ក្រុមកងកម្លាំងប្រដាប់អាវុធនៅកម្ពុជាចេញសារប្តេជ្ញាបង្ក្រាប និងកម្ទេចអ្នកដែលចង់ផ្តួលរំលំរដ្ឋាភិបាល បន្ទាប់ពីថ្នាក់ដឹកនាំអតីតគណបក្សប្រឆាំងបង្ហោះសារឱ្យកងកម្លាំងប្រដាប់អាវុធយកគំរូតាមយុវជននៅបង់ក្លាដែសដែលបានផ្តួលរំលំមេដឹកនាំរបស់ពួកគេកាលពីពេលថ្មីៗនេះ។
ក្រោយការដួលរំលំនៃរបបដឹកនាំក្នុងប្រទេសបង់ក្លាដែសដោយសារបាតុកម្មរបស់ក្រុមយុវជនមិនពេញចិត្តនឹងការកំណត់កូតាការងាររដ្ឋ កាលពីសប្តាហ៍មុន គេឃើញថ្នាក់ដឹកនាំអតីតគណបក្សប្រឆាំងដែលកំពុងស្ថិតនៅក្រៅប្រទេសបានចែករំលែកអំពីការផ្តួលរំលំនោះ ដោយមានសារផ្សេងៗភ្ជាប់នឹងការដឹកនាំនៅកម្ពុជា។
លោក សម រង្ស៊ី អតីតប្រធានគណបក្សប្រឆាំង បានបង្ហោះសារលើទំព័រហ្វេសប៊ុករបស់លោកកាលពីថ្ងៃទី៩ ខែសីហា ដោយភ្ជាប់នឹងវីដេអូនៃការផ្តួលរំលំរបបដឹកនាំនៅប្រទេសបង់ក្លាដែស ក្នុងន័យដើមថា៖ «យើងត្រូវមើលទាហានកងទ័ពបង់ក្លាដែសជាគំរូ កងទ័ពបង់ក្លាដែសក្រោកឈរជាមួយប្រជាជនទម្លាក់មេដឹកនាំផ្តាច់ការ។
កងទ័ពមានកាតព្វកិច្ចការពារប្រជាជន ការពារប្រទេស ការពារទឹកដី»។
ក្រុមកងកម្លាំងប្រដាប់អាវុធនៅកម្ពុជា ដូចជាក្រសួងការពារជាតិ កងរាជអាវុធហត្ថ និងក្រុមនគរបាលជាដើម បានចេញសារមានន័យដូចៗគ្នាក្នុងការថ្កោលទោសរាល់ការប៉ុនប៉ងផ្តួលរំលំរដ្ឋាភិបាល។ សាររបស់កងកម្លាំងប្រដាប់អាវុធខ្លះបានភ្ជាប់នឹងការគាំទ្រគម្រោងអភិវឌ្ឍន៍ត្រីកោណ កម្ពុជា ឡាវ និងវៀតណាម CLV ដោយថា គម្រោងនេះនឹងជួយលើកស្ទួយវិស័យសេដ្ឋកិច្ច ពាណិជ្ជកម្ម និងទេសចរណ៍។
សេចក្តីថ្លែងការណ៍របស់ក្រសួងការពារជាតិចុះថ្ងៃទី១១ ខែសីហា ឆ្នាំ២០២៤ បញ្ជាក់ថា ក្នុងរយៈពេលថ្មីៗនេះ មានក្រុមដែលក្រសួងហៅថា ជាក្រុមប្រឆាំងជ្រុលនិយមមួយក្តាប់តូចនៅក្រៅប្រទេសបានអំពាវនាវ និងបំផុសញុះញង់ឱ្យប្រជាពលរដ្ឋ និងកងកម្លាំងប្រដាប់អាវុធបះបោរប្រឆាំងនឹងរដ្ឋាភិបាលកម្ពុជា។
ក្រសួងការពារជាតិបន្ថែមក្នុងសេចក្តីថ្លែងការណ៍នោះថា ការញុះញង់ប៉ុនប៉ងបង្កចលាចលផ្តួលរំលំរដ្ឋាភិបាលស្របច្បាប់ ដោយមធ្យោបាយហិង្សា មិនប្រជាធិបតេយ្យ គឺជាអំពើល្មើសច្បាប់។
សេចក្តីថ្លែងការណ៍បញ្ជាក់ថា៖ «ក្រសួងការពារជាតិសូមអះអាងថា នឹងចាត់វិធានការបង្ក្រាប និងកម្ទេចរាល់ឧបាយកលញុះញង់ក្នុងចេតនាបំផ្លាញជាតិ បំផ្លាញសន្តិភាព បង្កវិទ្ធង្សនាផ្សេងៗក្នុងគោលបំណងផ្តួលរំលំរាជរដ្ឋាភិបាលស្របច្បាប់ទោះក្នុងរូបភាពណាក្តី»។
វីអូអេមិនទាន់អាចសុំការអត្ថាធិប្បាយពីលោក សម រង្ស៊ី បាននៅឡើយទេ គិតត្រឹមរសៀលថ្ងៃចន្ទនេះ។
សាររបស់ក្រុមកងកម្លាំងប្រដាប់អាវុធនេះក៏ធ្វើឡើងស្របពេលដែលប្រជាពលរដ្ឋខ្មែរដែលរស់នៅប្រទេសអូស្ត្រាលី កូរ៉េ និងជប៉ុន កាលពីថ្ងៃទី១១ ខែសីហា ឆ្នាំ២០២៤ នាំគ្នាធ្វើបាតុកម្មទាមទារឱ្យរដ្ឋាភិបាលកម្ពុជាដកខ្លួនចេញពីគម្រោងតំបន់អភិវឌ្ឍន៍ត្រីកោណ កម្ពុជា ឡាវ និងវៀតណាម CLV ដោយពួកគេបារម្ភពីការបាត់បង់ទឹកដីចំនួន៤ខេត្តបន្ថែមទៅប្រទេសវៀតណាម។
លោក យ៉ង់ ស៊ីណេត សហប្រធានដឹកនាំបាតុកម្មនៅប្រទេសកូរ៉េខាងត្បូង ប្រាប់វីអូអេនៅថ្ងៃទី១២ ខែសីហានេះថា អ្នកចូលរួមបាតុកម្មកាលពីថ្ងៃអាទិត្យ មានប្រមាណជិត៣ម៉ឺននាក់។ លោកថា បាតុកម្មនេះមានគោលបំណងឱ្យរដ្ឋាភិបាលដោះលែងសកម្មជនទាំងអស់ និងទាមទារឱ្យរដ្ឋាភិបាលដកខ្លួនពីគម្រោង កម្ពុជា ឡាវ និងវៀតណាម CLV។
បើតាមលោក យ៉ង់ ស៊ីណេត បាតុកម្មនេះមិនមែនជាការធ្វើបដិវត្តន៍ពណ៌ ឬផ្តួលរំលំរដ្ឋាភិបាលទេ ប៉ុន្តែគ្រាន់តែជាការប្រមូលផ្តុំដើម្បីសម្តែងមតិ និងស្នើទៅកាន់រដ្ឋាភិបាលពិចារណាដកខ្លួនពីគម្រោង កម្ពុជា ឡាវ និងវៀតណាម CLV។
លោកថ្លែងថា៖ «យើងនិយាយពីប្រវត្តិសាស្ត្រ ទឹកដីកម្ពុជាក្រោមគេខ្ចីដីយើងមកហាត់ទ័ពតែ៣ខែទេ តែយើងត្រូវបាត់បង់២១ខេត្ត។ ហេតុអីក៏រដ្ឋាភិបាលហ្នឹងអត់មានសមត្ថភាពក្នុងការអភិវឌ្ឍប្រទេសខ្លួនឯងទេឬ ចាំបាច់ទៅឱ្យបរទេសជួយអភិវឌ្ឍ»។
ចំណែកលោក ហៃ វណ្ណា អ្នកដឹកនាំបាតុកម្មនៅប្រទេសជប៉ុន ប្រាប់វីអូអេដែរថា បាតុកម្មកាលពីថ្ងៃអាទិត្យ មានអ្នកចូលរួមជាង៧០០នាក់ ដើម្បីទាមទារឱ្យរដ្ឋាភិបាលដកខេត្តចំនួន៤រួមមានខេត្តក្រចេះ ស្ទឹងត្រែង រតនគិរី មណ្ឌលគិរី ចេញពីគម្រោង កម្ពុជា ឡាវ និងវៀតណាម CLV មកអភិវឌ្ឍដោយខ្លួនឯង។
លោក ហ៊ុន សែន ប្រធានព្រឹទ្ធសភា ធ្លាប់បានព្រមានអ្នកចោទប្រកាន់មេដឹកនាំកម្ពុជា ជាពិសេសរូបលោកផ្ទាល់ និងលោកនាយករដ្ឋមន្ត្រី ហ៊ុន ម៉ាណែតថា ជា«ជនក្បត់ជាតិ» ក្នុងការកាត់ដី ៤ ខេត្តឱ្យវៀតណាម តាមរយៈគម្រោង«តំបន់ត្រីកោណអភិវឌ្ឍន៍»នេះ។
លោកថា ការចោទប្រកាន់នេះជា «ការប្រមាថដែលមិនអាចលើកលែងទោសឱ្យបានទេ» ហើយលោកស្នើឱ្យតុលាការដាក់ទោសអតិបរមាលើអ្នករិះគន់ទាំងនោះ។
បើតាមលោក ហៃ វណ្ណា សារគំរាមប្រជាពលរដ្ឋនានារបស់មេដឹកនាំគឺលែងមានប្រសិទ្ធភាពហើយ។
លោកថ្លែងថា៖ «លោក ហ៊ុន សែន គាត់គ្មានសមត្ថភាពណាទៅចងក្រងបណ្តាញដើម្បីស៊ើបរកសមាជិកគ្រួសាររបស់អ្នកមកចូលរួមបាតុកម្មទេ។ អ៊ីចឹងសារគំរាមរបស់ជនផ្តាច់ការ វាលែងមានឥទ្ធិពលហើយ។ ប្រជាពលរដ្ឋខ្មែរនៅក្នុងប្រទេសខ្មែរក៏ដូចគ្នា គាត់លែងខ្លាចអ្វីជាសារគំរាមរបស់ជនផ្តាច់ការហើយ។ អ៊ីចឹងទីបញ្ចប់របស់ជនផ្តាច់ការខិតជិតមកដល់មែនទែនហើយ»។
អ្នកនាំពាក្យរដ្ឋាភិបាលកម្ពុជាលោក ប៉ែន បូណា ប្រាប់វីអូអេថា រដ្ឋាភិបាលបានពន្យល់ប្រជាពលរដ្ឋពីគម្រោង កម្ពុជា ឡាវ និងវៀតណាម CLV ម្តងហើយម្តងទៀត ថា ជាគម្រោងមានតម្លាភាព មិនមានអ្វីលាក់បាំង ហើយក៏មិនបានធ្វើឱ្យបាត់បង់ទឹកដីទៅប្រទេសណាឡើយ។
លោកបញ្ជាក់ថា៖ «អ៊ីចឹងហើយបានជាក្នុងរឿងនេះរាជរដ្ឋាភិបាលច្បាស់លាស់ហើយ គឺថា នរណាដែលចង់រុញប្រទេសអី ចង់ភ្ជាប់ទៅប្រទេសបង់ក្លាដែសអីហ្នឹង គឺថា មិនអនុញ្ញាតជាដាច់ខាត គឺមិនអនុញ្ញាតឱ្យប្រទេសធ្លាក់ចូលទៅក្នុងភាពវឹកវរ ចលាចល វិលទៅរកការកាប់សម្លាប់ បង្ហូរឈាម សង្គ្រាមស៊ីវិលអីទៀតទេ គឺអត់មានទេ។
រាជរដ្ឋាភិបាលនឹងចាត់វិធានការច្បាស់លាស់ហើយដើម្បីធានាសេចក្តីសុខសាន្តជូនប្រជាពលរដ្ឋ»។
នាយកទទួលបន្ទុកទូទៅនៃអង្គការការពារសិទ្ធិមនុស្សលីកាដូ លោក អំ សំអាត ប្រាប់វីអូអេថា កម្ពុជាគឺជាប្រទេសប្រជាធិតេយ្យ ដែលលោកថា រាល់ការផ្លាស់ប្តូរមេដឹកនាំត្រូវធ្វើឡើងដោយការបោះឆ្នោតក្នុងរយៈពេល៥ឆ្នាំម្តង។
លោក អំ សំអាត បន្ថែមថា លោកចង់ឃើញអ្នកនយោបាយតម្កល់ឧត្តមប្រយោជន៍ប្រជាពលរដ្ឋជាធំ ចៀសវាងប្រជាពលរដ្ឋក្លាយជាជនរងគ្រោះនៃព្រឹត្តិការណ៍។
លោកបញ្ជាក់ថា៖ «យើងចង់ឃើញប្រទេសយើងដែលជាប្រទេសប្រកាន់លទ្ធិប្រជាធិបតេយ្យសេរីពហុបក្សហ្នឹង យកគោលការណ៍គ្រឹះនៃការបោះឆ្នោត ដែលប្រជាពលរដ្ឋជាម្ចាស់ប្រទេស ជាម្ចាស់ឆ្នោតក្នុងការជ្រើសរើសគណបក្សនយោបាយដែលខ្លួនពេញចិត្ត ដែលធានាដល់រដ្ឋធម្មនុញ្ញ បទដ្ឋានអន្តរជាតិ ក៏ដូចជាច្បាប់ជាតិយើង»។
តំបន់អភិវឌ្ឍន៍ត្រីកោណត្រូវបានបង្កើតឡើងនៅក្នុងឆ្នាំ ១៩៩៩ ដោយរដ្ឋាភិបាលប្រទេសបី គឺកម្ពុជា ឡាវ និងវៀតណាម ដែលបានឯកភាពគ្នាក្នុងការដាក់ខេត្តចំនួន ១៣ រួមគ្នាដើម្បីអភិវឌ្ឍន៍។ កម្ពុជាមានខេត្តចំនួនបួន គឺរតនគិរី មណ្ឌលគិរី ក្រចេះ និងស្ទឹងត្រែង ដែលត្រូវបានដាក់បញ្ចូលក្នុងតំបន់ត្រីកោណអភិវឌ្ឍន៍នេះ។ រដ្ឋាភិបាលកម្ពុជាអះអាងថា តំបន់ត្រីកោណអភិវឌ្ឍន៍ជាប្រភពនៃសក្តានុពលសេដ្ឋកិច្ច ទេសចរណ៍ និងវប្បធម៌។
ប្រធានបទស្តីពី «តំបន់ត្រីកោណអភិវឌ្ឍន៍» ពេលថ្មីៗនេះបានក្លាយជាចំណុចចម្រូងចម្រាស ខណៈមានការព្រួយបារម្ភមួយចំនួនថា វៀតណាមនឹងគ្រប់គ្រងតំបន់នោះ ហើយកម្ពុជាអាចបាត់បង់ទឹកដីនោះ ដូចកម្ពុជាក្រោម។
មកទល់ពេលនេះ មានសកម្មជនសង្គមយ៉ាងហោចណាស់៥នាក់ ត្រូវបានចាប់ខ្លួនបន្ទាប់ពីពួកគេបានអត្ថាធិប្បាយពាក់ព័ន្ធនឹងគម្រោង កម្ពុជា ឡាវ និងវៀតណាម CLV។ សកម្មជនទាំង៥នាក់នោះរួមមាន លោក ស៊្រុន ស្រ៊ន កញ្ញា ភឹង សោភា លោក ចក់ បានមុន្នី លោក សាន សិទ្ធ និងលោក ធែល ធីលែន៕