គណៈកម្មាធិការជាតិរៀបចំការបោះឆ្នោតនឹងអនុវត្តគម្រោងសាកល្បងសម្រាប់ធ្វើការចុះបញ្ជីឈ្មោះអ្នកបោះឆ្នោតតាមបច្ចេកទេសថ្មីដោយប្រើប្រាស់ប្រព័ន្ធកុំព្យូទ័រដែលអាចនឹងជៀសវាងឈ្មោះស្ទួនដែលធ្លាប់កើតមានឡើងនិងការខុសឈ្មោះជាដើម។
ការចុះឈ្មោះនឹងប្រព្រឹត្តទៅនៅចុងឆ្នាំ២០១៥នេះ។ នេះបើតាមការបញ្ជាក់របស់មន្ត្រីរៀបចំការបោះឆ្នោត។
រីឯដំណើរការចុះឈ្មោះពិតប្រាកដនឹងអាចចាប់ផ្តើមនៅឆ្នាំ២០១៦ ដោយសារតែត្រូវរង់ចាំការសម្រេចពីរាជរដ្ឋាភិបាលលើកាលបរិច្ឆេទបោះឆ្នោតពិតប្រាកដសិន។
លោក ហង្ស ពុទ្ធា សមាជិក គ.ជ.ប និងជាអ្នកនាំពាក្យបានប្រាប់វីអូអេថា៖
«យើងនឹងចុះសាកល្បងនៅ ទូទាំងប្រទេសគ្រប់ខេត្តតែម្តងពីព្រោះវាពាក់ព័ន្ធជាមួយនឹងអ៊ីនធឺណិត។ វាពាក់ព័ន្ធជាមួយនឹងសម្ភារៈបច្ចេកទេសមួយចំនួន។ យើងចុះទៅមើលសំណាកដើម្បីឱ្យដឹងថាជួបការលំបាកអ្វី។ អ្វីដែលយើងធ្វើបាន អ្វីដែលយើងធ្វើអត់បានពីព្រោះបញ្ជីចុះឈ្មោះបោះឆ្នោតថ្មីនេះវាតម្រូវឱ្យមានស្នាមផ្តិតមេដៃ ស្នាមក្រយ៉ៅដៃហើយមានរូបថតទៀត»។
លោកហង្ស ពុទ្ធា ដែលជាអតីតអ្នកតាមឃ្លាំមើលការបោះឆ្នោតនិងធ្លាប់រិះគន់ប្រព័ន្ធបោះឆ្នោតចាស់យល់ថាប្រព័ន្ធថ្មីនេះធានាសុក្រឹតភាពជាងមុន។
«យន្តការថ្មី នេះយើងមើលទៅថាអាចកាត់បន្ថយបានពីមុនមកចុះឈ្មោះដោយដៃហើយបញ្ជូនមកភ្នំពេញ ហើយអ្នកភ្នំពេញវាយមួយសារទៀតអាចខុស។ អញ្ចឹងគម្រោងថ្មីនេះកាត់បន្ថយការខុសនេះច្រើនមែនទែន។ កុំព្យូទ័រមួយមានកាមេរ៉ាពីរទៀតមួយទៀតសម្រាប់សាម៉ីខ្លួនមើលមួយទៀតសម្រាប់អ្នកប្រតិបត្តិការ មន្ត្រីចុះឈ្មោះគាត់វាយទៅយើងអាចមើលផ្ទាល់សម្រាប់អ្នកចុះឈ្មោះ។ អញ្ចឹងបើខុសអ្វីអាចកែភ្លាម»។
អ្វីដែលគ.ជ.បត្រូវការធំបំផុតនាពេលបច្ចុប្បន្ននេះគឺមធ្យោបាយសម្រាប់ការចុះឈ្មោះបោះឆ្នោត និងអប់រំអ្នកបោះឆ្នោត ដើម្បីឲ្យស្គាល់សិទ្ធិនយោបាយរបស់គេ ពេលវេលាដែលត្រូវមកចុះឈ្មោះដើម្បីលុបបំបាត់ការដែលអត់មានឈ្មោះ នៅក្នុងបញ្ជីឲ្យបានច្រើនជាអតិបរមា។ នេះបើតាមសេចក្តីប្រកាសព័ត៌មានរបស់ស្ថាប័នបោះឆ្នោតនេះ។
គជបថ្មីនេះទើបបានបង្កើតឡើងក្រោយពីមានដំណោះស្រាយនយោបាយរវាងគណបក្សប្រជាជនកម្ពុជានិងគណបក្សសង្គ្រោះជាតិបន្ទាប់ពីមានការតវ៉ាក្រោយការបោះឆ្នោតជាតិកាលពីខែកក្កដាឆ្នាំ២០១៣។
លោកសម រង្ស៊ីប្រធានគណបក្សសង្គ្រោះជាតិបានប្រាប់វីអូអេនៅ ក្នុងបទសម្ភាសកាលពីសប្តាហ៍មុនថាការចុះបញ្ជីឈ្មោះអ្នកបោះឆ្នោតជាការសំខាន់៖
«អ្នកដែលបាត់ឈ្មោះគេមិនបានចុះឱ្យ។ ជួនកាលចុះហើយគេលុបចោលត្រូវបញ្ចូលមកវិញ ត្រូវបញ្ចូលឈ្មោះអ្នកដែលបាត់ឈ្មោះត្រូវបញ្ចូលឱ្យបានត្រឹមត្រូវជាស្ថាពរ។ ហើយក្នុងបញ្ជីបោះឆ្នោតជួនកាលមានតែឈ្មោះទេអត់មានមនុស្សទេ។ ហ្នឹងហើយដែលយើងហៅថាឈ្មោះខ្មោចឈ្មោះស្ទួនឈ្មោះបន្លំឈ្មោះខ្យល់យើងត្រូវសម្អាតបញ្ជី ធ្វើឱ្យបញ្ជីស្អាតពេញលក្ខណៈ។ ពេលនោះការបោះឆ្នោតមានលក្ខណៈត្រឹមត្រូវ។ ហ្នឹងហើយចំណុចដែលសំខាន់ហើយគណបក្សសង្គ្រោះជាតិនឹងផ្តោតអារម្មណ៍»។
កាលពីថ្ងៃពុធប្រតិភូសហគមន៍អឺរ៉ុបនិងអ្នកជំនាញខាងការបោះឆ្នោតបានមកជួបជាមួយនឹងថ្នាក់ដឹកនាំគ.ជ.បដើម្បីពិនិត្យមើលលទ្ធភាពជួយដល់ស្ថាប័នបោះឆ្នោតដែលទើបតែធ្វើការកែទម្រង់ថ្មីនេះ។ នៅថ្ងៃព្រហស្បតិ៍នេះក្រុមការងាររបស់ប្រទេសជប៉ុនក៏នឹងជួបជាមួយនឹងថ្នាក់ដឹកនាំគ.ជ.បដែរដើម្បីពិនិត្យមើលលទ្ធភាពដែលអាចជួយស្ថាប័នបោះឆ្នោតនេះដែរ។
ប្រទេសកម្ពុជាគ្រោងនឹងរៀបចំការបោះឆ្នោតក្រុមប្រឹក្សាឃុំសង្កាត់នៅខែកុម្ភៈឆ្នាំ២០១៧និងការបោះឆ្នោតជាតិនៅខែកុម្ភៈឆ្នាំ២០១៨ប៉ុន្តែថ្ងៃពិតប្រាកដនៅមិនទាន់សម្រេចនៅឡើយទេ៕