ការគោរពសិទ្ធិមនុស្សនៅកម្ពុជានៅតែជាចំណោទបញ្ហាមួយដ៏ធំសម្រាប់ប្រទេសក្រីក្រមួយនេះ។ អង្គការសង្គមស៊ីវិលសំខាន់ៗនៅប្រទេសនេះបានធ្វើរបាយការណ៍ស្រមោលជាច្រើនដែលឆ្លុះបញ្ចាំងពីស្ថានភាពសិទ្ធិមនុស្សនៅកម្ពុជា តាមកតិការសញ្ញាស្តីពីសិទ្ធិស៊ីវិល និងសិទ្ធិនយោបាយ ហើយបញ្ជូនរបាយការណ៍នេះទៅកាន់គណៈកម្មាធិការសិទ្ធិមនុស្សរបស់អង្គការសហប្រជាតិ។ ហើយគណៈកម្មាធិការពិសេសនេះនឹងលើកបញ្ហាសិទ្ធិមនុស្សនៅកម្ពុជាមកពិនិត្យនាថ្ងៃអង្គារសប្តាហ៍ក្រោយ។
ក្រុមអង្គការសិទ្ធិមនុស្សបានប្រាប់អង្គការសហប្រជាជាតិថា ប្រទេសកម្ពុជានៅតែប្រឈមនឹងបញ្ហាសិទ្ធិមនុស្សជាច្រើន ហើយទាមទារឲ្យមានការធ្វើឲ្យប្រសើរថែមទៀត។
នៅក្នុងរបាយការណ៍រួមមួយ ដែលមាន៨៦ទំព័រ ដែលបានដាក់ជូនគណៈកម្មាធិការសិទ្ធិមនុស្សអង្គការសហប្រជាជាតិ ក្រុមអង្គការសង្គមស៊ីវិលធំៗនៅក្នុ្ងងប្រទេសកម្ពុជាបានលើកឡើងថា សិទ្ធិប្រមូលផ្តុំសេរីភាពបញ្ចេញមតិ ប្រព័ន្ធតុលាការមិនឯករាជ្យ និងវិសមភាពផ្នែកជេនឌឺនៅតែជាបញ្ហាប្រឈមដែលកម្ពុជាកំពុងជួបប្រទះ ហើយតម្រូវឲ្យមានការកែប្រែបន្ថែមទៀត។
អង្គការទាំងនោះរួមមាន អង្គការតម្លាភាពកម្ពុជា ដែលនៅកាត់ថា TI វេទិកានៃអង្គារមិនមែនរដ្ឋាភិបាលស្តីពីកម្ពុជា NGO Forum គណៈកម្មាធិការប្រព្រឹត្តិកម្មនៃអង្គការសមាគមការពារសិទ្ធិមិនុស្សកម្ពុជា CHRAC សមាគមការពារសិទ្ធិមនុស្សនិងអភិវឌ្ឈន៍នៅកម្ពុជា ADHOC និង ក្រុមការងារពិសេសសិទ្ធិលំនៅដ្ឋានជាដើម។
គណៈកម្មាធិការសិទ្ធិមនុស្សរបស់អង្គការសហប្រជាតិដែលមានទីតាំងនៅទីក្រុងហ្សឺណែវ ប្រទេសស្វ៊ីសនឹងត្រូវពិនិត្យរបាយការណ៍សិទ្ធិមនុស្សនៅកម្ពុជានៅថ្ងៃទី១៧ខែមិនាសប្តាហ៍ក្រោយនេះ នៅក្នុងសម័យប្រជុំប្រចាំឆ្នាំរបស់ខ្លួន។
ក្រុមអង្គការសង្គមស៊ីវិលបានសរសេរនៅក្នុងរបាយការណ៍របស់ខ្លួនថា«នាឆ្នាំកន្លងទៅមានការប្រព្រឹត្តហិង្សាជាច្រើនទៅលើបាតុករ រួមមានការបាញ់ប្រហារទៅលើបាតុករនៅផ្លូវវ៉េងស្រេងនាខែមករាឆ្នាំ២០១៤ ការបំបែកបាតុកម្មអហិង្សានៅទីលានប្រជាធិបតេយ្យ និងការបិទទីលាននេះ ការចាប់ខ្លួន និងការប្រើប្រាស់ប្រព័ន្ធតុលាការដើម្បីបំបិទសិទ្ធិតវ៉ារបស់ក្រុមសកម្មជនបឹងកក់ ដែលជាការបំបិទសិទ្ធិប្រមូលផ្តុំរបស់ប្រជាពលរដ្ឋ និងការបញ្ចេញមតិដោយសេរីនៅកម្ពុជា»។
បន្ថែមពីនោះទៀត ក្រុមអ្នកឃ្លាំមើលសិទ្ធិមនុស្សបានគូសបញ្ជាក់ថា ការលើកតម្កើងសមភាពជេនឌឺនៅមានកម្រិតទាបនៅឡើយ។ ហើយការរើសអើងចំពោះអ្នកដែលស្រឡាញ់ភេទដូចគ្នានៅមានកម្រិតខ្ពស់។
ដោយឡែក របាយការណ៍ស្រមោលកម្រាស់៣២ទំព័ររបស់មជ្ឈមណ្ឌលសិទ្ធិមនុស្សនៅកម្ពុជា CCHR ក៏បានបញ្ជាក់ពីការព្រួយបារម្ភចំពោះការដាក់សម្ពាធ និងបំបិទសិទ្ធិបញ្ចេញមតិរបស់អង្គការក្រៅរដ្ឋាភិបាលនិងសង្គមស៊ីវិល ដែលមានចែងនៅក្នុងសេចក្តីព្រាងច្បាប់ស្តីពីអង្គការសង្គមស៊ីវិលដែលកំពុងស្ថិតក្នុងដៃរដ្ឋាភិបាលនៅឡើយ។ លើសពីនេះទៀតនិទណ្ឌភាព ឬភាពគ្មានទោសពៃរ៍ នៅតែជាបញ្ហាសម្រាប់ប្រទេសកម្ពុជា។
លោកស្រីចក់ សុភាព នាយិកាប្រតិបត្តិរបស់មជ្ឈមណ្ឌលសិទ្ធិមនុស្សនៅកម្ពុជា CCHR បាននិយាយថា ដំណើរការប្រជាធិបតេយ្យនៅកម្ពុជាមានការរីកចម្រើន ក៏ប៉ុន្តែកម្ពុជានៅតែប្រឈមបញ្ហាសិទ្ធិមនុស្ស។
«នៅក្នុងដំណើរការនេះ យើងឃើញថា នៅមានការប្រឈមជាច្រើន ដែលត្រូវការឲ្យរដ្ឋាភិបាលបង្ហាញពីឆន្ទៈពិតប្រាកដមួយក្រៅពីទទួលយកលិខិតូបករណ៍អន្តរជាតិនៅលើប្រដាស ប៉ុន្តែការអនុវត្តគ្មាន»។
លោក ម៉ក់ សម្បត្តិ អនុប្រធានគណៈកម្មការសិទ្ធិមនុស្សនៃរដ្ឋាភិបាលដែលនឹងដឹកនាំគណៈប្រតិភូតំណាងប្រទេសកម្ពុជាទៅចូលរួមការប្រជុំរបស់ គណៈកម្មការសិទ្ធិមនុស្សអង្គការសហប្រជាតិ បានប្រាប់វីអូអេជាខេមេរភាសាថា ការលើកឡើងរបស់អង្គការសង្គមស៊ីវិលគឺគ្រាន់តែជាមួយផ្នែកតូចនៃបញ្ហាសិទ្ធិមនុស្សតែប៉ុណ្ណោះ។
«បើថា ច្បាស់សឹមយើងនិយាយ កុំចេះតែនិយាយបំពុល ឬនិយាយដើម្បីប្រយោជន៍អ្វីមួយ។ ហើយបើយើងចង់និយាយអំពីបញ្ហាសិទ្ធិមុនស្ស សូមនិយាយសិទ្ធិមនុស្សដើម្បីទាំងអស់គ្នា។ កុំធ្វើការសិទ្ធិមនុស្សដើម្បីប្រយោជន៍អ្វីមួយ ឬដើម្បីរឿងស្អីមួយនៅពីក្រោយខ្នង»។
គួរបញ្ជាក់ផងដែរថា បន្ទាប់ពីមានការជាប់គាំងនយោបាយនៅកម្ពុជាអស់រយៈពេលជិតមួយឆ្នាំក្រោយពេលបោះឆ្នោតនាខែកក្កដាឆ្នាំ២០១៣ បញ្ហាសិទ្ធិមនុស្សនៅកម្ពុជាមានការធ្លាក់ចុះយ៉ាងខ្លាំង ជាពិសេសសេរីភាពនៃការប្រមូលផ្តុំ និងការបញ្ចេញមតិជាសាធារណៈត្រូវបានរឹតត្បិត។ នេះបើយោងតាមការកត់សម្គាល់របស់ក្រុមអង្គការសង្គមស៊ីវិលកម្ពុជា៕