លោកសម រង្ស៊ី ប្រធានស្តីទីអតីតគណបក្សសង្គ្រោះជាតិ បានប្រកាសថា លោកនឹងវិលត្រឡប់មកកម្ពុជាវិញនៅថ្ងៃទី៩ខែវិច្ឆិកា ខាងមុខនេះ បន្ទាប់ពីនិរទេសពីចាប់ខ្លួនរបស់អាជ្ញាធរកម្ពុជាអស់រយៈពេលប្រាំឆ្នាំរួចមក។
ក្រោយពីការប្រកាសនោះ រដ្ឋាភិបាលបានបង្កើនការចាប់ខ្លួនមន្ត្រីនិងសកម្មជនអតីតគណបក្សប្រឆាំងនេះដោយសង្ស័យថា ពួកគេកេណ្ឌគ្នាដើម្បីចាំទទួលលោកសម រង្ស៊ី។
យោងតាមរបាយការណ៍ចុងក្រោយ អ្នកគាំទ្របក្សប្រឆាំងប្រមាណជាង៥០នាក់ត្រូវបានចាប់ខ្លួន។ ដោយឡែកអង្គការ Human Rights Watch រកឃើញថា មនុស្សជិត៦០នាក់ត្រូវបានចាប់ខ្លួនរាប់ទាំងសកម្មជនសិទ្ធិមនុស្សផងដែរ។
ភាគច្រើននៃអ្នកគាំទ្រអតីតគណបក្សសង្គ្រោះជាតិដែលត្រូវចាប់ខ្លួន រងការចោទប្រកាន់ពីបទ «រួមគំនិតក្បត់» ជាមួយនឹងលោកសម រង្ស៊ី។
លោក Phil Robertson នាយករងអង្គការ Human Rights Watch ប្រចាំតំបន់អាស៊ី បាននិយាយក្នុងសេចក្តីថ្លែងការណ៍នៅថ្ងៃនេះថា មនុស្សរាប់សិបនាក់ត្រូវបានចាប់ខ្លួនដោយសារហេតុផលនយោបាយក្នុងរយៈពេលបីខែចុងក្រោយនេះ ដែលបង្ហាញថារដ្ឋាភិបាលលោកនាយករដ្ឋមន្ត្រីហ៊ុន សែន មិនមានចេតនាបន្ធូរដៃក្នុងការបង្រ្កាបដែលធ្វើឲ្យប្រទេសកម្ពុជាអាប់អួរក្នុងរយៈពេលប៉ុន្មានឆ្នាំចុងក្រោយនេះ។
យោងតាមគណនីយហ្វេសប៊ុករបស់អ្នកនយោបាយអតីតគណបក្សសង្គ្រោះជាតិ អនុប្រធានគណបក្សនេះ រួមមានលោកអេង ឆៃអ៊ាង លោកស្រី មូ សូខហួរ និងអ្នកនយោបាយមួយចំនួនទៀតបានមកដល់ប្រទេសថៃហើយ ដើម្បីរៀបចំទទួលលោកសម រង្ស៊ី។
ឆ្លើយតបទៅនឹងការលើកឡើងរបស់អង្គការ Human Rights Watch លោកផៃ ស៊ីផាន អ្នកនាំពាក្យរដ្ឋាភិបាល យល់ឃើញថា នោះគឺជាការលើកឡើង«ខុសពីការពិត»។
លោកផៃ ស៊ីផាន អះអាងថា រដ្ឋាភិបាលមិន«ចាប់ខ្លួនសកម្មជននយោបាយនោះទេ ប៉ុន្តែគឺជាការចាប់ខ្លួនអ្នកចូលរួមធ្វើរដ្ឋប្រហារ»៕
