលខ្លួនបានសន្យាជាមួយអាស៊ានកាលពីខែមេសាឆ្នាំ២០២១ដើម្បីស្ថាបនាផ្លូវឈានទៅបញ្ចប់វិបត្តិរ៉ាំរ៉ៃក្រោយរដ្ឋប្រហារខែកុម្ភៈឆ្នាំ២០២១៕