ការប្រកួតប្រជែងគ្នាយ៉ាងល្វីងជូរចត់អស់រាប់ទសវត្សរ៍រវាងមេដឹកនាំកម្ពុជាលោកហ៊ុន សែន និងលោក សម រង្ស៊ី មេដឹកនាំបក្សប្រឆាំងដែលរស់នៅនិរទេសខ្លួននៅក្រៅប្រទេសមានពេលខ្លះបង្កជាអំពើហិង្សាបណ្តាលឲ្យមានមនុស្សស្លាប់។ ក៏ប៉ុន្តែនៅថ្ងៃអាទិត្យ ទី៩ ខែមិថុនានេះ ជម្លោះរវាងមេដឹកនាំទាំងពីរបានចេញលទ្ធផលជាទឹកសម្លនំបញ្ចុកជាជាងការបង្ហូរឈាម។
មេដឹកនាំនយោបាយទាំងពីរ ដែលជាធម្មតាមិនដែលយល់ស្របជាមួយគ្នាមិនថាជារឿងអ្វីនោះ បែរជាពេលនេះបានចេញអំពាវនាវស្រដៀងគ្នាទៅកាន់អ្នកគាំទ្ររបស់ពួកគេ។ នៅថ្ងៃអាទិត្យនេះមេដឹកនាំទាំងពីរបានប្រកាសថា សូមឲ្យពលរដ្ឋកម្ពុជាទាំងអស់ជួបជុំគ្នាទទួលទាននំបញ្ចុករួមគ្នា។
សម្រាប់ក្រុមអ្នកគាំទ្ររបស់លោកនាយករដ្ឋមន្រ្តីកម្ពុជាយល់ឃើញថា លោក ហ៊ុន សែនបានលើកតម្កើងការទទួលទាននំបញ្ចុករួមគ្នានេះ ថាជាការបង្រួបបង្រួមនិងសាមគ្គីភាព។ ចំណែកឯលោក សម រង្ស៊ី វិញបានចាត់ទុកការទទួលទាននំបញ្ចុកនេះថាជាការបង្កើតមិត្តភាពនៅក្នុងមហាគ្រួសារកម្ពុជាទាំងមូល។
ការអំពាវនាវរបស់មេដឹកនាំទាំងពីរនេះហាក់ដូចជាខុសពីធម្មតា ដែលជាទូទៅតែងតែប្រឈមមុខគ្នាយ៉ាងខ្លាំងក្លានោះ។
គណបក្សសង្គ្រោះជាតិដែលត្រូវបានរំលាយដោយតុលាការកំពូលកាលពីខែវិច្ឆិកា ឆ្នាំ២០១៧ គឺជាអ្វីដែលត្រូវបានគេមើលឃើញជាទូទៅថា ជាការបត់បែននយោបាយដើម្បីធានាដល់ជ័យជម្នះរបស់គណបក្សប្រជាជនកម្ពុជារបស់លោក ហ៊ុន សែន នៅក្នុងការបោះឆ្នោតជាតិកាលពីឆ្នាំ២០១៨។
សមាជិកគណបក្សសង្គ្រោះជាតិទាំង១១៨នាក់ត្រូវបានដកចេញពីតំណែងនិងហាមឃាត់មិនឲ្យធ្វើនយោបាយរយៈពេល៥ឆ្នាំ។អតីតសមាជិកគណបក្សសង្គ្រោះជាតិផ្សេងទៀតបានភៀសខ្លួនទៅក្រៅប្រទេស ដោយភ័យខ្លាចពីការចាប់ខ្លួន៕