លោកនាយករដ្ឋមន្ត្រីហ៊ុន សែន បានបញ្ចេញប្រតិកម្មខ្លាំងៗនៅថ្ងៃចន្ទនេះ តបនឹងការចោទប្រកាន់ថា លោកជាអ្នកបញ្ជាឱ្យសម្លាប់អតីតមេប៉ូលិសកម្ពុជាគឺលោកហុក ឡង់ឌី និងថាលោកកំពុងក្លាយជាមុខសញ្ញាសងសឹកនាពេលខាងមុខ។
ប្រតិកម្មរបស់លោកនាយករដ្ឋមន្ត្រីកើតមានឡើង ក្រោយពីលោកសម រង្ស៊ី ប្រធានស្តីទីគណបក្សសង្គ្រោះជាតិ បានបង្ហោះសារតាមទំព័រហ្វេសប៊ុកកាលពីមួយថ្ងៃមុនដោយចោទប្រកាន់ថា លោកហ៊ុន សែន ជាអ្នកបញ្ជាឱ្យសម្លាប់ លោកហុក ឡង់ឌីហើយថាកូនប្រុសរបស់លោកគឺលោកឌី វិជ្ជា កំពុងតែរកវិធីសងសឹកវិញ។
លោកហ៊ុន សែន បានថ្លែងនៅក្នុងកម្មវិធីចែកសញ្ញាប័ត្រដល់និស្សិតនៅរាជធានីភ្នំពេញថា៖
«ខ្ញុំករុណាខ្ញុំមិនចង់ប្រើពាក្យអសុរសណាមួយទេ ក៏ប៉ុន្តែវាព្រហើនពេក។ ឥឡូវនេះវាដល់កម្រិត វាបង្ហោះ វាថាខ្ញុំសម្លាប់ហុក ឡង់ឌី ឥឡូវកូនហុក ឡង់ឌី ដែលជាកូនប្រសាររបស់ខ្ញុំនេះ កំពុងតែរកវិធីសងសឹក ជាមួយនឹងខ្ញុំករុណាខ្ញុំដោយសហការជាមួយស ខេង»។
លោកហុក ឡង់ឌី អគ្គស្នងការប៉ូលិសជាតិបានស្លាប់ក្នុងករណីធ្លាក់ឧទ្ធម្ភាគចក្រមួយកាលពីថ្ងៃទី៩ ខែវិច្ឆិកា ឆ្នាំ២០០៨ នៅខេត្តស្វាយរៀង ហើយរបាយការណ៍ផ្លូវការបានបញ្ជាក់ថា គឺដោយសារមានអាកាសធាតុអាក្រក់ដែលមានភ្លៀងធ្លាក់ខ្លាំងនិងរន្ទៈ។ប៉ុន្តែលោកសម រង្ស៊ី បានអះអាងតាមហ្វេសប៊ុកថា គឺដោយសារតែ «ការដាក់គ្រាប់បែកឲ្យផ្ទុះ» ប៉ុណ្ណោះ។
លោកសម រង្ស៊ី បានបញ្ជាក់ពីហេតុផលនៃការសម្លាប់លោកហុក ឡង់ឌី ថាគឺដោយសារលោកហុក ឡង់ឌី បានដឹងរឿងអាក្រក់របស់លោកហ៊ុន សែន ដូចជាការធ្វើឃាតសកម្មជនសហជីពជាដើម។
លោកសម រង្ស៊ី បានបញ្ជាក់ប្រាប់វីអូអេបន្ថែមថា លោកទទួលបានការវិភាគនេះពីអ្នកជំនាញបរទេសដែលបានវិភាគតាមរយៈរូបថត៖
«ការពន្យល់នៃឧបទ្ទវហេតុហ្នឹង គឺមានតែផ្ទុះគ្រាប់បែក។ អីចឹងមិនមែនជាគ្រោះថ្នាក់ធម្មតាទេ គ្រោះថ្នាក់នេះគឺជាគ្រោះថ្នាក់ដែលគេរៀបចំ។ ឥឡូវសួរថាអ្នកណាដែលមានមធ្យោបាយរៀបចំគ្រោះថ្នាក់ចំពោះឧទ្ធម្ភាគចក្រលោកហុក ឡង់ឌី? ដាក់ដោយលួចលាក់មិនឱ្យសាម៉ីខ្លួនដឹង សាម៉ីខ្លួនជិះទៅផ្ទុះតែម្តង? ហើយផ្ទុះហ្នឹងគេបញ្ជាទៀត។ គេឃើញថាវាជិតចុះហើយ គេចុចឱ្យផ្ទុះ មិនមែនផ្ទុះនៅលើមេឃកម្ពស់ណាកម្ពស់ណីទេ។ ដូច្នេះគេមើលវាជិតមកដល់ដីហើយ គេចុចឱ្យផ្ទុះ ប៉ុន្តែមិនមែនដូចលោកហ៊ុន សែន ថាទេ។ មិនមែនរន្ទៈបាញ់ទេ ហើយមិនមែនបញ្ហាម៉ាស៊ីនទេ»។
លោកសម រង្ស៊ី បានបន្តលើកឡើងទៀតថា ដោយហេតុនេះហើយលោក ឌី វិជ្ជា ដែលសព្វថ្ងៃជាអគ្គស្នងការរងនគរបាលជាតិ ជាកូនប្រុសច្បងរបស់លោក ហុក ឡង់ឌី កំពុងតែគិតគូរអំពីផែនការសងសឹកជូនឪពុករបស់លោក ដោយមានការគាំទ្រពីលោក ស ខេង រដ្ឋមន្ត្រីក្រសួងមហាផ្ទៃ ពីព្រោះ លោក ស ខេង ដឹងខ្លួនថាលោក ហ៊ុន សែន កំពុងតែរៀបចំផែនការដកតំណែងរបស់លោកដើម្បីឲ្យកូនប្រុសបង្កើតមកបន្តវេនដោយមិនមានការរារាំង។
លោកសម រង្ស៊ី បានបន្ថែមថា៖
«អ្វីដែលខ្ញុំលើកឡើងហ្នឹង ខ្ញុំជឿថាអ្នកដទៃទៀត គេមានព័ត៌មានដូចខ្ញុំដែរ។ គេមិនមែនចេះតែជឿៗ ហើយបើគេពិចារណាទៅគេថាមិនមែនជារឿងធម្មតាទេ ហើយខ្ញុំជឿថាក្នុងគ្រួសារ កូនចៅលោកហុក ឡង់ឌី ក៏មានចម្ងល់ថា ចម្ងល់ហ្នឹងបើគិតមួយសន្ទុះទៅ គឺមិនមែនគួរឱ្យឆ្ងល់ទេ គឺគួរឱ្យសន្និដ្ឋានថា មានគេធ្វើឃាតឪពុកលោក។ ហើយជាគេជាយើង បើមានអ្នកណាធ្វើឃាតឪពុកយើង គឺយើងមិនអាចនៅស្ងៀមធ្វើមិនដឹងមិនឮទេ ម៉េចក៏យើងចិញ្ចឹមចិត្តរកយុត្តិធម៌ឱ្យបិតាយើងដែរ»។
លោកនាយករដ្ឋមន្ត្រីហ៊ុន សែន បានបបួលលោកសម រង្ស៊ី ស្បថស្បែរ បើថានោះគឺជាព័ត៌មានពិត ៖
«ឥឡូវបើសិនជារឿងអីចឹងពិតមែនអ្ហែង ហ៊ានស្បថឱ្យងាប់ទាំងពូជអ្ហែងទេ?»
ប៉ុន្តែលោកសម រង្ស៊ី បញ្ជាក់ថា ការស៊ើបអង្កេតត្រឹមត្រូវគឺជាដំណោះស្រាយ គឺមិនមែនការស្បថស្បែរនោះទេ។
លោកហុក ឡង់ឌី មានអាយុ៥៨ឆ្នាំ នៅពេលដែលលោកមានគ្រោះថ្នាក់ដល់បាត់បង់ជីវិត ហើយលោកធ្លាប់កាន់មុខតំណែងជាអភិបាលខេត្តស្វាយរៀង និងអភិបាលរាជធានីភ្នំពេញ មុននឹងលោកឡើងមកកាន់តំណែងជាអគ្គស្នងការប៉ូលិសជាតិ។ លោកហុក ឡង់ឌី ក៏ធ្លាប់ត្រូវសហរដ្ឋអាមេរិកដាក់ក្នុងបញ្ជីខ្មៅហាមប្រាមមិនឱ្យចូលដោយសង្ស័យថាមានជាប់ពាក់ព័ន្ធនឹងការជួញដូរមនុស្ស ប៉ុន្តែលោកចាត់ទុកថានោះគឺជាការភាន់ច្រឡំ៕
