អាជ្ញាធរថៃបានអនុវត្តតាមការស្នើសុំរបស់កម្ពុជា ដោយហាមមិនឲ្យលោកស្រី មូរ សុខហួរ អនុប្រធានមួយរូបរបស់អតីតគណបក្សសង្គ្រោះជាតិ ចូលក្នុងប្រទេសថៃ ខណៈដែលលោកស្រីមកដល់ព្រលានយន្តហោះសុវណ្ណភូមិរបស់ថៃ។
ការរារាំងនេះទំនងជាការឆ្លើយតបទៅនឹងសំណើរបស់រដ្ឋាភិបាលកម្ពុជា ដើម្បីទប់ស្កាត់និងចាប់ខ្លួនក្រុមមេដឹកនាំអតីតគណបក្សសង្គ្រោះជាតិ ដែលត្រូវតុលាការខ្មែរចោទប្រកាន់ពីបទឧក្រិដ្ឋ និងដែលឆ្លងកាត់ឬប្រើប្រាស់ទឹកដីថៃដើម្បីធ្វើការប្រមូលផ្ដុំ ទទួលលោកសម រង្ស៊ី។
កាលពីរសៀលថ្ងៃទី២០ ខែតុលា លោកស្រី មូរ សុខហួរ បានធ្វើដំណើរតាមជើងយន្តហោះពីប្រទេសម៉ាឡេស៊ី សំដៅមកប្រទេសថៃ ដើម្បីជួបអ្នកគាំទ្រ និងសកម្មជនរបស់គណបក្សប្រឆាំងក្នុងការរៀបចំដំណើរមាតុភូមិនិវត្តន៍របស់លោក សម រង្ស៊ី ដែលគ្រោងនឹងនិវត្តចូលប្រទេសកម្ពុជាវិញនៅថ្ងៃទី៩ខែ វិច្ឆិកាខាងមុខ។
ប៉ុន្តែនៅពេលមកដល់ព្រលានយន្តហោះសុវណ្ណភូមិរបស់ថៃ លោកស្រីមិនត្រូវបានអនុញ្ញាតឲ្យធ្វើដំណើរបន្តទេ។ លោកស្រីមានប្រសាសន៍ថា នគរបាលថៃបានប្រាប់លោកស្រីថា ប្រធានរបស់គេមិនអនុញ្ញាតឲ្យលោកស្រីធ្វើដំណើរចូលក្នុងប្រទេសថៃនោះទេ។
លោកស្រី មូរ សុខហួរ បានថ្លែងប្រាប់ VOA នៅថ្ងៃពុធនេះថា៖ «បំណងរបស់លោក ហ៊ុន សែន ចង់ឲ្យថៃចាប់ពួកមីងទៅប្រទេសកម្ពុជាវិញ ថៃមិនបានអនុវត្តទៅតាមបញ្ជារបស់លោក ហ៊ុន សែន ទេ។ ថៃគេនឹងមិនធ្វើទេ គេជាប្រទេសដែលមានគោលការណ៍ប្រជាធិបតេយ្យច្បាស់លាស់របស់គេ។ គេមិនធ្វើជាដាច់ខាត»។
ទោះជាយ៉ាងណា លោកស្រី មូរ សុខហួរ ដែលមានសញ្ជាតិអាមេរិក បានថ្លែងថា លោកស្រីមិនដឹងមូលហេតុច្បាស់លាស់នៃការហាមលោកស្រីមិនឲ្យចូលប្រទេសថៃ ដោយសារនគរបាលនោះមិនអាចនិយាយភាសាអង់គ្លេសបានច្រើននោះទេ។ លោកស្រីបញ្ជាក់ថា លោកស្រីកំពុងតែតស៊ូមតិបន្តទៀត ធ្វើយ៉ាងម៉េចឲ្យលោកស្រី និងថ្នាក់ដឹកនាំផ្សេងទៀត អាចចូលប្រទេសថៃបាន។
ភ្លាមៗក្រោយពីការរារាំងមិនឲ្យលោកស្រី មូរ សុខហួរ ចូលប្រទេសថៃ កាលពីថ្ងៃអង្គារ ឯកអគ្គរាជទូតថៃប្រចាំនៅកម្ពុជា លោក Panyarak Poolthup បានបដិសេធអត្ថាធិប្បាយលើបញ្ហានេះ ដោយលោកបញ្ជាក់ថា ស្ថានទូត«មិនមានសមត្ថកិច្ចក្នុងការឆ្លើយតប»។
VOAមិនអាចសុំការឆ្លើយតបពីក្រសួងការបរទេសថៃ តាមទូរស័ព្ទ និងអ៊ីមែលបានឡើយ។
កន្លងទៅ លោកនាយករដ្ឋមន្ត្រី ហ៊ុន សែន បានប្រកាសថា រដ្ឋាភិបាលរបស់លោកបានផ្ញើដីកាចាប់ខ្លួនលោក សម រង្ស៊ី ទៅប្រទេសជាសមាជិកអាស៊ានចំនួន៩ប្រទេស។
ក្រោយមកនាយករដ្ឋមន្ត្រីឡាវ លោក ថងលុន ស៊ីសូលីត (Thongloun Sisoulith) បានអះអាងពីការគាំទ្រចំណាត់ការរបស់លោកនាយករដ្ឋមន្ត្រីខ្មែរ។ ប៉ុន្តែមិនមានប្រទេសសមាជិកអាស៊ានផ្សេងទៀតអះអាងពីការទទួលលិខិតស្នើសុំឲ្យចាប់ខ្លួនលោកសម រង្ស៊ី ឬអះអាងពីការគាំទ្ររបស់ពួកគេចំពោះសេចក្ដីស្នើសុំរបស់កម្ពុជាជាសាធារណៈនៅឡើយ។
VOAមិនអាចសុំការឆ្លើយតបពីអ្នកនាំពាក្យក្រសួងការបរទេសកម្ពុជា លោក កេត សោផាន់ និងអ្នកនាំពាក្យរដ្ឋាភិបាលកម្ពុជា លោក ផៃ ស៊ីផាន បាននៅឡើយទេ។
លោក Phil Robertson នាយករងអង្គការ Human Rights Watch ប្រចាំតំបន់អាស៊ី បាននិយាយនៅថ្ងៃពុធនេះថាវាអាចមានមូលហេតុនៃការបារម្ភអំពីបញ្ហាសន្តិសុខក្នុងប្រទេសថៃ ដោយសារខ្លាចលោកស្រី មូរ សុខហួរ នឹងជួបជាមួយមន្ត្រីទូតជាច្រើន ដើម្បីរាយការណ៍ពី«ស្ថានភាពសិទ្ធិមនុស្សដ៏អាក្រក់»នៅកម្ពុជា។
លោកបានប្រាប់VOAតាមរយៈសារអេឡិចត្រូនិកថា៖ «ដូច្នេះវាមិនមានការភ្ញាក់ផ្អើលទេដែលពួកគេបានហាមមិនឲ្យលោកស្រី [មូរ សុខហួរ]ចូលទៅក្នុងដីថៃ។ ថៃមិនចង់ពាក់ព័ន្ធកាន់តែជ្រៅក្នុងជម្លោះរវាងគណបក្សប្រឆាំងសង្រ្គោះជាតិ និងរដ្ឋាភិបាលកម្ពុជា»។
លោកPhil Robertson បន្តថា ប្រសិនបើប្រទេសថៃហ៊ានចាប់លោកស្រី មូរ សុខហួរ រដ្ឋាភិបាលទីក្រុងបាងកក នឹងប្រឈមនឹងការរិះគន់យ៉ាងធ្ងន់ធ្ងរពីសហគមន៍អន្តរជាតិ។
អាជ្ញាធរកម្ពុជាកំពុងតាមចាប់ខ្លួនលោកស្រី មូរ សុខហួរ ក្នុងបទល្មើសដែលត្រូវបានចោទប្រកាន់មួយចំនួន ក្នុងនោះមានការចោទប្រកាន់ថាមានគម្រោងធ្វើរដ្ឋប្រហាររដ្ឋាភិបាល និងការញុះញង់ជាដើម។ មេដឹកនាំរបស់គណបក្សសង្គ្រោះជាតិ លោក សម រង្ស៊ី ដែលកំពុងស្នាក់នៅក្រៅប្រទេស គឺជាអ្នកនយោបាយសំខាន់មួយ ដែលរដ្ឋាភិបាលកម្ពុជាកំពុងតាមចាប់ខ្លួន។
សកម្មជនអតីតគណបក្សសង្គ្រោះជាតិជាង៥០នាក់ ត្រូវចាប់ខ្លួន ក្រោមការចោទប្រកាន់ថា «រួមគំនិតក្បត់» ជាមួយលោក សម រង្ស៊ី ក្នុងគម្រោងការផ្ដួលរំលំរដ្ឋាភិបាល។
កាលពីថ្ងៃទី២៦ ខែកញ្ញា តុលាការរាជធានីភ្នំពេញ បានសម្រេចចោទប្រកាន់សមាជិកជាន់ខ្ពស់ចំនួន៩នាក់នៃគណបក្សសង្គ្រោះជាតិ ពីបទ «ឧបឃាត» ដោយពាក់ព័ន្ធនឹងអង្គហេតុនៃការ«ប៉ុនប៉ងធ្វើរដ្ឋប្រហារ»។
អ្នកទាំងនោះ រួមមានលោក សម រង្ស៊ី លោកស្រី មូរ សុខហួរ លោក អេង ឆៃអ៊ាង លោក អ៊ូ ច័ន្ធឬទ្ធិ លោក ហូរ វ៉ាន់ លោក ឡុង រី លោក ម៉ែន សុថាវរិន្រ្ទ លោកស្រី ជូឡុង សូមូរ៉ា និងលោក នុត រំដួល៕