ក្មេងស្រីម្នាក់អាយុ២ឆ្នាំ រស់នៅក្នុងភូមិវាល ឃុំស្មោងខាងត្បូង ស្រុកកំចាយមារ ខេត្តព្រៃវែង បានស្លាប់ដោយសារជំងឺផ្ដាសាយបក្សី H5N1 ដែលបំផ្លាញផ្លូវដង្ហើមរបស់មនុស្ស។ នេះបើតាមសេចក្តីប្រកាសព័ត៌មានរបស់ក្រសួងសុខាភិបាលចេញផ្សាយកាលពីថ្ងៃចន្ទ។
កុមារម្នាក់នោះជាមនុស្សទី៣ ដែលស្លាប់ដោយសារជំងឺបំផ្លាញផ្លូវដង្ហើម H5N1 នៅឆ្នាំ២០២៣ នេះ។ កាលពីសប្តាហ៍មុន មនុស្សម្នាក់នៅខេត្តស្វាយរៀងបានស្លាប់ដោយសារជំងឺនេះ។
សេចក្តីប្រកាសព័ត៌មានរបស់ក្រសួងសុខាភិបាលឱ្យដឹងថា ក្មេងស្រីម្នាក់ដែលមានអាយុ២ឆ្នាំស្លាប់ ហើយរកឃើញថាវិជ្ជមានវីរុសផ្តាសាយបក្សី ប្រភេទហាស់៥ អ៊ិន១ (H5N1) ពីវិទ្យាស្ថានជាតិសុខភាពសាធារណៈនៅថ្ងៃទី៩ ខែតុលា ឆ្នាំ២០២៣។ តាមការសាកសួរបង្ហាញថា នៅផ្ទះកុមារមានមាន់ងាប់ជាហូរហែ។ នេះបើតាមក្រសួងសុខាភិបាល។
លោក ឈឹម ឆូយវល្លិន មេភូមិវាល ប្រាប់វីអូអេនៅថ្ងៃអង្គារនេះថា ក្រោយក្មេងស្រីម្នាក់បានស្លាប់ដោយសារជំងឺផ្តាសាយបក្សី អាជ្ញាធរភូមិឃុំបានរៀបចំចាក់វ៉ាក់សាំងជូនប្រជាពលរដ្ឋ ដើម្បីការពារការឆ្លងវីរុសផ្តាសាយបក្សី។
លោកថ្លែងថា៖ «មិនទាន់បានបិទទេភូមិ គ្រាន់តែថាកំពុងតែធ្វើ[រៀបចំ]វ៉ាក់សាំងអី ដើម្បីការពារ បាញ់ថ្នាំ បាញ់អី ហើយបាញ់ការពារអីទាំងអស់របស់ប្រជាពលរដ្ឋនៅតាមភូមិ ឃុំ អ្នកមកពីស្រុកខេត្ត ចាប់ដំណើរការតាំងពីព្រឹក តែឥឡូវមិនទាន់ចប់ទេ»។
មេភូមិរូបនេះបន្តទៀតថា ឪពុកម្តាយរបស់កុមារីដែលស្លាប់នេះ មានមុខរបរជាកម្មករស៊ីឈ្នួលឱ្យគេ។ លោកបញ្ជាក់ទៀតថា ចាប់តាំងពីខែកញ្ញាមក នៅតាមផ្ទះរបស់ប្រជាពលរដ្ឋតែងតែមានមាន់ងាប់ជារឿយៗ ដែលបង្កជាការឆ្លងជំងឺផ្តាសាយបក្សីនេះ។
ក្រសួងសុខាភិបាលអះអាងថា នៅយប់ថ្ងៃទី៩ ខែតុលា ឆ្នាំ២០២៣ ក្រុមឆ្លើយតបបន្ទាន់របស់ក្រសួងសុខាភិបាល ថ្នាក់ជាតិ និងថ្នាក់ក្រោមជាតិ បានកំពុងអង្កេតស្រាវជ្រាវការកើតឡើងនូវជំងឺផ្តាសាយបក្សីប្រភេទនេះ និងសហការគ្នារវាងក្រុមឆ្លើយតបបន្ទាន់ផ្នែកសុខាភិបាល ដើម្បីស្វែងរកប្រភពចម្លង ទាំងលើសត្វ និងមនុស្ស និងបន្តស្វែងរកករណីសង្ស័យ និងអ្នកប៉ះពាល់ ដើម្បីទប់ស្កាត់ការឆ្លងបន្តទៅអ្នកដទៃទៀតក្នុងសហគមន៍។ ក្រសួងក៏បានផ្តល់ឱសថតាមីស្លូ (Tamiflu) ដល់អ្នកប៉ះពាល់ជិតស្និទ្ធ និងធ្វើយុទ្ធនាការអប់រំសុខភាពប្រជាពលរដ្ឋនៅក្នុងភូមិដែលកើតហេតុខាងលើ។
ក្រសួងលើកឡើងថា របៀបចម្លងជំងឺផ្តាសាយបក្សី H5N1 គឺជាធម្មតាចម្លងរវាងសត្វបក្សីឈឺ ទៅបក្សីផ្សេងទៀត ប៉ុន្តែជួនកាលវាអាចចម្លងពីបក្សីទៅមនុស្ស តាមការប៉ះពាល់ជិតស្និទ្ធជាមួយបក្សីដែលឈឺ ឬស្លាប់។ ជំងឺផ្តាសាយបក្សីលើមនុស្សជាជំងឺធ្ងន់ធ្ងរ ដែលតម្រូវឱ្យព្យាបាលនៅមន្ទីរពេទ្យទាន់ពេលវេលា។
ក្រសួងបានណែនាំពីវិធានការបង្ការ រួមមានលាងដៃឱ្យបានញឹកញាប់ ជាមួយសាប៊ូនិងទឹកមុនពេលបរិភោគ និងបន្ទាប់ពីប៉ះពាល់ជាមួយបក្សី ដាក់កុមារនៅឆ្ងាយពីសត្វបក្សី និងដាក់សត្វបក្សីនៅឱ្យឆ្ងាយពីកន្លែងរស់នៅ កុំបរិភោគសត្វបក្សីឈឺ ឬងាប់ និងរាល់សត្វបក្សីដែលធ្វើសម្រាប់បរិភោគត្រូវចំអិនឱ្យឆ្អិនល្អ។
កាលពីថ្ងៃអាទិត្យ ក្រសួងសុខាភិបាលបានប្រកាសព័ត៌មានថា កាលពីថ្ងៃទី៧ ខែតុលា ឆ្នាំ២០២៣ មានបុរសម្នាក់អាយុ៥០ឆ្នាំ នៅភូមិម្រាក់ទាប ឃុំត្រស់ ស្រុករមាសហែក ខេត្តស្វាយរៀង បានស្លាប់ដោយសារមានវិជ្ជមានវីរុសផ្តាសាយបក្សីប្រភេទ H5N1។
ក្រសួងបញ្ជាក់ថា បុរសនោះបានទិញមាន់មកស្តុកទុកលក់ បន្ទាប់មកក៏ឃើញមានមាន់នៅផ្ទះរបស់គាត់និងមាន់អ្នកក្បែរខាងចាប់ផ្ដើមងាប់ប្រមាណជាង៥០ក្បាល ហើយមាន់ងាប់នោះក៏ត្រូវបានចែកចាយឱ្យបងប្អូនយកទៅបរិភោគ។
នៅព្រឹកថ្ងៃអង្គារនេះ អភិបាលនៃគណៈអភិបាលខេត្តព្រៃវែង លោក សួន សុម៉ាលីន បានបើកកិច្ចប្រជុំទៅលើករណីការឆ្លងជំងឺនេះ ដើម្បីត្រួតពិនិត្យ និងដាក់វិធានការទប់ស្កាត់ការរីករាលដាលនៃជំងឺផ្កាសាយបក្សី H5N1 ស្ថិតក្នុងភូមិសាស្ត្រផ្ទុះជំងឺនៃស្រុកកំចាយមារ។ នេះបើតាមសារបង្ហោះនៅលើហ្វេសប៊ុករបស់រដ្ឋបាលខេត្តព្រៃវែង។
វីអូអេពុំទាន់អាចសុំការឆ្លើយតបពីតំណាងអង្គការសុខភាពពិភពលោកប្រចាំនៅកម្ពុជា អ្នកស្រី Li Ailan តាមរយៈសារអ៊ីម៉ែលបាននៅឡើយទេ។
វីអូអេមិនទាន់អាចសុំការអត្ថាធិប្បាយពីប្រធានមន្ទីរសុខាភិបាលខេត្តព្រៃវែង លោក សេង បញ្ញាឬទ្ធិ និងអ្នកនាំពាក្យក្រសួងសុខាភិបាល អ្នកស្រី ឱ វណ្ណឌីន បាននៅឡើយ។
នៅក្នុងសេចក្តីប្រកាសព័ត៌មាន ក្រសួងសុខាភិបាលបានក្រើនរំឭកដល់បងប្អូនប្រជាពលរដ្ឋទាំងអស់ សូមយកចិត្តទុកដាក់ប្រុងប្រយ័ត្នលើជំងឺផ្តាសាយបក្សីជានិច្ច ពីព្រោះជំងឺផ្ដាសាយបក្សី H5N1 នៅតែបន្តគំរាមកំហែងដល់សុខភាពប្រជាពលរដ្ឋជាពិសេសលើកុមារដែលជាក្រុមមានហានិភ័យ និងមានភាពងាយរងគ្រោះ។
គួរបញ្ជាក់ថា បើគិតករណីស្លាប់ចុងក្រោយនេះ កម្ពុជាបានរាយការណ៍ករណីជំងឺផ្តាសាយបក្សី H5N1 ចំនួន៥៩ករណីឆ្លងលើមនុស្ស ដែលក្នុងនោះមានស្លាប់ចំនួន៤០នាក់ គិតចាប់តាំងពីឆ្នាំ២០០៥ ដែលកម្ពុជារាយការណ៍ករណីឆ្លងដំបូង៕